1 Pentekoli* lon sera ka ii bɛɛ ladɛnnin tɛrɛn yɔrɔ kelen dɔ. 2 Mankan ba do bɔra sankolo rɔ i kɔrɔ, ka kɛ ikomin fɔɲɔ ba mankan. Lemɛniya mɔɔilu siini bon mɛn na, mankan ka bon wo lafa. 3 Ii ka fen do yen, mɛn kɛnin ikomin ta mɛlɛn. A bɔni nɛnkun na, a ka a rafara ka a maa lemɛniya mɔɔ kelen kelenna bɛɛ la. 4 Alla Nii Sɛniman jiira ii kan. Ii bɛɛ kumara ii jɛrɛ yɛ kan gbɛrɛ rɔ ikomin Alla Nii Sɛniman ka ii dɛmɛn kuma la ɲa mɛn ma.

5 Wo ka Judiya siyaman jiyani tɛrɛn Jerusalɛmu, mɛnilu ye Alla ɲɛsilanɲɛbailu ri. Ii bɔni dunuɲa jamana bɛɛ rɔ. 6 Ii ka mankan wo mɛn tuma mɛn na, ii siyaman nara ii ladɛn ka kɛ jama ba ri. Ii seni ye, ii kabannakoyara, ka a masɔrɔn ii kelen kelenna bɛɛ ka ii fa kanilu mɛn woilu da rɔ. 7 Ii kabannakoyara kosɛbɛ ka a fɔ i ɲɔɔn yɛ ko: «Mɛnilu ye kumala ɲin di, ii bɛɛ tɛ Kalilekailu le ri wa? 8 Ɲa ɲuman de an kelen kelenna bɛɛ ye an sinmin kan mɛnna?» 9 Nba, Paritikailu tɛrɛ ye jama wo rɔ, a ni Medikailu, Elamukailu, Mesopotamikailu, Judekailu, Kapadɔsikailu, Pɔntikailu, Asikailu, 10 Firikikailu, Panfilikailu, Misirankailu a ni Libikailu, mɛnilu siini Sirɛni fan dɔ. Romukailu fanan tɛrɛ ye a rɔ. Doilu tɛrɛ Judiyailu le ri. Doilu tun tɛ Judiyailu ri, kɔni ii tun da don Judiyailu la dina rɔ. 11 Kɛrɛtikailu ni Arabuilu fanan tɛrɛ ye jama rɔ ye. Ii bɛɛ ka a fɔ ko: «Alla ra kabannako mɛnilu kɛ, ii ye woilu fɔla an fa wara kanilu rɔ. Nfen kɛni wo rɔ?» 12 Ii bɛɛ kabannakoyara ka ɲakɛ, fɔɔ ka i ɲɔɔn maɲininka ko: «Wo kɔrɔ ye nfen di?» 13 Kɔni doilu ka lemɛniya mɔɔilu mayɛlɛ ko ii ra dɔlɔ min kojuuya.

14 Wo le rɔ, Piyɛri ni talibidenba tɔ tan ni kelen ka ii lɔ. Piyɛri ka a kan nabɔ ka a fɔ mɔɔilu yɛ ko: «Ai Judiyailu a ni mɔɔ tɔ mɛnilu ye Jerusalɛmu yan bi, ai ye ɲin lɔn ka ai tolo malɔ n kan na. 15 Ai ra a fɔ ko mɔɔ ɲinilu ra dɔlɔ min ka ii ɲa laminin. Wo tɛ de! Ai ma a yen? Waleha le ten, mɔɔ ti se dɔlɔ minna ka ii ɲa laminin. 16 Kɔni mɛn sɛbɛni Alla la kitabu kɔndɔ keladen fisamante Jowɛli bolo, wo le ra dafa ai ɲana bi. A fɔra ko:

17 ‹Alla ka a fɔ ko: laban tuma na, n di n Nii Sɛniman lajii adamadenilu bɛɛ kan.

Ai dencɛilu ni ai denmusoilu ri Alla la kuma lase mɔɔilu ma.

Ai la kanberenilu ri koyenna ikomin sibo.

N di sibo la ai la mɔɔbakɔrɔilu ɲa ma.

18 Wo tuma, n di n Nii Sɛniman lajii n na jɔnilu kan, cɛɛ ni muso.

Ii ri n na kela lase mɔɔilu ma.

19 N di kabannakoilu kɛ sankolo rɔ,

ka tɔɔmasereilu kɛ duukolo kan.

Woilu ri kɛ ikɔ jeli, a ni ta ni a sisiba.

20 Tele ri fin ka kɛ dibi ri.

Karo ri wulen ikomin jeli,

sani Allabatala la lon gbiliyanin ba wa se.

Wo ri kɛ lon ba ri, mɛn makabanin.

21 Wo tuma, mɛnilu wa Allabatala kili dɛmɛn kanma, woilu bɛɛ ri kisi.›»

22 «Isirayɛli cɛɛilu, ai tolo malɔ kuma ɲin na. Alla le ka Isa Nasarɛtika kelaya. Alla ra wo yiraka ai la kabannakoilu ni ko masilannilu ni tɔɔmasereilu kɛ a ka mɛnilu kɛ ai tɛma ikomin ai jɛrɛ ka a lɔn ɲa mɛn ma. 23 A donda ai bolo. Alla ka a lɔn ka a la ko latɛɛ. Siya gbɛrɛ mɔɔilu ka ai dɛmɛn ka a gbɔngbɔn jiri kan ka a faa. 24 A faani kɔ, Alla ka a lawuli ka a hɔrɔya saya tɔrɔya ba ma. Fanka mɛn ye saya la, wo ma se Isa marala. 25 Nba, mansa Dawuda ka sɛbɛli do kɛ Isa la ko rɔ kitabu kɔndɔ ko:

‹N ka Allabatala yen n ɲɛ tuma bɛɛ rɔ.

Ka a masɔrɔn a ye n bolokinin ma,

n ti nala jilanjilanna n na kandanin.

26 Wo le kosɔn, n jusu sɛwanin kosɛbɛ!

N kan ye sɛwakan de ri.

N faribanku, a tɔnin kɛndɛya rɔ ka a la jiiya la a rɔ.

27 Baa, i ti nala sɔnna n nii ye to saya dibi rɔ.

I ti sɔn i la Mɔɔ sɛniman su ye mɛn kaburu rɔ ka toli.

28 Sila mɛnilu ye bɛnna ɲenemaya jɛrɛ jɛrɛ ma, i ra woilu yiraka n na.

I ri n nawasa sɛwala i ɲakɔrɔ.›»

29 Piyɛri ka a fɔ ko: «N badenmailu, n di a fɔ ai yɛ ko an benba Dawuda ra sa. Sika tɛ wo rɔ: a su donda. Hali bi a kaburu ye yan. 30 Ka a masɔrɔn Dawuda tɛrɛ keladen fisamante le ri, a ka a lɔn ko Alla ka lahidi ta ka a kali a yɛ ko a ri Dawuda bɔnsɔn do lasii a la mansaya siifen dɔ a kɔ. 31 Alla tun di mɛn kɛ sini natɔ, Dawuda ka wo yen. Wo rɔ, a kumara Mɔɔ Ɲenematɔmɔnin lawuli ko rɔ ka bɔ saya rɔ ko kan. A ka a fɔ ko a ma to saya dibi rɔ; a su ma mɛn kaburu rɔ ka toli.

32 «Alla ka Isa wo le lawuli ka a bɔ saya rɔ. Andeilu bɛɛ ye sereya le ri. 33 Alla ka a kɔrɔta ka wa a sii a bolokinin ma. A ka Alla la Nii Sɛniman sɔrɔn a fa Alla bolo, mɛn lahidi tani tɛrɛ. Isa ka wo lana an ma. Ai ka mɛn yen bi, a ni ai ka mɛn mɛn, Alla la Nii Sɛniman de ka wo kɛ. 34 Nba, Dawuda ma kɔrɔta ka wa harijeene rɔ, kɔni ale ka a fɔ kitabu rɔ ko:

Maari Alla ka a fɔ n na Maari yɛ ko:

I sii n bolokinin ma,

35 haan n ye i juuilu bilala i sen kɔrɔ.

36 «Ai, Isirayɛlika bɛɛ ka kan ka lɔn ka a lala ɲa mɛn ma ko Isa mɛn ii ka gbɔngbɔn jiri kan, Alla ra a kɛ Maari ri a ni Mɔɔ Ɲenematɔmɔnin.»

37 Ii ka wo mɛn tuma mɛn na, kuma wo donda ii jusu rɔ kosɛbɛ. Ii ka a fɔ Piyɛri ni talibidenba tɔilu yɛ ko: «An badenmailu, an ye nfen de kɛla sisɛn?»

38 Piyɛri ka ii jabi: «Ai bɛɛ ye tubi ka na Alla ma ka sun ji rɔ Isa Ɲenematɔmɔnin tɔɔ rɔ, wo rɔ, ai la kojuu ri makoto. Wo wa kɛ, Alla ri a la Nii Sɛniman di ai ma. 39 Alla ra Alla la Nii Sɛniman ɲin lahidi ta ai ni ai denilu yɛ, a ni mɛnilu ye fɔɔ yɔrɔ jan. An na Maari Alla ri mɛnilu kili, wo lahidi tani woilu bɛɛ yɛ.»

40 Piyɛri ka kuma siyaman la wo kan, ka ii kawandi. A ka ii lali kosɛbɛ ko: «Bi mɔɔilu juuman. Ai ye ai jɛrɛ kisi ii ma!» 41 Mɛnilu sɔnda a la kuma ma, woilu sunda ji rɔ. Mɔɔ waa sawa (3,000) ɲɔɔn lara lemɛniya jamailu kan wo lon. 42 Ii tunadiyanin tɛrɛ ye ii tolo malɔla talibidenbailu la karankan na, ka i ɲɔɔn nadɛn badenmaya rɔ, ka dɔɔnnin kɛ i ɲɔɔn fɛ, ka Alla matara.

43 Talibidenbailu tɛrɛ ye kabannako siyaman ni tɔɔmasere siyaman kɛla. Mɔɔilu bɛɛ silanni tɛrɛ wo rɔ. 44 Lemɛniya mɔɔilu bɛɛ bɛnnin tɛrɛ. Mɔɔ si ma sɔn ka a bolofenilu kɛ a kelen ta ri. 45 Wo rɔ, ii tɛrɛ ye ii la duuilu ni ii bolofenilu sanna, ka wo wodi di dɛsɛbatɔilu ma. 46 Lon lon, ii ye ii ladɛnna le Alla batobonba jin kɔndɔ. Ii la miriya tɛrɛ ye ikomin mɔɔ kelen ta. Ii tɛrɛ ye buru latalanna ii ɲɔɔnna ii la bonilu la. Ii ka dɔɔnnin kɛ, ka i ɲɔɔn sɔ kosɛbɛ. Ii ka wo bɛɛ kɛ jusu lasɛwa ba ni jusu lagbɛ le rɔ. 47 Ii tɛrɛ ye Alla tandola waati bɛɛ. Ii diyara so kɔndɔ mɔɔilu bɛɛ yɛ. Lon lon, Allabatala tɛrɛ ye mɔɔilu kisila ka woilu la lemɛniya mɔɔilu la dɛkuru kan.