1 Ni olemani oni, ala takirikwu ko gbi imu. Ala ki takirikwu shini ala pyeshi ko Omaku, otata weshi ko tono kela ko Owuso. 2 Awase ni ba kela igbenu gogo-gogo baka kpashishe lalo, aba kado Owuso la. Ikweyi koni ashishe ya gyikweyi koza ni awa baka ni lo. Awa ba kela teba Ko kwokwoshi kpo oshu ko Omaku ko Owuso. 3 Awase ni ke ba tono ko leho ko Owuso ba kela dasuse la ko tuwabo, ko tuwotugbagba ki kawotu agye. 4 Awase ni ba kela igbenu gogo-gogo ni ba tejeji kiyiwa abo la, ase ni ke ya tono ko Owuso ni ya tawogboso Owuso kpiri abo. 5 Nbiya yimu mo kpiri kala ala kela igbenu gogo-gogo; nke ya yimu she owoni ala gbeshi kotono koleho ko Owuso. Ikweyi koni ase ni ya tono koleho ko Owuso oshase ni ya kela igbenu gogo-gogo ni. Ikweyi koni oza ni oya kani tawogboso Owuso abo lo, owoni agwikweyi koza ni oka ni lo.

6 Anani nwwebe kala ayene hin, owoni nwwebe kala wa kela igbenu gogo-gogo ntalabo owe nya? Ntalabo owe oyoye lo, owoni nbyoza ni Owuso gwamiyi ma ni kwogyogye, kwoleho, kwozafofu la lo. 7 Ole byo iyo koba ni gbolayi lo ba yeya, byamada kpo okuburu, ase ya yamoji ya gyoko kigye ni awo ni owoni ata kwe agwo gyogye lo? 8 Ase ni ya tegyi kefu kpokpo ni owoni ota gyogye lo, anoho ya pwo kweyi wiyinu shu ko gefu? 9 Mani oni, ase ya yamoji ya gyoza ni ala ba ka ni owoni ala kyoleho kpigbenu gogo-gogo ni agyikweyi nu lo? Ole byala ba kela owu la.

10 Ose baba gogo-gogo ese mani, kwikyikyeni kpiri wa ke gba ase wa. 11 Owoni nke gyikweyi ko ose ni ase ya ka ni lo, awase ni bakela ni ba wogboga ebe hin kweyi ami ya wogboga ebewa. 12 Koni ala ba tikpo ko pyeshi ko Omaku ko Owuso, ni olemani oni ala takirikwu shini ala gye ipu ke eshi ni ya yoda ko Owuso ya gye ni.

13 Mani oni kpiri kase ni ya kela igbenu oye hoha, ona tinarigwu shini ona pyeshi ko gwikweyi koza ni oya ka ni. 14 Ikweyi koni owoni ntinarigwu ipu kigbenu ni ngye lo ni, omaku hin ya tinarigwu kokwokwoshi, otu hin ke yebe ni lo. 15 Mani oni nyya yamoji, ome? Nyya tinarigwu kpo Omaku hin, nkyi ya tinarigwu kpotu hin mamani; nyya wigye kpo Omaku hin, nkyi ya wigye kpotu hin mamani.

16 Owoni oya shotunehe do Owuso ipu ko omaku fufunu, ase ni gyikweyi nu lo yebe ko gbayi ni ya yamoji ya kamo, <<Nalemani,>> di inarigwu ko otunehe wo? Ikweyi koni ogyoza ni oya ka ni lo. 17 Koni inarigwu wo ko shotunehe do Owuso wo neshi, otashishe abo lo.

18 Nshotunehe do Owuso ni nyya kela igbenu gogo-gogo shala kpiri ni. 19 Ipu koda ko Owuso oya shoshi shini na kela oko eho ni ase gyikweyi nu ni, ko fase oza, shoni nyya kela okpaku okpaku ipu kigbenu oye ni ase gye lo ni.

20 Ayene hin, otu kala naka lema byaka ayeke lo; ala le bya ayimeme owela kobibi, otu kala ke nawa kanyakwase. 21 Ayitota ipu kokpa ko Owuso mo:

<<Adole kamo, bwebe kawase ni ba kela igbenu gogo-gogo,

Nyya ka dawase hin

Nyya kela dawase mani kpo okwunu kawo gboga,

Koni ole mani awase hin ke ba pwela hin lo.>>

22 Mani oni, eshi ko kela kpigbenu gogo-gogo wo oyi dawase ni gyo Owuso lo la, dawase ni gyo Owuso ni lalo; kweyi eshi ko nototu ko leho ko Owuso ya wakawase ni gyo Owuso ni, wawase ni gyo lo ni lalo. 23 Mani oni, owoni awogboso Owuso kpiri gbayi kweyi ananoho ya kela igbenu gogo-gogo, kweyi awase ashishini ni gyikweyi nu lo ni kwe awase ni gyo Owuso lo ni wipu wa, aba mo ala ba nyoza lo? 24 Owoni ase kpiri ke batono koleho ko Owuso ishini awase ni gyo Owuso lo kwe ase ni gbogyogye lo wipu, aba sho ozalabi bita bwebe koza ni apwo ni lo. Ebeni awa bagye mo Owuso ya kwuwe epwo kpoza kpiri ni apwo ni. 25 Kweyi oza ni ayiteba otuwa ni ya tese, mani oni owa kwagye kweyi geyagye do Owuso, ya shagbotu kamo, <<Kokwokwoshi Owuso yipu kala ebe mani!>>

26 Ayene hin, oza ni ngbo ni yoma, Ishini ala gbayi ko geyagye, ashe ya wigye, ashe ya foza, ashe ya tono kela, ashe ya koza ni Owuso gwaniyi ma ni, ashe ya kela igbenu gogo-gogo kweyi ashe ya gwikweyi nu. Ojoji nala ba ya kpiri na woza ni ya toda ko Owuso abo ni. 27 Awo ni ashe kela igbenu gogo-gogo, ase epa kwe eta wotiri ko kela, ashe naka ome ashe na kyi ka, owotiri la shini ashe gogo na gwikweyi koza ni aba ka ni. 28 Owoni asheshe ke yaba ko gwikweyi nu lo anoni nasha ipu ko oda ko Owuso, naka kpiyi nu kpo Owuso

29 Awase epa kwe eta ni wawobane kela ko Owuso na ka, kweyi ashishini wa na zakpaha neneshi shini ana pwoza ni aka ni. 30 Owoni ase ke yagye ipu ko gbayi nyoleho bwebe ko Owuso, ase ni ya kela ikyikyo ni na hagye. 31 Ikweyi koni kpiri kala ba gege ko tono koleho ko Owuso, oyoye, shini ana fu na ki loshu ipu kotuse wa. 32 Awase ni gbeshi ko tono ko leho ko Owuso na yiyi keshi nu, 33 Ikweyi koni Owuso yayimu shan ya waya waya lo oke owo neshi kpo omene la.

Byoni owe ipu koda ko Owuso kpiri ni,

34 anya na yokwunu gwu ipu kogbayi oda ko Owuso. Ana dawishi ko kela lo; byoni ono kawo Oyahuda ka ni, shini ana ko woteyi lo kpiri-kpiri. 35 Owoni aba yimu ko doka kela ikweyi koje, ana dawobu wa oka ole. Koni oya owoza kiweyi la owoni onya kela ipu koda ko Owuso.

36 Kwe ala bama mo akwotu kela ko Owuso kpala la? Kwe ala fufu kala pini owebe kala la? 37 Owoni ashe ya ma manu woyoleho ko owuso kwe ogbeshi ko Omaku ko Owuso, ona gye moza ni nyya ta dala mani wo ono ka Adole la. 38 Owoni okpiyi kwomani lo, anu abiyinu ala nwanyi kpanu.

39 Mani oni, ayene hin, ala yotu kala tagye ko tono koleho ko Owuso, kweyi ala ka wuwobi ko kela igbenu gogo-gogo lo. 40 Owotiri koni ala ayojoji gyogye ipu ko owe neneshi.