1 Awa, Isa ni a la karandenilu bannin dala tɛɛla, ii sera Kerase mara rɔ. 2 Isa jiinin ka bɔ kulun kɔndɔ, cɛɛ jenatɔlamɔ do bɔra kaburu so la i kɔrɔ ka na a labɛn. 3 Cɛɛ wo siinin kaburu so la ye. Mɔɔ si tun ti se a sidila butun. Hali ni mɔɔilu ka a sidi jɔlɔkɔ la, a ri wo tɛɛ. 4 Baa mɔɔilu ka a boloilu sidi jɔlɔkɔ la, ka a senilu don siɲa siyaman nɛɛ la. Kɔni a ka jɔlɔkɔilu tɛɛ, ka nɛɛ kadikadi. Fanka tun tɛ mɔɔ si la ka a lamara ka a kɔnɔgbɛn. 5 Su ni tele a tɛrɛ ye kulela ka a jɛrɛ madimin kabakudunilu la kaburu so la, a ni koyinkɛilu kan.

6 Awa, a ka Isa yen tuma mɛn na ka a to yɔrɔ jan, a ka a bori ka na a tin birin duu ma a kɔrɔ. 7 A kulera kan ba la ko: «Ile Isa, Alla Kɔrɔtaninba Dencɛ, i ye n to ye! N ye i madiyala Alla tɔɔ rɔ, i kana n tɔrɔ.» 8 A ka wo fɔ, ka a masɔrɔn Isa tun ka a fɔ a yɛ ko: «Jena, i ye bɔ cɛɛ ɲin fɛ.» 9 Isa ka a maɲininka ko: «I tɔɔ di?» A ka Isa jabi: «N tɔɔ le ko Jama Ba, baa an ka siya.» 10 A tora Isa madiyala ko a kana ii gbɛn ka bɔ mara rɔ ye.

11 Wo ka a tɛrɛn kɔsɛ kuru ba ye dɔɔnninna tindi la ye. 12 Jenailu ka Isa madiya ko: «I ye an nawa kɔsɛilu tɛma sa an di don woilu rɔ.» 13 Isa diɲɛra. Jenailu bɔra cɛɛ wo fɛ ka wa don kɔsɛilu rɔ. Wo rɔ, kɔsɛilu bɛɛ ka ii bori ka jii tindi la ka wa don dala ji rɔ. Ii bɛɛ tɔra ji rɔ. Ii tun di kɔsɛ waa fila (2,000) ɲɔɔn bɔ.

14 Wo kɛnin, kɔsɛgbɛnnailu ka ii bori ka wa wo kibaro fɔ so kɔndɔ mɔɔilu ni toda kɔrɔ mɔɔilu bɛɛ yɛ. Mɔɔilu wulira ka na ko woilu ragbɛ diya. 15 Ii senin Isa ma, ii ka jenatɔlamɔ kɔrɔ siinin yen, jena siyaman tɛrɛ ye mɛn fɛ kɔrɔman. Durukiba ye a kan na, a mafanin. Wo rɔ, ii bɛɛ silanda.

16 Nba, ko woilu kɛra mɛnilu ɲana, woilu tora a lakalila mɔɔilu yɛ mɛn kɛra jenatɔlamɔ la, a ni mɛn kɛra kɔsɛilu la fanan. 17 Mɔɔilu ka ko woilu mɛn tuma mɛn na, ii wulira ka a kɛ Isa madiya ri ko a ye bɔ ii la mara rɔ ka wa.

18 Isa dontɔla kulun kɔndɔ, jenatɔlamɔ kɔrɔ ka a madiya ko a ye a fɛ ka bila Isa kɔfɛ. 19 Isa ma sɔn; kɔni a ka a fɔ a yɛ ko: «Wa i wara, ka i la denbayailu tɛrɛn ye. Maari ra mɛn kɛ i yɛ, i ye wo bɛɛ lakali ii yɛ, ka a fɔ ii yɛ a ra kininkinin i ma ɲa mɛn ma.» 20 Wo rɔ cɛɛ wara. Isa tun ka mɛn kɛ a yɛ, a ka wo bɛɛ lakali damira Dɛkapɔli mara rɔ. Ko woilu ka mɔɔ bɛɛ kabannakoya.

21 Isa ka dala tɛɛ tuma mɛn na, jama ba nara a tɛrɛn dala dala ye. 22 Ka ii to ye, salibon kuntii do nara mɛn tɔɔ ko Jayirusi. A ka Isa yen tuma mɛn na, a ka a be a sen kɔrɔ 23 ka Isa madiya kosɛbɛ ko: «N denmusonin satɔla le. I jaandi, i ye na ka i bolo la a kan sa a ri kɛndɛya ka to a nii la.» 24 Isa ni ale wara. Jama ba bilara ii kɔfɛ fɔɔ ka Isa ragbɛrɛn ii tɛma.

25 Wo ka a tɛrɛn muso jankarɔtɔ do ye ye. Wo ra san tan ni fila kɛ jelibɔ jankarɔ ye a la. 26 A tun da tɔrɔ kosɛbɛ dandalila siyaman bolo. A bolofen bɛɛ ra ban. Kɔni a la jankarɔ ma nɔya fɔɔ ka juuya. 27 Muso wo tun ka Isa kibaro mɛn. Wo rɔ, a nara don jama tɛma Isa kɔfɛ ka a maa a la duruki la, 28 baa a tɛrɛ a mirila a jɛrɛ kɔndɔ ko: «Ni n sera n maala a la duruki gbansan na, n di kɛndɛya.» 29 A ka a maa mɛn kɛ Isa la duruki la, a la jelibɔ lalɔra i kɔrɔ. A ka a lɔn a fari rɔ ko a ra kɛndɛya. 30 Isa ka a lɔn a jɛrɛ ma kelendi ko sebaya do ra bɔ a rɔ. A ka a kɔfɛnɛn jama tɛma ka a fɔ ko: «Yon de ka a maa n na duruki la?» 31 A la karandenilu ka a fɔ ko: «A ragbɛ, jama ye i ragbɛrɛnna ii tɛma. I ri se a fɔla wo rɔ ko ‹Yon ka a maa n na?» 32 Kɔni Isa ka a ɲalakalan a laminin dɔ, sa a ri wo tii yen. 33 Muso ka a lɔn mɛn kɛ. Wo rɔ, a nara a be Isa sen kɔrɔ ka a gbɛ a yɛ. A silannin fɔɔ ka yɛrɛyɛrɛ. 34 Isa ka a fɔ a yɛ ko: «N denmuso, i ra kisi ka a masɔrɔn i lemɛniyara n ma. Wa jususuma rɔ, i ra kɛndɛya i la jankarɔ rɔ.»

35 Ka Isa to kuma wo la, mɔɔ doilu nara ka bɔ salibon kuntii Jayirusi wara. Ii ka a fɔ Jayirusi yɛ ko: «I denmuso ra sa, i kana karanmɔɔ tɔrɔ butun.» 36 Isa ka kuma wo mɛn, kɔni a ka a fɔ salibon kuntii yɛ ko: «I kana silan, i ye lemɛniya n ma dɔrɔn.» 37 Isa ma sɔn mɔɔ si ye wa a malɔ fɔɔ Piyɛri ni Yakuba ni Yakuba dɔɔcɛ Yuhana. 38 Nba, ii senin salibon kuntii wara mɛn kɛ, Isa ka mankan tɛrɛn ye. Mɔɔilu ye kasila, ka kule bakɛ. 39 Isa donda bon na ka a fɔ mɔɔilu yɛ ko: «Nfenna ai ye mankan nabɔla? Nfenna ai ye kasila? Den sanin tɛ, a ye sunɔɔ le rɔ.»

40 Mɔɔ woilu ka a lafɛya. Kɔni a ka ii bɛɛ labɔ kɛnɛma. Wo kɔ rɔ, a ka den fa ni a na ta, a ni mɛnilu ye a tɔrɔfɛ ye. Ii donda bon kɔndɔ, den su lanin mɛn kɔndɔ. 41 Isa ka den mira a bolo ma ka a fɔ a yɛ ii la kan dɔ ko: «Talita kumi.» Wo kɔrɔ le ko: «Sunkurunnin, n ye a fɔla i yɛ ko i wuli.»

42 Sunkurunnin wulira i kɔrɔ ka a kɛ taamataama ri. Ii bɛɛ kabannakoyara, fɔɔ ka a dan natamin. Den sɔrɔn tun da san tan ni fila bɔ. 43 Isa ka a fɔ ii yɛ ka a magbɛlɛnya ko ii kana ko wo fɔ mɔɔ si yɛ. A ka a fɔ ko ii ye dɔɔnnin di den ma.