1 Anani, ikweyi koza ni ala ta dami ikweyi kozarore ni ayipeka ni.

Agye mo owo kwokwoshi, mo kpiri ka gbogyogye byoni akamo, <<Ozagyogye ya yase ya zikweyi iso, imu yoya ke ya yase ya gye giso.>> 2 Ase ni ya ma manu gyoza ni gye febe ni oshu ko gye funi walo. 3 Aseni ke ya yimu ko Owuso ni, Owuso gyo.

4 Mani oni, ela ko roza ni ayi peka ni: Aha gye mo eka wojije lo, aha gye mo Owuso woye kponu kin la. 5 Koni amo awowuso baba iso kwo okpagye koni awowuso kpa awadole mani nwashika ni, 6 ebe kaha Owuso woye kponu la, anu pini wa Ada, ni yojoji ni; kweyi aha ba geyagye danu; Adole woye kpokponu kin la, Oyesu Okristi, anu ni ayojoji bwebe nu, kweyi aha gbo olayi bwebe nu.

7 Ase kpiri pini ke gyo okwokwoshi mani lalo. Ashishini kase ba geyagye deka kwikyikyeni owoni aroza mani aba ma byo ozarore ni are mani wa keka la; kweyi otu wa loshu lo, aba mamo ozarore ni ya yuwa yuwa yishi obutu ko Owuso. 8 Ozarore ke ya kye ema kaha tu kpo Owuso lo; owoni aha re lo, oya yaha ojije lo, owoni aha re, oya daha ojije lo.

9 Ala ke gbera, shini iyawu kala ko yoza ni shalotu ni naka yawase ni sha ni na gbo ipu ko ozalabi lo. 10 Ikweyi koni owoni ase ni sha ni mala ni bamo ala gbogyogye ni ba roza ipu kole keka, oya danoshu ko roza ni ayipeka ni lo? 11 Mani oni ase ni sha mani, oyene kala ni Okristi gekwu ikweyi nu ni, ya yishi bwebe kogyogye kala! 12 Bwebe koni ala ba yo Okristi Ozalabi bwebe ko ya ayene kala ni hagye loshu lo ni ozalabi, koni ala yo otu wa ofo ni.

13 Mani oni, owoni oza ni nyya ha ni ya yo oyene hin ya yo ozalabi, nyya hoza kelo, shini naka yo oyene hin na gbo lo.