1 Reve Isra'ila 'yon a̱vu u reme ure oɓolo ni ili i na u ri na̱ a̱yi suru. Ana u rawai Biyasheba, avu u ca A̱sula̱ a dada va̱ yi Ishaku kucci. 2 A̱tsuma̱ a ayin reve A̱sula̱ a yuwan adanshi na̱ a̱yi a alavu alavu u ɗe yi, <<Yakubu, Yakubu!>> Reve u usu, <<Apa mu nda.>>

3 A̱vu A̱sula̱ a damma, <<A̱mu ɗa A̱sula̱, A̱sula̱ a dada va̱ wu. She vu uwwa wovon u na va̱a̱ 'ya̱wa̱ Masar wan. Adama a na ɗe ɗa maa zuwa wu voo owo iɗa i gbain. 4 N ta̱ 'ya̱wa̱ oɓolo na̱ a̱ɗu a̱tsuma̱ a Masar, waru n tara ɗu a̱ ka̱mbisa̱ pa. Waru ekere a̱ Isuhu a ɗa a̱a̱ ɓa̱ru esu a̱ wu a mantsa ma na vu kuwa̱i.>>

5 Reve Yakubu lyawa Biyasheba, a̱vu muwun ma̱ yi n tara dada le, na̱ muwun n ke'en n le oɓolo na̱ a̱ma̱ci e le a̱tsuma̱ e ikeke yi inan i na Firi'awuna lyunguyi a tara yi. 6 A̱ ta̱wa̱ ta̱ oɓolo ni iliyamunga i le, nu utsuru u na a̱ tsura̱i a̱tsuma̱ e iɗa ya Ka'ana suru. Reve Yakubu nu u'wa wa̱ yi suru a rawa a̱tsuma̱ a Masar, 7 oɓolo na̱ muwun ma̱ yi ma ali, na̱ muwun n tsukaya ma̱ yi olobo, oɓolo na̱ muwun ma̱ yi me esheli na̱ muwun n tsukaya ma̱ yi me esheli, nu ugundo wa̱ yi suru.

8 Apa ugeru wa ala wa aza a Isra'ila, (a̱za̱ o ugundo a Yakubu,) aza a na a̱ tyoi Masar. Roben, mawun mo ufaru ma Yakubu. 9 Muwun ma̱ Roben ele ɗa Hanoku na̱ Palu na̱ Hezeron oɓolo na̱ Karmi. 10 Muwun mo olobo ma Saminu ele ɗa Yemuye, na̱ Yamin na̱ Ohada na̱ Yakin na̱ Zohara na̱ Shawul, za na ka va Ka'ana matsain. 11 Muwun mo olobo ma̱ Levi ele ɗa na̱ Gashon na̱ Koha oɓolo na̱ Merari. 12 Muwun mo olobo ma Yahuza ele ɗa Era na̱ Onana na̱ Shela na̱ Pere na̱ Zera. Amma Era na̱ Onana a̱ kuwa̱ ta̱ a̱tsuma̱ a Ka'ana. Muwun mo olobo ma Pere ele ɗa, Hezeron na̱ Hamula. 13 Muwun mo olobo ma Isaka ele ɗa Tola na̱ Fuwa na̱ Yashuba na̱ Shimaron. 14 Muwun mo olobo ma Zebulun ele ɗa Serede na̱ Elon na̱ Yaleye. 15 Ele nda ele ɗa muwun mo olobo n na Liyatu matsayin Yakubu a̱tsuma̱ a Fada Aram, na̱ mawun mo usheli ma̱ yi Dina. Muwun me esheli no olobo suru, ele ɗa ama mata'atsu na aza a ta'atsu. 16 Muwun mo olobo ma Gadu gba ele ɗa Zifiyon na̱ Hagi na̱ Shuni na̱ Ezebon na̱ Eri na̱ Arodi oɓolo na̱ Areli. 17 Muwun mo olobo ma Ashere ele ɗa Imana na̱ Ishaba na̱ Ishabi na̱ Beriya. Sera ɗa da̱na̱i mawun ma̱ a̱na̱wun me le mo usheli. Muwun mo olobo ma Beriya gba ele ɗa Heba na̱ Malikiye.

18 Ele nda ele ɗa muwun mo olobo n na Zilifa za na Laban cayi usheli wa̱ yi Liyatu matsayin Yakubu, ele ama kupa na̱ a̱za̱ a̱ ta̱li a ɗa suru suru. 19 Muwun mo olobo ma Rahila ka va Yakubu ele ɗa Isuhu na̱ Banyami. 20 Muwun mo olobo ma̱ Isuhu n na a matsaan niyi e iɗa ya Masar, ele ɗa Manase na̱ Ifiramu. Asena usheli wa Fotifa ganu va On ɗa mma le. 21 Muwun mo olobo ma Banyami ele ɗa Bela na̱ Beka na̱ Ashabe na̱ Gera na̱ Na'ama na̱ Ehi na̱ Rosh na̱ Mufin oɓolo na̱ Arad. 22 Ele nda ele ɗa muwun mo olobo n na Rahila matsayin Yakubu, ele kupa na̱ a̱za̱ a̱ na̱shi suru suru. 23 Ulobo wa Dan a̱yi ɗa Hushim. 24 Muwun mo olobo ma Nafutali ele ɗa Yazeye na̱ Guni na̱ Jeza na̱ Shilem. 25 Ele nda ele ɗa muwun mo olobo ma Yakubu n na Biliha matsaan niyi. Biliha ɗa usheli u na Laban cayi Rahila, ele ɗa ama e cindere suru suru.

26 A̱bunda̱ a ama o ugundo wa Yakubu goon a na a uwai Masar oɓolo na̱ a̱yi ele ɗa ama kupota̱li na̱ a̱za̱ a̱ ta̱li, babu na̱ a̱ma̱ci a̱ muwun ma̱ yi. 27 Muwun mo olobo ma̱ Isuhu n na a matsaan niyi a Masar ele ɗa ama e re. Adama o ndolo suru suru a̱bunda̱ a ama o u'wa a Yakubu a na a̱ tyoi Masar ele ɗa ama kupocindere.

28 Yakubu lyungu ta̱ Yahuza elime ya̱ Isuhu adama u roco le cine aa yuwan a̱ tyo Goshen. Reve ana a rawai ɗe, 29 Isuhu foɓo ta̱ keke vi ido va̱ yi, reve u saɓa a̱ tyo Goshen adama u ga'an na̱ dada va̱ yi. Ana u rawai reve u katala dada va̱ yi a̱ yinlu a̱vu u jima e mesun. 30 Reve Isra'ila damma Isuhu, <<Gogo nda n ta gura kuwa̱, adama a na me ene ta̱ urewesu wa̱ wu, waru n reve ta̱ a na vu buwai wuma.>>

31 Reve Isuhu damma a̱za̱ a̱ yi na ama o u'wa wa dada va̱ yi suru, <<N ta̱ 'ya̱wa̱ n damma Firi'awuna a na a̱za̱ a̱ va̱ nu u'wa wa dada va̱ a na a̱ shi e iɗa ya Ka'ana a̱ ta̱wa̱i ya̱'a̱ va̱. 32 Waru n ta damma yi ama'a aza a aguɓa a ɗa. Waru a̱ ta̱wa̱ ta̱ ni iliyamunga i le oɓolo e mgbele ni ikyon no oɓolo e inan i le ni ili i na a̱ ri na̱ a̱yi suru. 33 Na̱ Firi'awuna ɗe ɗu we ece ɗu, <Nye i ɗa ulinga u ɗu?> 34 I usu yi, <Agbashi a̱ wu aza a aguɓa e iliyamunga a ɗa diga a̱tsu a̱ muwun cine nkaya n tsu n yuwain nu ujumu.> Nni i damma yi ne, u ta lyawa ɗu i da̱nu upasu wa̱ Goshen, adama a na aza a aguɓa ili yi idaba i ɗa e ekere a aza a Masar.>>