1 Nyya abo ki iyun lalo? Nwwo oyikoko ko Oyesu lalo? Nmo Oyesu Adole kaha lo? Ala wa awogboso ikweyi koko hin ni nyya da Adole ni lalo? 2 Owoni nwwo oyikoko ko Oyesu ebe kase ashini lo, ogbawashu lo nwwe ebe kala! Ikweyi koni olayi kala rema dudu kpa Adole ala abiyikala wolobene ko oyikoko ko Oyesu ni nwwe ni.

3 Owoni ase ba kwumepwo, owe ni nyya nyepwo ki iyun ni yoma. 4 Ngboshu koni ala ba damo ozarore kwi inyi ko gwogwa ko oko hin lo? 5 Ngboshu ko gbo onya ipu ka awogboso shini na bi giyawu kpanu byoni ayikoko ko Oyesu ashini kpa ayene ka Adole kpo Obitrus ya ni lo? 6 Kwe ami kpo Obarnabas kin pi shu ko yoko ome shini ahan pyoza ko yagye kaha la?

7 Anoho ya yo oko ka adakare kweyi ya siyinu ore? Anoho ya sheho kweyi ya hogwogwa kefu keho nu lo? Anoho ya gwo obize kweyi ya gwinyi kame wa lo? 8 Nyya hagye ikweyi kawoza ni ba gbodagye kurutu mani lo, ikweyi koni ngye mo Ono ko oje kponu. 9 Aha maka ipu ko Ono ko Omusa mo, <<Ka yo okwunu ke ena gbo ishini oya kyizire ni lo.>> Anani, ela ka awena mani pini shiwo ko Owuso la? 10 Okela mani ikweyi kaha lalo? Ko kwokwoshi atoza mani ikweyi kaha la. Ase ni tizire kpase ni kyizire ni aya mani koni ayiyi tagye ko pyi ingbo ki izire la. 11 Aha ti izire ko Omaku ipu kala. Oya shoshu koni aba kyi izire ki ikpiye ebe kala ni? 12 Owoni ashishini kase gboshu ko doka koza abo kala, ala mamo agboshu shuwa lo?

Aha ke yoko kposhu mani lo. Abishi koni, aha zotu kpo ojoji kpiri shini ojije naka wobi koshu neshi ko Okristi lo. 13 Ko kwokwoshi ala gye mase ni ba yoko ipu kole ko Owuso ni ba pyo ozarore wa bwipu kole ko Owuso, kweyi ase ni ba peshi okpe ni ba pyozarore wa bwebe koza ni ayipa ni la. 14 Mamani, Adole kamo ase ni ba tono ko oshu neshi ni na pyozarore wa bwebe koshu neshi ni na pyoza ko yagye wa bwebe ko oshu neshi.

15 Ami ke doka shala dami ojije lo, kwe tawoza mani shini na nyoza ni wakakahin ni lalo. Oya shashi shini na gekwu, koni ashe ya wumobi ko gwabotu mani ni! 16 Ngboshu ko gwabotu lo ikweyi koni nyya tono koshu neshi ni. Gwejeji, Owuso pini yun mo na tono koshu neshi la. Ebi na tun owoni ntela ko tono koshu neshi! 17 Owoni nyyo oko hin kpotu oye kponu, nyya yi iyitagye ko pyabola; owoni nke ya kpotu oye kponu lo, nyya yo oko ni Owuso mo na ya ni kin la. 18 Oji wa abola hin ome? Abola hin wako tono ko Oshu Neshi ko yeye, nyya nya abola oyoye ebe ko tono koshu neshi lo.

19 Nwwo oshe lalo, nke wo oshe kashishe lo; nziyun shina wo oshe kananoho, shini na byase nwashika webe nu. 20 Ishini nyya yoko kpase ko Oyahuda ni ngboso odu kase ko Oyahuda shini na byuwa webe nu. Koni nyya geyagye do Ono ko Omusa lo ni, nyya byase ni ya geyagye do ono ko Omusa, shini na yuwa na kyogwu kpa mi. 21 Mamani, ishini nyya yoko kpawase ni wase ko Oyahuda lo ni, nyya byo nwwase ko Oyahuda lo, shini na pya awase ni wase ko Oyahuda lo ni. Omani ya wumobi ko geyagye do Ono ko Owuso lo; ko kwokwoshi nyyipu ko ono ko Okristi. 22 Ebe kawase ni loshu ipu kotuse lo ni, nyya byase ni loshu ipu kotuse lo ni, shini ana kyogwu kpa mi. Mani oni nwwoza kpiri dase kpiri, shini na ngmashini wa bwowe wonyonya ni nyya gege ni.

23 Nyyoza mani kpiri ela ko oshu neshi, shini na pyaboneshi nu.

24 Ko kwokwoshi Ala gye ma awonyinya nwashika ba myenya, ashe oye kpokponu pini ke ya pya abola la. Mani oni ala nyinya, owe ni ala ba pyabola ni.

25 Awomyenya kpiri owotiri ko gboso ono kenya nyonye, Aba ya mani ko pyo otu ni ya gbeji lo ni; aha ke ba ya ko pyo otu ni ya rese ko gbogbo-gbogbo ni. 26 Mani oni, nyya nyinya waya waya lo; nyya nonu byase ni ya gwo owu ni lo. 27 Nyya gwi ikpiye hin kweyi yo woshe hin, shini itikpi ni ntono dase ashini ni, ana ka wa yun ngma tese lo.