1 Owoni ashe kala gbela kpo oyene oye ipu ko Okristi, naka bi gebe kawase ni gyo Owuso lo ni lo, abishi koni ona bi gebe kawa ase ko Owuso. 2 Ala gye mase ko Owuso pini ba kepwo kese lalo? Mani oni, owoni ala pini ba kepwo kese la, ala ba gege ko kepwo kawela gbayi-gbayi ni ba nyiso ipu kala ni lo? 3 Ala gye mo aha ba wa kepwo ka ayoleho ko Owuso lo? Owoni olemani, epwo kese mani ya shahoshu ko koka lo! 4 Mani oni, owoni ala gbedo kawela mani, ala shase ipu ko oda ko Owuso, kawase ni aba muwa wojije lo ipu koda ko Owuso ni shini ana wawo kepwo kala? 5 Nka mani shala yiweyi la! Kokwokwoshi ashishe kponu ziyi ipu kala koni oya kepwo kawogboso ni lo? 6 Abishi koni, oyene oye ya byo oyinanu goda ko kepwo obutu kawase ni gyo Owuso lo ni!

7 Ikweyi koni ala byiyikala goda ko kepwo ni, ala kwobonu zigbo kpiri-kpiri oma. Oya shoshi she shini oshase bita na yobibi lo? Oya shoshi she shini oshase bita na ro oza oshu lo? 8 Abishi koni, ala abiyikala ba yiyikala obibi ki ba riyikala oza oshu, kawase ni kyogwu ni.

9 Ko kwokwoshi Ala gye mo Ase-bibi ba rogwu ko Obula ko Owuso lo. Ashishe naka gyalegya lo; awo beba, awo geyagye deka, awagbaza, kango ni ba beba ni, kawo beba kongo-kpongo, kwonya-kponya 10 kawo owi, kawo gbafu, kawo gwinyi, kawo yase ishi, kawo gyasegya kpiri ba rogwu ko Obula ko Owuso lo. 11 Ishi ni shigbo ni ashishini kala lemani la. Ake yala na sho ozalabi, akyalatu ebe ko Owuso; ayala waseneshi ko Owuso ipu kiye ka Adole Oyesu Okristi bwebe ko Omaku ko Owuso kaha.

12 Ashe ya kamo, <<Nyya gege ko yojoji,>> olemani; oza kpiri pini ke ya shoshi dawo lalo. Nyya kamo Nyya gege ko yojoji, nke ya kyogwu koni ojije ya yun ya wo oshe nu lo. 13 Ashe hoha ya kamo, <<Ozarore wa kipu kweyi ipu wa ko ozarore.>> Olemani, Owuso ke ya yawoza epa mani ba wa kweyi. Ikpiye wa ko beba lalo, oke wa ko yoko ka Adole la, kweyi Adole wa kikpiye. 14 Owuso ya Adole nyiso bwikwu, anu ki yaha ba nyiso bwikwu mamani kposhu nu. 15 Ala gye mikpiye kala wigo kikpiye ko Okristi la. Na zigo kikpiye ko Okristi ga yi pwayi kpikpiye ka agbaza? Ogbowe lo! 16 Ala gye mase ni yikpiye pwayi kpa agbaza owoye kponu kpanu ipu kikpiye lalo? Okpa ko Owuso ka shese mo, <<Asepa ba wikpiye oyekponu.>> 17 Aseni ke yipu ka Adole owoye kponu kpanu ipu komaku.

18 Ala nyinya sheba boba. Ashishini kozalabi ni asuse yaya kpiri ni bese kikpiye nu la, ase ni ke yozalabi keba boba oyikpiye nu ozalabi. 19 Ala gye mikpiye kala woda ko Omaku ko Owuso lalo? Ni yipu kala, ni ala ze bwebe ko Owuso ni. Ala wa kiyikala lalo, ala wa ko Owuso la; 20 Owuso rala rora kpakwekye. Mani oni, ala yoko kpikpiye kala digyashi ko Owuso.