1 Ayene hin, kokwokwoshi, ngege kela kpala byawase ni gbo Omaku ni lo; nke kela kpala byawase ni wa kese mani, byayi leke ipu ko otuse ko Okristi. 2 Ndala inyi ka ame la, wozarore loshu lalo, Ikweyi koni ala gye ko roza loshu walo. Kwikyikyeni ala gye walo. 3 Ikweyi koni Ala tayoyo ba yoza byase ni wa kese ni. Koni ala gbifu kpokpo kpapwo gbogbo kpiyi kala ni, omani sayi mo ala wa kese mani ona lo? Ni ala ba gbosoza yoya kese ni! 4 Owoni ashe kala mo, <<Nwwa ko Obulus,>> ashe ke mo, <<Nwwa ka Apolos,>> Ala baya byawase ni wa kese ona lo?

5 Gwejeji nyya dala oka, Anoho wa Apolos? Kwe anoho wo Obulus? Awayole ko Owuso kin la, ni ala kyogwu bwebe kaha bwebe kaha ni. Ananoho kaha ya yoko na Adole danu ko ya ni la: 6 Ami shizire, Apolos shinyawo anu, Owuso pini ke yo gye la. 7 Ase ni shi ni, kase ni shinyawo anu ni wojije lo, Owuso fufu nu pini woza la, anu ni yoza gye ni. 8 Ase ni shi ni, kpase ni shinyawo anu ni ya ikweyi koje kponu la; Owuso yada ananoho wa abola byoza ni oko wa naya we ni. 9 Ikweyi koni awa rema dudu ebe koyoko ko Owuso, ala ke weho ko Owuso. Ala kyi woda ko Owuso.

10 Nyyoko kpeshi ni Owuso dami ni, nshikpo ko oda nyyo ko kpeshi hin byase ni gyishi ko moda neneshi ni, ashe hoha wa moda ikweyi nu. Ananoho na ke gbera kpabo ni oya ma ni. 11 Ikweyi Koni Owuso kwobonu yo Oyesu Okristi fufunu pini wikpo koda ni la, ashishe ya shikpo koda oyoye kelo. 12 Ashishini ba yoko kpozinariya, azurupa, kwe ikyikpo ni gbakwekye ni ko moda ikweyi kikpo ko oda ni ashe ni; Ase ashishini ba ma kpo efu, kwe eko, kwe anangbla. 13 Aba moneshi koko kananoho Eno ko wowa ko Okristi. Koni Eno oni Ola ya sayi oko kananoho; kweyi ola mani ya mo oneshi koko ka ananoho ma. 14 Owoni oza ni ama ni yola lo, ase ni ma ni ya pyabola nu. 15 Owoni oko wo ke yola, ishi ya yo; anu abiyinu aba ngmanu, oke ya le byase ni bose bwo ola ni shishi.

16 Ala gye mala abiyikala wole ko Owuso kweyi Omaku ko Owuso yipu kala! 17 Ase ni yo ole Owuso yishi Owuso ya yo ishi mamani. Koni ole ko Owuso wo sere, ala pi wole ni la.

18 Ala ka gyiyikala egya lo. Owoni ashe kala ya ma manu ziyi kpoza kese mani, ona wikyo shini ona ziyi kokwokwoshi. 19 Ikweyi koni oziyi kese mani wikyo ebe komoma ko Owuso la. Byoni okpa ko Owuso ka, <<Owuso kwa winoziyi ipu kegya wa.>> 20 Okpa ki kamo, <<Adole gye kamo ela kotu kawino ziyi wela yeye la.>> 21 Ni olemani oni ashishe naka gwabotu kpoza ni asuse yani lo. Kwokwoshi ojoji wakakala la: 22 Obulus, Apolos kpo Obitrus; ese mani, kwo olayi kwi ikwu, kwe oza kanani kwe akohobu; kpiri wakakala la, 23 mamani ala wa ko Okristi, Okristi wa ko Owuso.