1 Ana ili i ndolo kotoi, a̱vu A̱sula̱ a tawa Ibrahim utyo, a̱vu u damma, <<Ibrahim.>> A̱vu u damma, <<Apa mu.>>

2 A̱vu A̱sula̱ a damma, <<Vu tara mawun ta̱ ma̱ wu Ishiyaku, za na vu cigai, a̱vu vu 'ya̱wa̱ e iɗa ya Moriya, ɗe ɗa vaa ca kucci vu ukula̱tosu va̱ yi a nsasan n na maa damma wu.>>

3 Na̱ wasasa, a̱vu Ibrahim zami ɗanga adama a̱ kucci, a̱vu u foɓo mololi ma̱ yi, a̱vu u tara Ishiyaku na agbashi e re. Reve e reme ure a̱ tyo uba̱ta̱ u na A̱sula̱ a damma niyi. 4 O urana wa ta'atsu, a̱vu Ibrahim 'ya̱sa̱n aaci a̱vu we ene uba̱ta̱'a̱ alanga. 5 A̱vu u damma agbashi'i, <<Isawain pa nda na̱ mololi'i. Na̱ a̱mu nu ulobo'o tsu ta̱ 'ya̱wa̱ tsu yuwan a̱ga̱nda̱, reve tsu ka̱mba̱ uba̱ta̱ u na i ri.>>

6 A̱vu Ibrahim tanu Ishiyaku ɗanga kucci vu ukula̱tosu'u, reve a̱yi aciya̱yi u ɓa̱na̱ matsun na akina. Ele ra reve a uwa mmalu. 7 A̱vu Ishiyaku yuwan adanshi na̱ dada va̱ yi Ibrahim, u damma, <<Dada.>>

A̱vu dada va̱ yi usu, <<Apa mu, mawun ma̱ va̱.>>

Reve Ishiyaku yuwan yi yeci, <<Me ene wu ta̱ na̱ ɗanga oɓolo na akina, amma te ɗa ma̱giri'i adama a̱ kucci vu ukula̱tosu?>>

8 A̱vu Ibrahim usu, <<Mawun ma̱ va̱, A̱sula̱ a̱ ta̱ ta̱wa̱a̱ aciya̱yi ma̱giri'i adama a̱ kucci.>> Reve a̱ ka̱ra̱ ra.

9 Ana a rawai uba̱ta̱ u na A̱sula̱ a damma niyi, reve Ibrahim suwa masa'a, a̱vu u gere ɗanga ɗe. A̱vu wu nla̱ mawun ma̱ yi Ishiyaku, a̱vu u zuwa yi ɗe a ɗanga masa'a'a. 10 A̱vu u canana ukere u tara matsun, tsa̱ra̱ u paɗa mawun ma̱ yi. 11 A̱vu malingata ma̱ A̱sulazuva ma̱ ɗe yi diga zuva, <<Ibrahim, Ibrahim!>> Reve u usu, <<Apa mu.>>

12 A̱vu u damma, <<She vu ju'wa̱n mawun mo ndolo, ko vu yuwan ili i ro na̱ a̱yi wan. N reve ta̱ vu ta uwwusa wovon wa̱ A̱sula̱, ana wo o'woi vu putsa mu mawun ma̱ ta̱ ma̱ wu shi.>>

13 A̱vu Ibrahim 'ya̱sa̱n aaci a̱ yi, a̱vu we ene a̱a̱giri'i ɗe a̱ca̱pa̱ a̱ yi na avana a̱ yi ukatalu a ataci. A̱vu Ibrahim 'ya̱wa̱ u reme a̱a̱giri'i'i, reve u yuwaan kucci vu ukula̱tosu o una̱ u mawun ma̱ yi. 14 A̱vu Ibrahim ca uba̱ta̱'a̱ aala, <<A̱sulazuva a̱ ta̱ Ta̱wa̱a̱.>> Ununa aa dansa hali ana'an, <<A masasan ma̱ A̱sulazuva, a̱ ta̱ ta̱wa̱a̱.>>

15 A̱vu malingata ma̱ A̱sulazuva'a u ɗewishe Ibrahim we ire diga zuva, u damma, 16 <<Apa ili i na A̱sulazuva a dammai, <N kucina ta̱ na ala a̱ va̱. Ana vu yuwain cu'un vi ili i ndolo, vu 'yuwan vu ca mawun ma̱ ta̱ ma̱ wu shi, 17 amayun a ɗa maa zuwaa wu aba'un. N ta zuwa limatan va̱ wu yuwan a̱bunda̱ cine italyo'o ya zuva i ri, waru cine vu revei wuyun wu nge'en m mala. Waru limatan va̱ wu te reme ilyuci ya arala e le. 18 Adama a̱ muwun mu ugundo ma̱ wu, uvaɗi ma̱ɓula̱ u ta̱ tsura̱ aba'un, adama a na vu toniyi ili i na n damma nuwu.> >> 19 Reve Ibrahim ka̱mba̱ uba̱ta̱ wa agbashi a̱ yi, reve a̱ ka̱ra̱ a̱ ka̱mba̱ Biyasheba oɓolo. Reve Ibrahim da̱nu Biyasheba.

20 Ana ili i ndolo i kotoi, reve a damma Ibrahim, <<Milka fo matsaan ta̱ mawun ma̱ a̱na̱wun ma̱ wu Naho muwun. 21 Uz ɗa mawun mo ufaru, reve Buz kuru, she Kemuwe dada va Aram ta'atsu. 22 She Kese waru na̱ Hazo na̱ Filidash na̱ Jidilaf na̱ Betuwe.>> 23 Betuwe ɗa matsain Rikatu. Milka ɗa matsaan yi Naho mawun ma̱ a̱na̱wun ma Ibrahim muwun kunla̱ n nda. 24 Reve waru Reyuma ka vu nge'en va Naho matsaan yi Teba, na̱ Gaham, na̱ Tahash na̱ Ma'aka.