1 Iino Paulu o Sailasi nibakainda mutaindi lya Amfipolisi omutaindi lya Apoloniya, bakasika kutaindi pati lya Tesalonika, ooko kwali cikombelo ca Majuda. 2 Paulu wakainka ku Majuda mucikombelo mbuli citambo cakwe. Kwe Nsabata zyo tatwe zicilizyanya walikwaamboozyana abantu 3 kubapandulwida Malembo okubatondezya kuteeti Mesiya walikweelede kupenga okubuka kuzwa kulufu. Paulu wakazumanana okwaamba kuteeti, "Ooyu Jesu ngondaambilizya kulindinywe ngonguwe Mesiya." 4 Iino bamwi bakamvwida zyaalikwaamba Paulu. Mpoonyina bakacilila Paulu o Sailasi ape kwali ebbunga pati lya Magiliki balikukomba Leza abanakazi bace balikukutekwa ambabo bakamumvwida okucilila.
5 Kono bamwi Majuda bakaba omunyono okubunganya baalumi batakwe ntuso baingaila feela mumigwagwa batajesi zyokucita. Nibakavula, bakalyanganya taindi lyoonse okufumpa ngʼanda yo mwaalumi walikuteegwa Jasoni kabalangoola Paulu o Sailasi kuteegwa babeete kubantu. 6 Kono nibakababula bakakuluntila Jasoni abasyomi bamwi kunembo lya beendelezi be taindi okoongolola kuteeti, "Paulu o Sailasi balyanganya nyika yoonse!17:6 Ibbala "nyika" aawa yaamba bulelo bwa Maloma. Paulu o Sailasi bakaliinkide mwateni mumataindi mapati amwi alimucibeela cobulelo bwa Maloma. Kono bantu bakaambila munkanka mukoongolola kuteeti Paulu o Sailasi bakasika koonse. Iino beza kuno kutaindi lyesu. 7 Kono Jasoni wabatambula mungʼanda yakwe. Boonse babacilila bakazya milawo ya Kaisala Muleli Mupati wa Baloma, kabaamba kuteeti kuluumbi muleli mupati wezina lya Jesu." 8 Aaya majwi akeeta kulyangana akati kembunga yabantu a beendelezi be taindi. 9 Mpoonyina beendelezi be taindi bakabbadezya Jasoni abamwi mali alikuyandika ecisyomezyo cokuteeti taciyoocitiki ape, mpoonyina bakabalukulula.
10 Masiku aayo ngoonyina, basyomi bakatuma Paulu o Sailasi kwiinka ku Bbeliya. Nibakasika feela kwateni bakanjila mucikombelo. 11 Bantu boku Bbeliya bali emizeezo isolonta kwiinda bantu boku Tesalonika, kaambo balikuyandisya loko kuswilizya zyaalikukambooka Paulu, buzuba-obuzuba balikubala Malembo kubona na zyali kwiisya Paulu zye nconzyo. 12 Kaambo keeci bunji bwabo bakasyoma antoomwi abanakazi abamaalumi be Cigiliki balikukutekwa. 13 Kono Majuda boku Tesalonika nibakamwva kuteeti Paulu ako ku Bbeliya walikukambooka majwi a Leza bakainka kwateni okuyoobunganya bantu okutalika kulyanganya mabunga. 14 Mpoonya-mpoonya basyomi bakatola Paulu kunkomwe yo lwizi, kono Sailasi o Timoti bakasyala ku Bbeliya. 15 Aabo bamaalumi bakainka o Paulu, bakamusindikizya mane ku Atenesi. Bakapiluka omulaizyo wokuteeti Timoti o Sailasi bamutandile Paulu kwaakabede cokufwambana.
16 Paulu naalikulindila Sailasi o Timoti mu Atenesi, wakabijilwa loko naakabona taindi mbulyazwide mituni. 17 Mpoonyina walikwiinkaanga mucikombelo okwaambozyanya a Majuda a Bamasi bali kukomba Leza ape walikwaamboozyanya abantu balikuza mumusika buzuba-obuzuba. 18 Ape abamwi basongo17:18 Aaba basongo mbantu bayeeyaanga nyika mboibeleka, bulungulizi bo buumi ecipa kuteeti kupona kubeentuso. Bagwasilizya bantu kusala nzila mbobeelede kupona. Bakuteka ziisyo zyabo kwiinda bukombi. baitwa kuteeti Baipikuleya17:18 Baipikuleya balikwiisya kuteeti kubotelwa ceceelede kuba cintu cipati loko mubuumi. abamwi baitwa kuteeti Basitoyiki17:18 Basitoyikisi balikwiisya kuteeti bantu beelede kwiiya kulijata okupona buumi kakutakwe kulimvwa kubotelwa naanga kulimvwoobi. bakakazyanya anguwe. Bamwi bakateeti, "Ino ooyu utakwe ecezi ubbwa nzi?"
Bamwi bakataba kuteeti, "Kuboneka aanga mukamboosi wa baleza mbetutezi." Bakaamba namu kaambo wali kukambooka Makani Mabotu aa Jesu azyokubuka kwabafu. 19 Mpoonyina bakamwiita okwiinka anguwe ku nkuta ya Alewopagasi, kabateeti kulinguwe, "Tuyanda kumvwisisisya eeci ciisyo cipya. 20 Zimwi zintu zyoamba kulindiswe zilakomosya, iino tuyanda kuziba zyozyaamba." 21 Bakamubuzya namu kaambo bana Atenesi abamuzwakule balikukala mwateni balikubelesya nako yabo yoonse kumvwa okwaamba zintu zipya.
22,23 Mpoonyina Paulu wakaima kunembo lya benkuta ya Alewopagasi okutalika kwaamba kuteeti, "Nobana Atenesi, nindali kweenda-enda mu taindi lyenu ndajana kuteeti mulifundumene kukomba kaambo ndakajana zintu zinji zyemubelesya mubukombi bwenu. Ndajana ecipaililo calembedwe kuteeti ‘Kuli Leza Utazizilwe.’ Iino ndiyandoomukambookela Leza ngomukomba naanga kuteeti tamumuzi. 24 17:24 1 Bami 8:27; Izaya 42:5; Misebezi 7:48. Leza wakapanga nyika ezyoonse zili mwateni ngonguwe Mwami we julu enyika, takali mumaandaa Leza aakapangwa amanzoo muntu, 25 naanga kupegwa mbuli muntu ubulide ape taakwe cayanda kaambo we nguupa buumi, kuyeeka ape ezyoonse kuli boonse. 26 Kuzwida kumuntu omwi wakalenga misyobo yabantu yoonse kuteegwa bakale nyika yoonse, nguwakasala ziindi ezibaka bantu zyobeelede kukala. 27 Wakacita namu kuteegwa bakamuyandoole mweendi mukwaampaampa balamujana, nekubakuteeti we tainsi kule kuli umwi-oumwi wesu. 28 Ede bakateeti,
‘Mulinguwe motuponena, motuputila ape motubede.’
Mboonyina mbuli mbobaamba bamwi basikweema benu kuteeti,
‘Aswibo tuli bana bakwe.’
29 Mbotuli bana ba Leza tutanoyeeyaanga bube bwa Leza buli mbuli ngolide naanga nsiliva naanga bbwe naanga cifwanikiso cakabambwa oluzibo naanga mizezo yabantu. 30 Leza wakazilanga feela zintu zibalikucita bantu muciindi cokutaziba, kono iino ulailila kuteeti boonse koonseneni beempwe. 31 Wakabika buzuba mbwayoatula bantu munyika yoonse cokululama kwiindila mu muntu ngwaakasala. Wakacitondezya eeci kumuntu woonse kwiindila mukubusya uulya muntu kuzwa kubafu."
32 Iino nibakamwva Paulu kaamboola ankani yokubuka kuzwa kubafu, bamwi bakatalika kumufubaazika kono bamwi bakateeti, "Tuciyanda kuzookumvwa ape kwaamboola aleyi nkani." 33 Mpoonyina Paulu wakazwa mumuswaangano. 34 Kono bamwi bamaalumi bakamusangana okusyoma, alaaba kwali Diyonisiyasi walikuzulilwa munkuta ya Alewopagasi omwanakazi wezina lya Damalisi abamwi bantu.
/images/a/Tcg2NiV7ce24OT6kCIQGR)
/images/a/qHG3xNP8jqR-HqIiucz0L)