1 Nabani, ikweyi koza ni yala tokpa ni.

Ongo yoza neshi ko gbonya lo. 2 Ikweyi koni eba boba ke shoshu ni, ongo wonyonya na gbonya nu, mamani onya wonyonya na gbobu nu. 3 Oba na yoza ni oshu ko yoya ni, mamani onya na yoza ni oshu ko yoya ni, kpiri wa ana yiwa otusha. 4 Ikpiye ko onya wa ka nu lalo, ikpiye nu ke wa kobu nu, mamani la ikpiye koba wakakanu lalo, oke wa konya nu la. 5 Ala ka wiyikala obi lo, sala kyogwu dudu ko kwiyikala kishi gbayayi shini ala ziyi kala dinarigwu tota; Itikpi koni ala ki kwikye gbayi lalo Ibiri ya malama koni ala gege ko kwiyi kala lo ni. 6 Oza ni nka mani wo ono lalo, ami pini kala. 7 Kokwokwoshi nbiya yimu mo ananoho kala na le byoni nwwe ni. Ananoho ke gbeshi ni Owuso danu ni, ashe gbeshi oye, ashe ke gboye hoha.

8 Anani, nyya ka dala ni gbonya kwoba walo kpa anyokwu, oshoshi shini ana bagye fufuwa byami. 9 Owoni ake ba gege ba kwiyiwa lo, ana gbonya kwoba, koni oshoshi kogbonya kwoba sho mehe kanya kwango.

10 Awase ni ke gboba, kwo onya ni, nyya dawono mani bwebe hin lalo ke wa ka Adole; onya naka kabo kpobu nu lo. 11 Owoni oke kabo, owotiri koni oya yagye fufunu kwe ona kwikye gebe kobu nu. Kweyi oba naka kabo kponya nu lo.

12 Nyya ka dase ashini mo (Ami, abiyun pini kala, Adole lalo) owoni oyene oye gbonya ni gyo Owuso lo ni kweyi anonya gbimu ko yagye kpanu, onaka kabo kpanu lo. 13 Mamani owoni onya oye gboba ni gyo Owuso lo ni kweyi anobu nu gbimu ko yagye kpanu, onaka kabo kpanu lo. 14 Ikweyi koni Owuso ya zo oba ni gyo Owuso lo ni bwebe ko dudu nu kponya nu ni gyo Owuso ni, mamani Owuso ya zo onya ni gyo Owuso lo ni bwebe ko dudu kpo obu ni kpo gyo Owuso ni. Owoni olema lo, ayi wa ba wayi ni gyo Owuso lo, ni oke lemani, ayi wa ba wayi neshi ebe ko Owuso.

15 Owoni ase ni ke gyo Owuso lo ni yimu koganu, ona ganu. Ipu ko mani Ojije yo ongo kwonya ni gyo Owuso ni, gbo ipu kela mani lo. Owuso yahogwu ko yagye ipu komene la. 16 Onya, oyamoji ya gye, kwawo pi ya ngmo obu wo la? Kwe, Oba, oyamoji ya gye, kwawo pi ya ngmo onya wo la

17 Ananoho kala na yagye ipu keshi ni Adole danu ni, kyiyo byoni oyo ome Owuso yuwogwu ni. Omani pi wono ni nfu oda ko Owuso kpiri ni la. 18 Owo ni Ongo ni shofu pwogwu ko Owuso, naka takirikwu ko kwikye wofu afafu lo; ase ni ke wofu afafu ni pwogwu ko Owuso, ona ka takirikwu ko shofu lo. 19 Ase ni shofu kwe Ase ni wofu afafu owojije lo; oza ni shoshi she ni ko ono ko Owuso. 20 Ananoho na yagye byoni oyo ome opwogwu ko Owuso ni. 21 Owo oshe ome Owuso yogwu la? Ka byotu lo; owoni oke ya gbowe ko ngmiyo sheshe moma, ngmiyo. 22 Ikweyi koni ase ni wo oshe ome opwogwu ka Adole owase ni Adole ngmanu ni; mamani, aseni wo oshe lo ome opwogwu ka Adole owo oshe ko Okristi. 23 Owuso rala rora kpakwekye la; mani oni ala ka wo oshe kasuse lo. 24 Ayene hin, ananoho na yagye nu byoni owe ome opwogwu ni Owuso, kweyi na rema ko Owuso.

25 Anani, ela kawi isongo kpawi isonya: Ngbono oye bwebe ka Adole ko dala lo, nke ya ka koni ala kyogwu kpa ami bwebe kiyinyinyi ka Adole ni. 26 Ikweyi ko owe kishi mani, nma mo oya shoshi shini ala bagye kala mani. 27 Awo ni ogbonya ka kabo kpa wa lo. Owoni oke gbonya kwe oba lo, ka gbo lo. 28 Owoni gbonya, oyozalabi lalo; owoni isonya gboba, oyozalabi lalo. Awase ni gbo onya kwo oba ni gbowe nwashika ipu koyagye wa, ami ke ya yimu shini ala ka mowe mani lo.

29 Ozani nyya ka ni yoma, Ayene hin, ishi shishini nwashika kelo, bwanani awase ni gba anya ni na bagye bya gba anya lo ni; 30 awase ni ba kyegba ni, na ya byaba kyegba lo; awase ni ba yeye ni ana ya byaba shotunehe lo; awase ni ba riyo ni na ya byoza nara ni wakakawa lalo ni; 31 awase ni ba yotu soza kese mani, ana gye mo odu kese mani wo wojije lo. Ikweyi koni ese mani byoni aba ma mani, ya gbeji kelo.

32 Nyya yimu shini ojije naka shiwo kala lo. Ongo ni gbo onya lo, oza ni ya shiwo nu ni na woko ka Adole, ikweyi koni oya takirikwu ko yotu ka Adole nasha. 33 Ase ni gbo onya ni, otu nu ke yoza kese mani, koyo zani otu konya nu yasha ni; 34 Mani oni otu nu ya kepa. Onya ni gboba lo kwe isonya ke ya yotu nu do oko ka Adole, ikweyi koni oya yimu ko yoko ka Adole ipu kikpiye kpo Omaku sere; Onya ni ke gboba ni, otu nu yoza kese mani, ikweyi koni oya yimu ko sho obunu otu. 35 Nyya kela mani ikweyi koni nyya yimu ko talabo la. Nyya yimu ko walobi lalo. Abishi koni, nyya yimu shini ala yoza owe neneshi, shini ala ziyikala do oko ka Adole kpiri-kpiri gbo kwikpiye lo.

36 Owoni ongo oye ya ma manu yi isonya ni ayi ko ni oza neshi lo koni omanu ya gbonya lo ni, kweyi oma mo oshu koni aba doka kiyiwa ikweyi koni ogege kwiyinu lo ni, ana doka kiyiwa, byoni oya yimu ni. Owo ozalabi lalo. 37 Ongo ni ke gbo ipu ko otu nu manu ya gbonya lo, owoni ashe kwo koshu ko ya mani lalo, kweyi owoni oya gege ko kwiyinu kpiri-kpiri, kweyi kwobonu gboza ko yoya ipu ko otu nu, oya gyogye owoni odoka kisonya oni lo. 38 Mani oni, aseni gbonya oyoza neshi, ase ni ke gbonya lo anu pini yoneshi she la. 39 Onya ni gboba oyabo kiyi nu lo owoni Obu nu yiyi; owoni obunu ke gekwu, oya gege ya gboba ni shotu ni, ona ke wase ni ya gboso Oyesu ni kin. 40 Onya mani ke ya shotunehe she, owoni oyagye fufunu. Omani wo okoka hin la, nki ma mo ngbo Omaku ko Owuso mamani.