1 Andeilu mɛnilu fanka ka bon lemɛniya rɔ, an ka kan ka diɲa woilu kɔrɔ fanka tɛ mɛnilu la lemɛniya rɔ. An kana an jɛrɛ diyanan ko kɛ, 2 fɔɔ an ye an mɔɔɲɔɔ diyanan ko le kɛ, ka ɲumaya a la, ka a lasabati lemɛniya rɔ. 3 Baa Ɲenematɔmɔnin tɛ a diyanan koilu kɛla, kɔni ikomin a sɛbɛnin Kitabu rɔ ɲa mɛn ma ko, «Ii ye i nanin mɛnilu kɛla, woilu ye sela nde le ma.»*15.3 Yaburi suran 69 kuma diya 10 4 Baa mɛn bɛɛ sɛbɛnin waati taminniilu rɔ, woilu sɛbɛnin an karan ko le la kosa, tunadiya ni Kitabu la sɛɛbɛ don na ko kosɔn, an ye jii sɔrɔn. 5 Alla mɛn ye tunadiya ni sɛɛbɛ don dila, wo ye ai dɛmɛn, ai miriyailu ye kɛ kelen di ai ɲɔɔn yɛ, ka woilu bɛn Ɲenematɔmɔnin Isa kɛɲa ma, 6 kosa ai ye Alla gbiliya miriya kelen ni kan kelen dɔ, an Maari Isa Ɲenematɔmɔnin fa.

7 Ai ye ai ɲɔɔn damira Alla la gbiliya la ko rɔ, ikomin Ɲenematɔmɔnin ka ai ramira ɲa mɛn ma. 8 N ye a fɔla ai yɛ, Ɲenematɔmɔnin da kɛ Judiyailu la baaraden di Alla la tuɲa la ko kosɔn, kosa Alla ka an benba kelalasela fɔlɔilu lahidi mɛn na, a ye wo fanka don, 9 kosa siya gbɛrɛilu fanan ye Alla gbiliya a la kininkinin na ko rɔ, ikomin a sɛbɛnin Kitabu kɔndɔ ɲa mɛn ma ko, «Wo le rɔ, n di i tando siyailu tɛma, ka i tɔɔ gbiliya kalaman dɔ.»*15.9 Samuwɛla suran 22 kuma diya 50 ni Yaburi suran 18 kuma diya 50 10 A ka a fɔ fanan ko, «Siyailu, ai ni Alla la jama ye sɛwa ai ɲɔɔn fɛ.»*15.10 Sariyailu suran 32 kuma diya 43 11 A ka a fɔ fanan ko, «Siyailu bɛɛ ye Maari tando! Jamailu bɛɛ ye a tando!»*15.11 Yaburi suran 117 kuma diya 1 12 Awa, Esayi fanan ka a fɔ ko, «Jɛsɛ bɔnsɔn di wuli ikomin jiri lulu mɛn ye a matɛɛla, ka fanka sɔrɔn siyailu kun na. Siyailu ri ii jii la a rɔ.»*15.12 Esayi suran 11 kuma diya 10

13 Nba, Alla mɛn ye jii tii ri, wo ye ai lafa sɛwa ni jususuma bɛɛ la ai la lemɛniya rɔ kosa ai jii ye to makafula Alla la Nii Sɛniman na fanka baraka rɔ.

14 N badenmailu, nde jɛrɛ lanin a la ko ai fanin ɲumaya ni lɔnnin bɛɛ la, a ni ai ri se ai ɲɔɔn karanna. 15 Kɔni n da n jusulatɛɛ ka ko doilu sɛbɛ ai ma, kosa n ye a labila ai la Alla la hina la ko rɔ, 16 ko n ye kɛ Ɲenematɔmɔnin Isa la baaraden di siya gbɛrɛilu yɛ. N ka kan ka baara ikomin sarakalasela mɛn ye Alla la kuma Kibaro Ɲuma lasela kosa, siya gbɛrɛilu ye kɛ saraka ɲuma ri Alla yɛ, ka lasɛninya Alla la Nii Sɛniman fɛ. 17 Wo rɔ, n di se n wasola Ɲenematɔmɔnin Isa rɔ n na baara la ko rɔ Alla yɛ. 18 N ti nala susu kuma si fɔla fɔɔ n ka mɛn kɛ Ɲenematɔmɔnin baraka rɔ, ka siya gbɛrɛilu kɛ Alla la kuma miralailu ri n kɛwaliilu ni n na kumailu fɛ, 19 a ni fanka tɔɔmasereilu ni kabannakoilu Alla la Nii Sɛniman fanka baraka rɔ. Wo le rɔ, ka damira Jerusalɛmu so ma haan ka wa sii Iliri jamana la,*15.19 Iliri jamana ye Kirɛki jamana tele kankan bolo maran le ma. n da Ɲenematɔmɔnin na Kibaro Ɲuma lase wo yɔrɔ bɛɛ rɔ haan ka dafa. 20 Wo rɔ, kunnafulen de wo ri nde yɛ, n ye Isa la Kibaro Ɲuma lasela wo yɔrɔilu rɔ Ɲenematɔmɔnin na ko tɛrɛ ma lɔn yɔrɔ mɛnilu rɔ, kosa n kana bon lɔ mɔɔ gbɛrɛ la bon ju siinin kan. 21 A sɛbɛnin Kitabu rɔ wo ɲa le ma ko, «A la ko tɛrɛ ma fɔ mɛnilu yɛ fɔlɔ, woilu ri a yen de. Mɛnilu tɛrɛ ma a la ko mɛn fɔlɔ, woilu ri a famun.»*15.21 Esayi suran 52 kuma diya 15

22 Wo le ka n wa ko tiɲan ai wara siɲa siyaman. 23 Kɔni sisɛn, n na baara ra ban jamana ɲinilu rɔ. Wo le rɔ, kɛbi san siyaman a lɔɔ ba tɛrɛ ye n na ka wa ai tuwa diya, 24 n ka a miri n ye wo kɛ n wa kɛ wala Sapen jamana rɔ waati mɛn na. N tɛrɛ ye a fɛ ka ai yen n wa kɛ taminna, ko ai ye n dɛmɛn n na taama rɔ, ka waatinin kɛ ai tɔrɔfɛ, ka wa wo jamana rɔ. 25 Kɔni sisɛn, n ye wala Jerusalɛmu so kɔndɔ, ka wa jama sɛniman dɛmɛn ye. 26 Baa a ra Masedonikailu ni Akayakailu hɛnɛ, ii ye ii bolo ladɛn bolokolonilu la ko rɔ jama sɛniman tɛma Jerusalɛmu so kɔndɔ. 27 A ka ii hɛnɛ le ii ye wo kɛ, kɔni a tuɲa bolo ma julu ye ii la. Baa ni siya gbɛrɛilu ra Judiyailu la dina duwawuilu sɔrɔn, siya gbɛrɛilu fanan ka kan ka Judiyailu dɛmɛn ii bolofenilu la. 28 N wa ban ko ɲin na waati mɛn na, ka a tɔnɔ don ii bolo, n di tamin ai wara n wa kɛ wala Sapen jamana rɔ. 29 N ka a lɔn fewu, ko n wa kɛ wala ai wara waati mɛn na, n watɔ Ɲenematɔmɔnin na duwa dafanin de rɔ.

30 N badenmailu, n ye ai madiyala an Maari Isa Ɲenematɔmɔnin dɔ a ni Alla la Nii Sɛniman na kaninteya rɔ, ai ye ai raja, ko an ye Alla matara n na ko rɔ kelen di. 31 Ai ye Alla matara n yɛ kosa a ye n kunka Jude lemɛniyabaliilu ma, a ni n ye baara mɛn kɛla Jerusalɛmu so kɔndɔ, wo ye diya jama sɛniman yɛ ye. 32 Wo rɔ, ni Alla sɔnda, n di na sɛwa rɔ ai tɔrɔfɛ, an bɛɛ ri ɲɔɲɔli sɔrɔn an ɲɔɔn fɛ. 33 Jususuma Alla ye to ai bɛɛ fɛ. Amina.