1 Nde Pɔli mɛn kɛnin Isa Ɲenematɔmɔnin na talibidenba ri Alla sawo rɔ, nde le kitabu ɲin sɛbɛla ai ma, n ni n badenma Timote, ka a lawa lemɛniya jama ma Korɛnti so kɔndɔ a ni mɔɔ sɛnimanilu bɛɛ ma Akaya jamana bɛɛ rɔ.

2 An Fa Alla ni Maari Isa Ɲenematɔmɔnin ye hina ni jususuma di ai ma.

3 An ye baraka bilala an Maari Isa Ɲenematɔmɔnin Fa Alla yɛ, an Fa kininkinin tii, Alla mɛn ye mɔɔilu lalemɛniyala ko bɛɛ rɔ, 4 mɛn ka an nalemɛniya an na tɔrɔyailu bɛɛ rɔ kosa an ye se mɔɔilu lalemɛniyala mɛnilu ye tɔrɔya ɲa su bɛɛ rɔ wo lemɛniya fɛ Alla ka mɛn di an ma. 5 An ni Ɲenematɔmɔnin ye tɔrɔla an ɲɔɔn fɛ ɲa mɛn ma, an nalemɛniya ye warala Ɲenematɔmɔnin baraka rɔ wo ɲa le ma. 6 Ni an tɔrɔra, wo kɛnin ai la wakali ni ai la kisi ko fɛrɛ le ri. Ni an ka wakali sɔrɔn, ai fanan di wakali sɔrɔn, kosa ai ye fanka sɔrɔn tɔrɔyailu rɔ, an wa tɔrɔ an ɲɔɔn fɛ waati mɛn na. 7 An jii lanin ai rɔ fanan kosɛbɛ, baa an ka a lɔn ko an ye tɔrɔla an ɲɔɔn fɛ, an di lemɛniya sɔrɔn an ɲɔɔn fɛ.

8 Nba, n badenmailu, an ka tɔrɔya mɛnilu sɔrɔn Asi jamana rɔ, an ye a fɛ ka ai lalɔn ko woilu la. Donin mɛn lara an kun ma, wo tɛrɛ gbiliman haan! An tɛrɛ tɛ a nɔ! An jiitɛɛra le, ko an tɛrɛ tɛ kisila saya ma. 9 An tɛrɛ ra an miri ko saya ra latɛɛ an ma. Kɔni wo kɛnin de kosa an kana la an jɛrɛ la fɔɔ Alla mɛn ye mɔɔ faaninilu lawulila ka bɔ saya rɔ. 10 A ra an kunka saya gbalo ma, a ri na an kunka diya fanan. An da an jii la Alla rɔ jati ko a ri to an kunkala ikɔ tuun, 11 ai wa kɛ an dɛmɛnna Alla matara diya. Wo rɔ, mɔɔ siyaman di baraka bila Alla yɛ an na ko rɔ, Alla wa hina an na tuma mɛn na, mɔɔ siyaman na tarali ma.

12 An na jɛrɛmatɔɔ le ɲin di: An hankili ye sereya bɔla, an da taama dunuɲa rɔ Alla la sɛninya ni telen dɔ, a gbengben ai la ko rɔ. Mɔɔilu la walijiya tɛrɛ tɛ a ri, kɔni Alla la hina le tɛrɛ. 13 An tɛ foyi sɛbɛla ai ma ai tɛ se mɛn karanna, ka a lɔn. A lɔɔ ye n na ai ye a lɔn a ɲuma la, 14 ikomin ai ra a lɔn dɔɔnin ko an kɛnin ai la gbiliya le ri an Maari Isa na waati rɔ ikomin ai fanan kɛnin an ta ri ɲa mɛn ma.

15 N lanin ɲin na, n ka a miri, ko n ye wa aile le tɔrɔfɛ fɔlɔ kosa ai ye a tɔnɔ sɔrɔn siɲa fila. 16 N tɛrɛ ra a miri, n ye tamin ai tuwala n wa kɛ wala Masedoniya waati mɛn na. Wo kɔ rɔ, n kɔsɛtɔla ri tamin ai wara ka bɔ Masedoniya, ai ri n dɛmɛn wa ko rɔ Jude mara. 17 N ka ko ɲin natɛɛ waati mɛn na, n ka wo kɛ fuu le rɔ wa? Wala, n na koilu ri kɛ ikomin adamaden doilu wa, n di «ɔn» a ni «ɛn-ɛn» kuma siɲa kelen do? 18 Kɔni Alla telennin, an ka kuma mɛn fɔ ai yɛ, wo kɛnin tɛ «ɔn» ni «ɛn-ɛn» siɲa kelen. 19 Baa Isa Ɲenematɔmɔnin, Alla Dencɛ, Silasi ni Timote ni nde jɛrɛ ka mɛn na ko kawandili bɔ ai tɛma, wo kuma kɛnin tɛ kuma fila ri, ikomin «ɔn» a ni «ɛn-ɛn.» Kuma gbɛrɛ tɛ a rɔ, fɔɔ «ɔn!» waati bɛɛ. 20 Baa Alla ra an lahidi ko mɛn bɛɛ la, woilu dafanin Isa la kuma ɲin de fɛ ko «ɔn.» Wo le rɔ, an fanan ye a fɔla Isa baraka rɔ ko, «amina,» Alla gbiliya ko rɔ. 21 Awa Alla jɛrɛ le ka andeilu ni aile fanka don a la Mɔɔ Ɲenematɔmɔnin fɛ. A ra an masusa tulu la an suwandi ko rɔ, 22 ka a la tɔɔmasere la an ma, ka a la Nii Sɛniman nadon an jusu rɔ ka kɛ ikomin fen fɔlɔ mɛn donda an bolo tɔɔmasereya la kosa an ye la ko natɔilu la.

23 Alla le n sere ri, n da n kali n nii la: Ni n ma n kɔsɛ Korɛnti wo kɛnin de kosa n kana ai niilafin. 24 Na ka a fɔ ko an da fanka sɔrɔn ai la lemɛniya kun na, wo tɛ wo ri. Kɔni an ye baarala le an ɲɔɔn fɛ ai la sɛwa ko rɔ ka a masɔrɔn ai fanka donnin lemɛniya rɔ.