1 Ni olemani oni, ala shu ko maha byayole ko Okristi, ki byawase ni ayawoza teba ko Owuso dawa abo ni. 2 Ojiya ni aba doka mo ayole mani naya ni wa ko yokwokwoshi da Adole wa. 3 Anani, owoni ala kwumepwo kwe akwumepwo bwebe koza yoya kese mani oya shiwo hin lo kpiri-kpiri; kokwokwoshi ami ya gege kwiyun epwo lo. 4 Otu hin woye kponu, oni ke ya sayi mo epwo hin shoshi lalo. Adole pini ya kepwo hin la. 5 Mani oni, ala ka kwashishe epwo ome ishi na ya lo. Gwejeji epwo koka wotiri ko gbishi ka Adole na wa ome. Oya byojoji ni ayi teba ebe dibu ni webe yoyu kweyi ya yela kotu kasuse tese. Ishi oni ananoho ya nyiye shosha nu ebe ko Owuso.

6 Nyya kela mani abishi kala la, Ayene hin, nka ikweyi kiyun kpa Apolos kpa me, shini ala fu bwebe kaha asepa, shini ala gyikweyi kela ni aka mo, <<Ala ko ono gyogye.>> Ala ka gwabotu kpashe kweyi tashe nye lo. 7 Anoho yala shase ashini? Oji ni ala gbo ni Owuso pini dala lalo? Ojiyala ba gwabotu, byoza nala gboni weshi la lo?

8 Ala kwobonu gbojoji ni ala ba yimu ni wa? Ala kwobonu wolodu wa? Ala wo ose wa, koni aha we wa lo ni? Ala bi wo ose kwokwoshi, shini ahan wo ose kpala dudu. 9 Koni nyya ma mo Owuso yaha ayikoko ko Oyesu bitikpi, byawase ni akuwepwo ko yuwa ngmo iyi ka nanoho kweyi woza ko moma dese kpiri ka ayoleho kasuse. 10 Awikyo abishi ko Okristi, ala ke ziyi ipu ko dudu kpo Okristi! Aha loshu lo, ala ke loshu! Aha gyiyi lo, ala ake aba dala abokpa! 11 Kwikyikyeni aba ngmemye kpigini; aha shoshiye shosha, agwaha ize, kweyi aha ba gyehe waya-waya; 12 Aha ba yoko kotata kpabo ka. Ishini ayaha okwunu aha ba suwa aboneshi ishini adahowe, aha ba zotu; 13 ishini asahesa, aha kyogwu kpoko kela mene. Kwikyikyeni aha wa akya kese mani, aki weya kese mani!

14 Nyya tawoza mani dala, wa ko taliweyi lalo, ko pyala akpaha la ni ala wayi hin moshi ni. 15 Kala gbawo byala okpaku igwo ipu ko Okristi, ala gbada woye kpokponu. Koni ipu ko layi kala dudu kpo Okristi Oyesu nwwada kala bwebe ko oshu neshi ni nbi wa dala ni. 16 Mani oni, nyya bala shini ala gbami. 17 Ikweyi kela mani nyya to Otimoti oleho ebe kala, anu ni oyi hin moshi ni gbo kwokwoshi ipu ka Adole ni. Oya rala oyagye hin ipu ko Okristi Oyesu, ni woye kponu kpoza ni nyya fu ebebenya ipu koda ko Owuso wonyonya ni.

18 Ashini kala ba zikweyi iso ikweyi koni alaba ma byo nyya wa mala kelo ni. 19 Oke ya gbeji kelo nyya wa, owoni Adole kyogwu, kweyi ishi oni nyya wa gyoshu ni awo zikweyi iso mani gbo ni, woza ni aba ka ni kin lalo. 20 Ikweyi koni obula ko Owuso wela ko koka lalo oke wela koshu la. 21 Onya ni ala yimu she? Na webe kala kpaboshi, kwe na wa ipu kimu yoya kpo Omaku mene?