1 Anani, ikweyi kokpa ni ala ta dami ikweyi keshi ko Omaku ko Owuso ni.

Ayene hin, nyya yimu shini ala gyo kwokwoshi ikweyi wa. 2 Ala gye mishi ni ala wa keka ni, ayala nyowe gebe kaweka ni gbo layi lo ni. 3 Ni olemani nyya kada la kpiri kase ni gbo Omaku ko Owuso oya kamo, <<Igbe na to Oyesu lo,>> kweyi ashishe ya kamo, <<Oyesu wa Adole lo, owoni ogbo omaku ko Owuso lo.>>

4 Eshi ko Omaku ko Owuso baba gogo-gogo, Omaku ko Owuso ni ke ya dase ni woye kpokponu la. 5 Owe baba gogo-gogo ko yoko, Adole oye kponu pini aba yoko danu la. 6 Oshu yaba gogo-gogo ko yoko, Owuso oye kpokponu pini ke dase kpiri oshu ko yoko la.

7 Omaku ko Owuso sayi kiyi nu dananoho wa shini wo neshi ka kpiri. 8 Ashe Omaku ko Owuso danu eshi koleho ko oziyi nwashika, ashe ke anano Omaku ko Owuso mani danu eshi koleho ko ogyogye nwashika. 9 Omaku ko Owuso oye kponu mani dashe eshi kotuse, kweyi ashe Omaku ko Owuso oye kponu daneshi ko dase ogege. 10 Ashe odanoshu koyoza kigbashi, akashe, odaneshi ko bane koleho ko Owuso; ashe odaneshi ko gya aweshi gogo-gogo ni wa bwebe ko Omaku ko Owuso ni kpo oni wa bwebe ko Owuso lo ni, ashe odanoshu ko kela igbenu gogo-gogo, kwikyikyeni ashe odanoshu ko gwikweyi koza ni oka ni. 11 Kpiri mani ke woko ko Omaku ko Owuso oye kponu la, kweyi odananoho byoni oyimu ko danu ni.

12 Okristi lema byo ikpiye oye ni gbigo nwashika ni; otayoyo wikpiye oye kponu, koni ogbigo nwashika ni. 13 Mamani, kpiri kaha, kase ko Oyahuda kawo wo Oyahuda lo, koshe kwe ase ni wo oshe lo ni, ayaha obatisma wipu kikpiye oye kponu kpo Omaku oye kponu, kweyi kpiri ka adaha Omaku oye gwa.

14 Ikweyi koni ikpiye abiyinu gbigo oye kponu lalo, oke gbigo nwashika. 15 Owoni ikpo na kamo, <<Ikweyi koni nwwabo lo ni, nyyipu kikpiye lo,>> oni ya yongma shigo kikpiye lo. 16 Kweyi owoni akpaha kamo, <<Ikweyi koni nwwiyi lo ni, nyyipu kikpiye lo,>> oni ya yongma shigo kikpiye lo. 17 Owoni ikpiye kpiri bi wiyi kin, abi ba pwaha kpoji? Owoni ikpiye kpiri bi wakpaha, abi ba pwipi kpoji? 18 Byoni owe ni, Owuso yigo wonyonya kwikpiye, byoni oyimu shini ana we ni. 19 Kpiri wa bi wigo oyekponu, ikpiye biya yaba lo! 20 Byoni owe ni, agbigo nwashika, ikpiye ke woye kponu la.

21 Mani oni, Iyi nye ko ka dabo mo, <<Nyya yoji kpawo?>> kwe Ikweyi ya gege ko kadi ikpo mo, <<Nyya yoji kpawo?>> 22 Abishi koni, awigo kikpiye ni ya bya gboshu lo, aba gege ko yojije lo owoni awigo ni loshu lo ni baba kpawa lo; 23 kweyi awigo ni aba ma byo agboko nwashika lo ni, aba dawa ishi she la; Kweyi awigo kikpiye ni shoshi ko moma lo ni awa pini aba dawabokpa la, 24 awigo kikpiye ni ke shoshi she ni wigo ikpiye ka ni aba dawishi lo. Owuso abwenu zabokpa digo kikpiye ni amamo owojije lo ni. 25 Ozani ya ni ikpiye woye kpokponu ni oma, awigo kikpiye kpiri gboko oye kponu kpiyiwa. 26 Owoni igo oye ya mowe, ashini kigo kpiri ba mowe kpanu dudu, kweyi owoni ashigo oye iye, igo wonyonya ya shotunehe kpanu.

27 Kpiri kala wikpiye ko Okristi, kweyi ananoho kala wigo nu. 28 Kweyi ipu koda ko Owuso, Owuso yase kpiri baba: ikyikyo wayikoko ko Oyesu, omwepa wawobane, omweta wawofoza, omene awo yoza kigbashi, awo dase ogege, awotasabo, awoyoko koteyi, kpawokela igbenu gogo-gogo. 29 Kpiri wa pini wayikoko ko Oyesu la? Kpiri wa pini wawobane la? Kpiri pini wawofoza? Kpiri wa pini gboshu ko yoza ki igbashi la? 30 Kpiri wa pini gbeshi ko dase ogege la? Kpiri wa pini gbeshi ko kela igbenu gogo-gogo la? Kpiri wa pini ba gege ko gwikweyi koza ni aka ni la? 31 Mani oni, ala kpotu kala deshi ni she ni.

Oni shoshi she kpiri ni, wowe neshi owe ni shoshi she ni.