1 Ala gbami byoni ami ya gbo Okristi ni.

2 Nyya shala iye ikweyi koni ipu kishi kpiri ala ba rela hin kpozafofu ni nfala ni.

3 Nke ya yimu shini ala gye mo Okristi woteyi ko ongo, oba woteyi konya nu, kweyi Owuso wo teyi ko Okristi. 4 Mani oni Ongo ni ya tinarigwu kwe ya tono kela ko Owuso kpikweyi gwogwu ebe ko geyagye ese ogbo Okristi owuru la. 5 Mamani onya ni ya tinarigwu kwe ya tono ko Owuso kpikweyi gwogwa ebe ko geyagye ese ogbo obunu owuru; olema byo onya noweyi oni la. 6 Owoni onya ya yikweyi nu gwu lo, ona yinyeyi wa; kweyi owoni owoza kiweyi donya ko yinyeyi wa, onya yikweyi gwu. 7 Oshoshi sho ongo na yikweyi nu gwu lo, ikweyi koni Owuso yo ongo lema byo oyi kpi igyashi ko Owuso; onya ke lema byi igyashi ka asuse; 8 ikweyi koni ayo Ongo bwipu ko onya lalo, ayo onya ke bwipu ko ongo la; 9 Owuso yo ongo donya lalo, oke yonya do ongo la. 10 Ni olemani oni, ebe kayoleho, onya shu ko gbozagbeyi ikweyi nu oni ya sayi mobu nu gboshu ikweyi nu.

11 Ipu ko yagye ka ebe ka Adole, onya na ka kamo ongo gboshu ikweyi nu lo, kwe ongo naka kamo onya gboshu ikweyi nu lo. 12 Byoni ayo onya bwipu ko ongo ni, mamani onya pini mongo la; ojoji kpiri ke bwebe ko Owuso. 13 Ala kepwo mani abiyikala; Oshoshi shini onya na tinarigwu do Owuso ipu kese kpikweyi gwogwa? 14 Ipu ko yagye kaha oshoshi koni ongo ya shinyeyi nu bita na fu shoshu lo, owoza kiweyi, 15 Inyeyi ikweyi konya ke wigyashi nu la. Inyeyi nwashika ni yikweyi konya ni ada nu ko le byo ozagbeyi la. 16 Owoni ashe ya yimu ko tawashu ikweyi kela mani, oza ni ngbo koka ni yoma aha kwe oda ko bo Owuso ono kwe odu oyoye ko geyagye gwomani ta lo.

17 Ipu ka akpaha pyopyi, nyya shiyala iye lo, ikweyi koni ogbayi kala ko geyagye ya yebe ishi sho oneshi. 18 Ikyikyo, aka dami mo ala ba yiyikala kikpo ipu kogbayi kala; nggye mo owo kwokwoshi la. 19 Ogbawashu lo owo tiri shini ala yiyikala kikpo shini awase ni ba yoneshi ni ana muwa neshi. 20 Ishini ala gbayi ko odudu, oza rore ka Adole pini ala ba re lalo. 21 Ishini ala ba re ni, ananoho takirikwu zakakanu ganu, ase shishini ba ngmemye, ase shishini gwinyi ba ya. 22 Ala gbole kala ko re ki gwa lo? Kwe ala moda ko bo Owuso gyiyi lo kweyi tawase ni woleha ni iweyi la? Oji ni ala ba yimu mo naka dala ikweyi koza mani? Na shiyala iye? Aayi nyya gege lo!

23 Ikweyi koni oza ni nfala ni bwebe ka Adole la nkamo: Adole Oyesu, otu ni ayora ni, ozi ikyoga, 24 kweyi keshi ko Owuso, ofa, kamo, <<Omani wikpiye hin la, ni dala ni. Ala ya mani shini ala rela hin.>> 25 Mamani, itikpi koza rore ko onose oki zabwa kweyi kamo, <<Abwa mani wokoyi pepe ipu koyi hin. Ishi kpiri ni ala ba gwa bwipu kabwa mani, ala ya mani shini ala rela hin.>> 26 Omani ya sayi mo Kpiri kishi ni ala ba hi ikyoga mani kweyi ba gwa kpa abwa mani, ala ba tono ki ikwu ka Adole yoma gbishi ni oya wa.

27 Mani oni oya shaha mo, kpiri kase ni hikyoga kwe gwabwa ka Adole owe ni gyogye lo, ogbepwo kikpiye kpoyi ka Adole. 28 Ni ole mani, Ananoho na gyiyi nu ma ome ona hikyoga na ki gwa abwa mani. 29 Ikweyi koni ase ni ha kyi gwa gbo gyela kikpiye ka Adole lo, okwiyiyinu epwo oma bwebe ko hoha kpo gwogwa. 30 Ozani yase nwashika ipu kala ba gbere kweyi loshu lo, kweyi nwashika gekwu. 31 Owoni abi kwobonu gyiyika ma la, epwo ko Owuso biya kwaha lo. 32 Ishini Adole ke kwahepwo kweyi daha owe okyahatu, shini ahan ka gekwu kpese lo.

33 Mani oni, ayene hin, ishini ala gbayi ko roza ko onose ka Adole, ala gbeyi kiyikala shini ala re gyogye. 34 Owoni emye ya ngmashe, ona roza bwole, shini Owuso ka mobibi kala ishini ala gbayi dudu ni lo.

Ikweyi koza ashini, nwwa nyya wa gohobu ko fala.