35 Honyuma kw’aho, bagala babɨrɨ ba Sebetayo, ye Yakobo bana Yoani, mobahikira Yesʉ n’ɨmʉbwɨra bathɨ: «Mʉkangɨrɨtsya, othushondya ʉthʉkolere ekɨnwa kyo thwakʉshaba.» 36 Yesʉ mwabʉtsyabo athɨ: «Omushondya nyɨbakolere ki?» 37 Nabo mobamʉshʉbɨtsya bathɨ: «Wandabya wabya mo lʉkengerwa lwawe, ʉthʉtsɨɨre ikala hagʉma nawe, mʉgʉma ko lʉhande lwawe lw’amalyo n’ogʉndɨ ko lʉhande lwawe lw’amalembe.» 38 Hewethuwe Yesʉ mwabwɨrabo athɨ: «Muthetsi ekɨndʉ omʉshaba. mwanganakotsya ɨshoma olwatha lw’amalɨgo olo nyashoma? Kʉtse mwanganakotsya ibatisibwa ko lubatiso lwa malɨgo olo nyabatisibwako?» 39 Nabo mobamʉshʉbɨtsya bathɨ: «Ega, thwangakotsya.»
Yesʉ mwashʉba bwɨrabo athɨ: «Kwenene mwashoma olwatha olo nyashoma, n’ibatisibwa nga ko nyabatisibwa10:39 Olubatiso lo nyabatisibwako: Nɨ negena mbʉ olʉholo lwa Yesʉ.. 40 Hewethuwe ikatsya bandʉ ko lʉhande lwaye lw’amalyo, kʉtse lw’amalembe, oyo athalɨ mʉlɨmo aye. Nɨ Gongo ɨye mʉsha yo wandahira abandʉ abo athegekanaya mo myanya eyo.»
41 Abandɨ bɨga ikumi babere bonvwa ebɨnwa ebyo, mobapona Yakobo na Yoani. 42 Bʉshana n’ekyo, Yesʉ mwabɨrɨkɨra aboshi n’ɨbwɨrabo athɨ: «Munetsi ko abo bashungikire nga bathegeki b’ebɨhanda abanathegekabyo mʉ kahatho, n’abakʉlʉ babo abanikala kʉbo. 43 Hewethuwe bɨthagenda ebibya bithyo mo kathi kenyu. Oyo ushondya ibya mʉkʉlʉ mo kathi kenyu, lɨtholere niabya mukoli enyu. 44 N’oyo ushondya ibya mʉmbere, lɨtholere niabya mʉkobe wa boshi. 45 Kʉshangwa oMʉgala w’oMʉndʉ athahikaga bʉshana n’ɨkolerwa, hewethuwe ɨkolerana n’ɨhana obʉyɨngo bʉwe bʉshana ashabʉle bandʉ bangɨ10:45 Soma 14:24..»