Paulu Mutaind Pati ya Kolinto
1 Kuzwaawo Paulu wakazwa ku taindi pati lya Atenesi okwiinka ku taindi pati lya Kolinto. 2 Kwaakakujana Mujuda uteegwa Akwila, wakazyalilwa ku Pontiyasi. We amwanakazaakwe Pulisila bakazwide aakuzwa ku Itali kaambo Kulodiyasi Kaisala Muleli Mupati waba Loma wakalailila kuteeti Majuda bazwe mu Loma taindi pati lya Itali. Paulu wakainka kuyoobapotela, 3 okuyookala okubeleka ambabo kaambo walikubeleka musebezi wokuluka mateente mboonyina mbuli mbabo. 4 Nsabata-ensabata Paulu walikwaamboozyanya a Majuda a Magiliki mucikombelo kusola kuteeti basyome muli Jesu.
5 Iino Sailasi o Timoti nibakasika kuzwa ku Masedoniya Paulu wakaleka musebezi wakwe wokuluka mateente okupa nako yakwe yoonse kukukambooka majwi, kaambila Majuda kuteeti Jesu ngu Mesiya. 6 Nibakamukazya okwaamba zintu zibi alinguwe wakatondezya kuteeti tacikwe ntuso ambabo kwiindila mukututula zizwaato zyakwe kateeti, "Mwalijazya nobeni, mebo tandikwe mulandu nee! Kuzwa iino ndiinka kuli Bamasi." 7 Mpoonyina Paulu wakazwa kucikombelo okwiinka ku ngʼanda ya Titiyasi Jusitasi Wamasi wali kukomba Leza. Ngʼanda yakwe yali afwiifwi ecikombelo. 8 Iino umwi mwaalumi wezina lya Kilisipasi mweendelezi wecikombelo, we aboonse bengʼanda yakwe, abamwi bantu banji bomu Kolinto bakamvwa zyalikwaamba Paulu okusyoma mu Mwami okubbabbatizigwa.
9 Busiku bumwi Paulu wakabona cilengaano, Mwami mwaakamwaambila kuteeti, "Utayoowi, kono zumanana kukambooka, utaleki, 10 kaambo ndilaandiwe ape taakwe uyookulwaana okukucisa kaambo ndilaabantu banji mulilino taindi." 11 Mpoonyina Paulu wakakala mu Kolinto mwaaka emyeezi iili cisambomwi kalimukwiisya bantu majwi a Leza.