1 Mɔɔ bɛɛ ye kolo mansailu ma. Ka a masɔrɔn mansaya si tɛ ye, mɛn ma fara Alla la. Mansa mɛnilu siinin, ale le ka woilu sii. 2 Wo le rɔ, mɛn wa murunti mansailu ma, wo muruntinin Alla la fen suwandinin de ma. Mɛnilu wa a kɛ, woilu ri kiti lana ii jɛrɛ ma. 3 Koɲuma gbɛngbɛnna tɛ silanna mansailu ɲɛrɔ, kɔni fɔɔ kojuu kandanna. I ye a fɛ i kana silan mansa ɲɛrɔ wa? Wo rɔ, koɲuma kɛ kosa a ri i matɔɔ. 4 Baa a kɛnin Alla la baaraden de ri kosa a ri koɲuma kɛ i yɛ. Kɔni ni i ka kojuu kɛ, silan a ɲɛrɔ! Baa fanmuru sa a bolo rakolon kan. Alla la baaraden de a ri mɛn ka a la mɔnɛ lajii kojuu kandanna ma, ka a la kojuu sara a la. 5 Wo le rɔ, fɔɔ ai ye kolo le mansailu ma, ko ii kana i ɲakankatan, wo tɛ gbansan, kɔni ka a la wo kan fanan kosa i kana i jɛrɛ jalaki i hankili rɔ.

6 Wo le rɔ, ai ye mudu sara, baa mɛnilu ye ii lamirala, woilu ye Alla la baarala le ri, mɛn ye a la mansaya baara kɛla. 7 Ai ye mɔɔilu la juluilu sara. Ai ka kan ka mudu su su di, ai ye wo di. Ni ai bolofenilu mudu le a ri, ai ye wo di, ni gbiliya le a ri, ai ye wo di, ni kunnafulen de a ri, ai ye wo di.

8 Mɔɔ si la julu kana to ai la, fɔɔ kaninteya ai ka kan ka mɛn namara ai ɲɔɔn yɛ. Mɛn wa a siiɲɔɔ kanin wo ra sariya dafa. 9 Baa jamariilu ka a fɔ ko, «I kana kaninkɛ, i kana mɔɔ faa, i kana suɲali kɛ, i kana nata,» a ni jamarili tɔ bɛɛ kuma lasudunya rɔ, «I ye i mɔɔɲɔɔ kanin ikomin i jɛrɛ.»*13.9 A ragbɛ Hɔrɔya suran 20 kuma diya 13 haan 17 ni Sariyailu suran 5 kuma diya 17 haan 21 ni Sarakalaselailu suran 19 kuma diya 18 kɔndɔ. 10 Kaninteya tɛ sɔn kojuu ma i mɔɔɲɔɔ ma muumɛ! Kaninteya le sariya bɛɛ lakanbalila.

11 Ai ye wo kɛ, baa ai ka waati ɲin lɔn. Waati ɲin da na ai la kunun diya sunɔɔ rɔ, baa an na kisi waati ra sudunya ka tamin an na lemɛniya damira waati la. 12 Su ra janfa, banda ka rasudunya. Wo rɔ, an di an ban ko woilu rɔ mɛnilu ye kɛla dibi rɔ, ka an masidi kɛnɛma kɛlɛkɛfenilu la. 13 An ye taama ikomin mɛn dahanin, ikomin a bɛnnin kɛnɛ ma ɲa mɛn ma. An kana tolon haramunnin kɛ wala ka to an ɲa lamininna, an kana kaninkɛ wala ko haramunninilu, an kana bɛnbaliya wala keleya kɛ. 14 Fɔɔ ai ye Maari Isa Ɲenematɔmɔnin ta ikomin ai la duruki. Ai kana to ai mirila ai faribanku diyanan koilu kɛtailu ma.