1 Fa’ani taw ko rofen ni nge yib pi chon e tharmiy nga p’eowchen SOMOL bayay, ma ku bay Satan u fithik’rad. 2 Me fith SOMOL ngak ni ga’ar, "U uw e ka mub riy?"

Me fulweg Satan ni ga’ar, "Ku’ug yanyan ni gu be liyeg e fayleng."

3 Me ga’ar SOMOL, "Mog, kam guy fare tapigpig rog i Job? Dariy be’ u fayleng nib yul’yul’ ma bfel’ ni bod ir. Be liyor ngog mma ayuw ni nge dabi ngongliy e kireb. Mu tuwesriyeg ni nggu pagem ngam gad pa’am ngak ndariy tapgin, ma Job e ka be par nib yul’yul’ ngog ni ka faram i yib."

4 Me fulweg Satan ni ga’ar, "Be’ nib girdi’ e ra pag urngin ban’en ni fan e nge ayuweg e pogofan rok. 5 Machane ga ra gad pa’am ngak nge amith downgin, ma ra yog nga owchem e thin nib togopluw ngom."

6 Me ga’ar SOMOL ngak Satan, "Aram e ke mil fan ngom, kemus ni dab mu thang e fan rok."

7 Me chuw Satan u p’eowchen SOMOL me gagiyegnag e malad nge yib i for u downgin Job ni ga’ngin. 8 Me fek Job bochiyang u ba th’ib ni but’ nike pil ngi i ker downgin ngay me yan i par nga fithik’ e awat ko gin yima yan nn’ag e awat ngay. 9 Me ga’ar le’engin ngak, "Mog, ka ga be par ni gab yul’yul’ ngak Got ni bod kafram i yib? Mang ni dab mu yab’iy Got nge mu’ ma gom’?"

10 Me ga’ar Job ngak, "Ga be yog e thin ko balyang! Fa’anra pi’ Got ban’en ni bfel’ nge yib ngodad ma gadad fek u fithik’ e felfelan’. Ere fa’anra pi’ e gafgow nge yib ngodad ma mang ni ngad gun’gun’gad?" Yug aram rogon urngin e gafgow ni yib ngak Job ma de yog ban’en nib togopluw ngak Got.

11 Ma immoy dalip i tafager rok Job, ni Elifaz nu Teman nge Bildad nu Shuah, nge Zofar nu Naamah. Fa’an rrung’aged gelngin e gafgow nike tay Job, miyad turguy ni ngranod ra guyed ngar nanged salpen. 12 Ka yad mmal’af miyad guy Job, ma de pow rorad. Ma nap’an ni pow rorad, miyad yor ni kar paged lamrad ngalang. Miyad guchthuy e mad rorad ya kari kireban’rad, miyad gogoy e fiyath ngu u ron’ed ngalang ngi i wear nga fithik’ i lolugenrad. 13 Miyad par u rom nga but’ u to’oben Job ni medlip e rran nge nep’ nde yog bagayad ta’ab bugithin, ya kar guyed gelngin e bilig tay e gafgow nike tay.