1 Anani, ayene hin, nyya yimu ko rala, oshu neshi ni ntono dala ni, ni ala ze kweyi yo otuse kala loshu neshi. 2 Oni wo oshu neshi, oleho ni ntono dala, oya ngmala. Owoni ala byo loshu neshi owoni ala byo loshu lo olema bya ala gbo otuse lo oma.

3 Nyya dala oza ni adami ni, oza ni shojoji ni: mo Okristi gekwu ikweyi kozalabi ka, byoni ayitota ipu ko Okpa ko Owuso ni; 4 mo ayonyi, oshiyi bwamiri eno ko omweta, byoni ata ipu Okpa ko Owuso ni; 5 mo obose do Obitrus kpo kpiri ka ayikoko igwepa. 6 Itikpi koni, obose dase ni shogbogbo eho ni ba gboso ishi oye kponu, nwashika wa tayayo biyi, ashishini wa ke kwobonu gekwu wa. 7 Ebeni obose do Oyakubu, ome obose dayikoko ko Oyesu kpiri. 8 Ko gwejeji obose dami mamani, koni nle byase ni amo gyogye lo ni. 9 Ikweyi koni ami pini nyonye ipu kayikoko ko Oyesu kpiri ngye koni aba yumogwu mo oyikoko ko Oyesu ni lo, ikweyi koni ngmawase ko Owuso ni. 10 Eshi ko Owuso nke woza ni nwwe ni, kweyi eshi ni odami ni woyeye lo, oyun yoko sha ayikoko ko Oyesu ashini kpiri. Mani ke woyoya hin lalo, eshi ko Owuso pini yo oko kpami la.

11 Ni olemani oni, Kowa bwebe hin kwe owa bwebe wa, oza ni kpiri kaha ba tono nu ni yoma, kweyi anu pini woza ni ala kyogwu kpanu ni la.

12 Owoni oleho kaha wo Okristi nyiso bwikwu, abo wonya ni ashishini kala ba kamo awase ni gekwu ni ba nyiso ipu ko olayi kelo? 13 Owoni ela mani wo kwokwoshi, oya le byo Okristi nyiso lo mamani oma; 14 Owoni Okristi nyiso bwi ikwu lo, aha gbojije ko tono lo kweyi ala gbojije ko kpotuse lo. 15 Oni labi she ni, aha biba wawo kokame ikweyi ko Owuso, koni aha kamo Owuso pini yo Okristi nyiso bwikwu la, oke wokwokwoshi lo owoni okwu banyiso ipu ko olayi lo, mani oni oyo Okristi nyiso amiri lo. 16 Owoni awase ni gekwu ni ba nyiso lo, Okristi nyiso lo mamani oma. 17 Kweyi owoni Okristi nyiso lo, otuse kala woyeye ala tayayo bipu kozalabi kala oma. 18 Kweyi oya shaha mo awase ni kpotuse ipu ko Okristi ni gekwu ni okweyi dawa oma. 19 Owoni iyitagye ka ipu ko Okristi wikweyi koyiyi mani kin la, abi ba woza kiyinyinyi shananoho kpiri ese mani.

20 Kokwokwoshi ke Okristi nyiso bwikwu, anu wogwogwa kikyikyo kawase ni gekwu ni. 21 Ikweyi koni ikwu wa bwebe kase oye, onyiso kawase ni gekwu ni wa bwebe kase oye mamani. 22 Ikweyi koni kpiri kase gekwu ipu ko dudu wa kpa Adomu, mamani kpiri kase ba nyiso ikwu ipu ko dudu wa kpo Okristi. 23 Ananoho ke ya nyiso ipu kishi nu: Okristi wogwogwa kikyikyo; ome ishini owa, awase ni wakakanu ni ba gboso. 24 Ebeni ese ya kweyi; Okristi ya yawomaku bibi ni ba kpase ogwu ni, kpawine ko oshu, kpawoshu kpiri kyigbo, ome oya yo Obula ya nabo do Owuso Ada.

25 Ikweyi koni owo tiri koni Okristi oya yose gbishini Owuso ya yawo omonyekwotu nu gwagye kweyi yuwa sheye kikpo nu. 26 Omonyekwotu ko gwejeji ni oya yi gwagye ni wikwu. 27 Ikweyi koni okpa ko Owuso kamo, <<Owuso yojoji sheye kikpo nu.>> Osayi neshi mo ojoji kpiri mani Owuso abiyinu yipu nu lo, anu ni yoshu kojoji do Okristi ni.

28 Ishini oke yo Okristi woteyi kojoji ni, Oyi abiyinu ya yabo ko Owuso, ni yoza kpiri danu abo ni; kweyi Owuso ya kpogwu ko ojoji kpiri-kpiri.

29 Anani, owoni onyiso bwi ikwu yaba lo, awase ni ayuwo obatisma okwunu kawase ni gekwu ni baya moji? Ojiya ni aba yase obatisma okwunu wa? 30 Aha ke ojiya aha yika sho okwunu kikwu ipu kishi kpiri? 31 Ayene hin, kurutu nyya gyiyi kpikwu! Nka mani ikweyi koni nyya gwabotu kpala, ipu ko Okristi Oyesu Adole kaha ni. 32 Owoni, nkpefu kpo obekwu ipu kogya ke Efesu ikweyi koza ni ase baka ni, oji wa abola hin? Owoni awase ni gekwu ni ba nyiso ipu kolayi lo, byoni aka ni, <<Ahan re shan gwa, koni okyi aba gekwu.>>

33 Ala ka shashishe bita na gyala egya lo, <<Oya bibi ya pyase neshi wase bibi.>> 34 Ala shoza labi bita shala wa yoza neshi. Nkamani dala shala yiweyi ikweyi koni ashishini kala gyo Owuso lo ni.

35 Ashe ya doka mo, <<Awase ni gekwu ni aba yuwa nyiso moji? Aba wa kpikpiye wonya?>> 36 Ikyo! Ishini otoza oya gekwu ome, oya bwu la. 37 Ozani otu ni wedo ki izire shishi la, ikpo kewo kwe ikpo koza ashishini, ikpiye ni oya wa we ni pini otu lalo. 38 Owuso ke ya di izire ikpiye byoni oyimu ni, edo ki izire wonyonya odanikpiye ni shanu ni. 39 Ikpiye koza kpiri ni gbo olayi ni woye kponu lalo; Asuse gbedo kikpiye oye gogo, ebe kikyashi gbedo koye gogo, igbano gbedo koye gogo, kweyi ebinyi gbedo oye gogo.

40 Ikpiye ki iso baba kweyi akese baba; oshoshi ni wa kikpiye ki iso gogo kpo oshoshi kikpiye kese; 41 Eno gboshoshi nu, oya gboye gogo, awinyiwo gba akakawa gogo; kweyi oshoshi kinyiwo oye gogo kpa koye.

42 Mamani pini oya we kponyiso wipu kolayi kawase ni gekwu ni la. Ishini ayikpiye ni nyi ogekwu, ishi ni Owuso yo nyiso bwikwu ase ni ya gekwu ke lo gbogbo-gbogbo 43 Ipu ka amiri, olabi kyi sha; ishini Owuso yo nyiso, oya shoshi neshi kyiya loshu. 44 Ishini ayinyi, oya wikpiye kiyi kpiyi, owoni onyiso, oya wikpiye ko Omaku.

Okwokwoshi ikpiye kiyi kpiyi yaba, ikpiye ko Omaku yaba mamani. 45 Mani oni Okpa ko Owuso kamo, <<Adomu ni wasuse kikyikyo ni, Owuso yo gbolayi.>> Adomu ko ogwejeji ke gbo omaku ni ya dase olayi ni. 46 Olayi ko Omaku pini wa ikyikyo lalo, Olayi kiyi kpiyi pini wa ikyikyo la, ome omaku. 47 Owuso ya Adomu kikyikyo, kpo omula ka agye; Adomu ko omwepa wa bwi iso. 48 Ase ni wa kese ni lema byase ni ayo bwagye ni, kweyi ase ni wa ki iso ni lema byase ni bwi iso wa ni. 49 Byoni aha alema byase ni Owuso ya bwagye ni, mamani akyi ba le byase ni bwi iso wa.

50 Ayene hin, oza ni nyya ka dala ni yoma, oza ni aya ikpiye kpoyi ba rogwu ko Obula ko Owuso lo, kweyi oza ni wa ko gekwu ni, owoni ogekwu lalo oya rogwu ko Obula ko Owuso lo.

51 Ala zakpaha pwo kwokwoshi ni teba ni: Kpiri ka pini ba gekwu lalo, kpiri ka keba shikpiye, 52 ebebeni byo kyokye kiyi, ishini ategyi ko gwejeji yeya, awokwu ba nyiso, aba gekwu kelo, kweyi kpiri ka ba shikpiye. 53 Ikweyi koni owotiri shini ikpiye ni ya wowa ni na shiyinu kponi ya wowa lo ni; koni oza ni ya gekwu ni ya shiyinu kpoza ni ya gekwu lo ni. 54 Ishini oza mani gbodagye, ni ayikpiye ni ya wowa ni shiya kponi ya wowa lo ni, ebe ni oza ni Okpa ko Owuso ka ni ya gbodagye mo: <<Ayikwu ngmo; orore gyogya!>>

55 <<Ikwu, orore wo yini?

<<Ikwu, oshu wo yini?>>

56 Ikwu pyoshu nu ko sase bwebe kozalabi, kweyi ozalabi pyoshu nu bwebe ko Ono. 57 Aha ke shotunehe do Owuso ni yaha rogwa bwebe ka Adole kaha Oyesu Okristi ni!

58 Mani oni, ayene hin moshi, ala hagye loshu. Ipu kishi kpiri ala ziyikala kpiri-kpiri doko ka Adole, ikweyi koni ala gye mo oko kala ipu ka Adole wo oyeye lalo.