Ihikya n’ɨkamba
1 Yesʉ mwathoka eyo, mwaya mo kɨhʉgo ky’iYuteya n’ɨshabʉkɨra ko ʉndɨ mwishirya w’eYorotani. Abere ahika eyo, mihindano mɨngɨ y’abandʉ moyahindana kandɨ embere sɨwe, naye mwathanga ɨkangɨrɨsyabo, nga ko abyaga abegere ɨkola. 2 Bafarisayo bagʉma mobamuhikira bʉshana n’ɨmʉlengako. Mobamʉbʉtsya bathɨ: «Omʉgomba ethʉ anahamulire omuyira ɨkamba mʉkatsɨwe?»
3 Yesʉ mwashʉbɨtsyabo athɨ: «Mʉsa mwabaha ithegeko lɨhe?»
4 Nabo mobamʉshʉbɨtsya bathɨ: «Mʉsa mwaha omuyira yo hamuli y’ɨshaka marʉba w’ɨkamba mʉkatsɨwe na honyuma kw’aho amʉhɨge10:4 Soma Ɨbʉka Mʉgomba 24:1..»
5 Yesʉ mwabwɨrabo athɨ: «Mʉsa mwabashakɨra erithegeko eryo bʉshana n’obʉkalwe bw’emɨthɨma enyu. 6 Hewethuwe ko ndangɨro y’erɨhangɨka ebɨndʉ byoshi, Gongo mwabʉmba muyira na mʉkatsɨ. 7 Bʉshana n’ekyo, omuyira andamika ishe na nyinya n’ɨmathana na mʉkatsɨwe, 8 n’ababɨrɨ bandabya mʉbɨrɨ mʉgʉma. Aho nɨ bathakɨrɨ babɨrɨ, hewethuwe ni babya mʉbɨrɨ mʉgʉma. 9 Ewo bʉshana n’ekyo, omʉndʉ athamathʉlaga ekyo Gongo amathanaya.»
10 Yesʉ n’abɨga bʉwe babere bashʉba mo nyʉmba, abɨga bʉwe mobamʉbʉtsya kandɨ bʉshana n’ekɨnwa ekyo. 11 Yesʉ mwabwɨrabo athɨ: «Obʉlɨ mʉndʉ yo ʉkamba mʉkatsɨwe n’ihikya ʉndɨ, nɨamakolera mʉkatsɨwe mʉmbere yo rʉsɨngɨ. 12 N’omʉkatsɨ naye kuthyo amamika iba ʉwe n’ihikibwa na ʉndɨ muyira, nɨamasɨngɨra.»