Hɔrɔya Suran 3

Alla ka Musa kelaya

1 Nba, Musa tɛrɛ ye a birancɛ Rɛwɛli la kolofen mɛsɛnilu marala. A birancɛ tɛrɛ ye Madiyan bɔnsɔn na sarakalasela le ri. Awa, lon do rɔ, Musa wara kolofenilu ri kiɲɛ fufu kɔndɔ, fɔɔ ka wa se Horɛbu koyinkɛ kɔrɔ, mɛn tɔɔ le ko Alla la koyinkɛ. 2 Ka Musa to yɔrɔ wo rɔ, Allabatala la mɛlɛka ka a jɛrɛ yiraka a la jiri tunin tamɛlɛnama rɔ. Musa ka a ragbɛ. Ta ye jiri tunin na kɔni a tɛ janinna. 3 Musa miri ko: «N ye n madon a la ka kabanan ko ɲin mafɛnɛ. Nfenna jiri tunin ɲin tɛ janinna?» 4 Allabatala ka a yen tuma mɛn na ko Musa ra madon ka a ragbɛ, a tora jiri tunin dɔ ka a kan nabɔ Musa ma ko: «Musa, Musa.» Musa ka a jabi: «Naamun.» 5 Allabatala ka a fɔ ko: «I kana i madon yan na. I la sanbara bɔ i sen dɔ, baa i lɔni yɔrɔ mɛn dɔ ɲin, yɔrɔ sɛniman de wo ri. 6 N ye i fa la Alla le ri. N ye i benba Iburahima la Alla le ri, a ni i benba Isiyaka, a ni i benba Yakuba la Alla.» Musa ka a ɲakɔrɔ dokon ka a masɔrɔn a silanda ka Alla ragbɛ. 7 Allabatala ka a fɔ ko: «Misirankailu ye n na mɔɔilu tɔrɔla ɲa mɛn ma Misiran, n da wo yen. Ii la baara kuntiilu ye mɛn kɛla ii la, n da wo fanan yen ka ii kasi kan mɛn. N ka ii la tɔrɔya lɔn. 8 N da jii ka ii bɔ Misirankailu bolo, ka ii labɔ Misiran jamana rɔ, ka wa ii ri jamana ba do rɔ, mɛn ka ɲin, a duman kosɛbɛ. Damununta duman ye bɔla jamana wo rɔ a ɲa jɛrɛ jɛrɛ ma, li ni nɔnɔ a ni jiri denta su bɛɛ ye bɔla ye. Kanaanka siinin ye le, a ni Hɛti bɔnsɔn ni Amɔrikailu ni Peresikailu ni Hifikailu ni Jebusikailu. 9 Isirayɛlika kasi kan da se n ma yan. Misirankailu karagbɛlɛman ii ɲa mɛn ma, n da wo bɛɛ yen. 10 Nba, sisɛn n ye i lawala ka kuma Ferawuna yɛ. Wa! I ye i lɔ n na mɔɔilu ɲɔrɔ ka ii labɔ Misiran jamana kɔndɔ.»

11 Musa ka Alla jabi: «Nde wa? N tɛ foyi ri! N di se n lɔla Ferawuna ɲakɔrɔ di, ka n lɔ Isirayɛlika ɲɔrɔ ka ii labɔ Misiran?» 12 Alla ka a fɔ ko: «N di kɛ i kɔfɛ. I wa n na mɔɔilu labɔ Misiran jamana rɔ tuma mɛn na, ai ri na n bato koyinkɛ ɲin kan yan. Wo ri kɛ tɔɔmasere ri i yɛ ko nde le ka i kelaya.» 13 Musa ka a fɔ ko: «Ni n di wa Isirayɛlika tɛrɛn ye, n di a fɔ ii yɛ ko ii benbailu Maari ra n kelaya ii ma. Ii wa n maɲininka i tɔɔ ma don? N ye nfen fɔ ii yɛ wo rɔ?»

14 Alla ka Musa jabi: «Mɛn Ye Ye, nde le wo ri. I ye a fɔ Isirayɛlika yɛ ko ‹Mɛn Ye Ye*3.14 Mɛn Ye Ye Mɛn Ye Ye a tɔɔ ye kilila fanan Allabatala a jɛrɛ ka n lawa ai ma.› 15 I ye wa a fɔ Isirayɛlika yɛ ko ‹Allabatala le ka n kelaya ai ma, ale mɛn ye ai benba Iburahima Maari Alla ri, a ni ai benba Isiyaka ta, a ni ai benba Yakuba ta. A tɔɔ ye ten de haan ka wa habadan. Mɔɔilu kɛtɔ a kilila tɔɔ wo le la tuma bɛɛ.› 16 I ye wa Misiran. I wa se ye, i ye Isirayɛlika la mɔɔbakɔrɔilu ladɛn ka a fɔ ii yɛ ko: ‹Maari Allabatala ra a jɛrɛ yiraka n na. Ko a ye ai benbailu Maari Alla le ri, Iburahima ta a ni Isiyaka ta ni Yakuba ta kɔnin. A fɔ ko: «Mɛn bɛɛ ye kɛla ai la Misiran, ko n da wo yen. 17 Ko wo le rɔ, n ka a fɔ ko n di ai labɔ tɔrɔya rɔ Misiran, ka wa ai ri jamana do rɔ, Kanaankailu ni Hɛti bɔnsɔnilu ni Amɔrikailu ni Peresikailu ni Hifikailu ni Jebusikailu siini jamana mɛn kɔndɔ, dɔɔnninta duman ye bɔla jamana wo rɔ a ɲa jɛrɛ jɛrɛ ma, li ni nɔnɔ a bɛɛ ye bɔla ye.»›

18 «Isirayɛlika di la i la kuma la ka wo mira. I ni Isirayɛlika la mɔɔbakɔrɔilu ri wa Misiran mansa tɛrɛn ye, ka a fɔ a yɛ ko: ‹Heburuilu Maari Allabatala ra an nabɛn. Ko wo rɔ, ko an ye Ferawuna madiyala ko i ye an bila, kosa an di tele sawa kɛ taamana kiɲɛ fufu kɔndɔ ka wa ka saraka bɔ an Maari Allabatala ma.› 19 N ka a lɔn fewu ko a ti nala sɔnna ka ai bila na n ma diyagboya fanka la a kan. 20 Wo le rɔ, n di n wuli Misirankailu kanma ka n na sebaya yiraka ii la. N di kabannakoilu kɛ, mɛnilu ri tɔrɔya su bɛɛ la ii kan. N wa ban woilu kɛla, Ferawuna ri ai bila sa ai ri wa. 21 N jɛrɛ ri a kɛ, Misirankailu ri ai bonya. Wo rɔ, ai bɔtɔla ye, ai bolokolon ti nala bɔla ka wa. 22 Isirayɛlika muso kelen kelenna bɛɛ ri a siiɲɔɔ muso Misiranka matara a ni Misiranka muso mɛn siini a la bon kɔndɔ fen mɛnilu dannin sanin ni wodigbɛ la, a ni faaninilu la. Aile, Isirayɛlika ri faanin ni masidifen woilu bila ai dencɛilu ni ai denmusoilu kan na. Ai ye Misirankailu bolokolonyala wo ɲa ma.»