1 Ayene hin, otu hin yimu ko bo Owuso do Izrayila shini na ngmawa. 2 Omanu ya kolobene ikweyi wa mo agbotu ko gboso Owuso, otuwa ni agbo ni ke wa koza gyogye la lo. 3 Koni agyoneshi ni wako Owuso lo ni, ayimu koneshi kiyiwa, atawa ko yiyiwa do oneshi ko Owuso. 4 Okristi pini wokweyi ko ono la, shini oneshi na wa kase ni gbo okwokwoshi shini ana wase neshi kpo Owuso.

5 Omusa tenena ikweyi ko omani mo, oneshi ni wako Ono ni: <<Ase ni gboso Ono ni oya gbolayi.>> 6 Oji no okpa ko Owuso ke ka ikweyi ko neshi ni wokwokwoshi ni mo: <<Ka kamo, anoho ya giso?>> (Shini ana kwikye Okristi wokpagye) 7 kwe anoho ya sa gagye kawa aleku? (Kweyi ana byo Okristi giso shi ikwu). 8 Oji ni okpa ko Owuso ka? <<Ela yo pee kpala, oyo kwunu wa kpotu wa.>> Omani, wela kotuse pini aba kala. 9 Mo, <<Owoni oshagbotu, Oyesu wa Adole,>> kweyi gbo okwokwoshi otuwa mo, Owuso yo nyiso ikwu, aba ngmawa. 10 Bwipu kotu wa pini aba gbo okwokwoshi la kweyi aya neshi kpotu oye kponu kweyi ashagbotu pini angma wa la. 11 Byoni okpa ko Owuso kani, <<Ase ni yotuso Owuso aba tiweyi lo.>> 12 Ikweyi koni Ojije gogo ebe ko Ase ko Oyahuda kpase ni wo Ase ko Oyahuda lo ni lo Ananu pini wa Adole ni wa Adole kase kpiri ni dase odu ni yiye nu ogwu ni, 13 Byoni okpa kani, <<Ase ni shogwu yiye ka Adole kotabo, oya ngmanu.>>

14 Oke ya lemoji, ome, ni aba yiye nu ogwu ni akyogwu kpa nu lo ni? Okiya lemoji ni aba kyogwu kpase ni apwelanu lo ni? Aki ba pwo moji owoni akela ko Owuso dawa lo? 15 Aba kela ko Owuso moji, owoni otuwoleho lo? Byoni okpa ko Owuso kani, <<Ikpo kawase ni byoshu neshi wani shoshi moji!>> 16 kpiri ko Ase ki Izrayila pini ke zela neshi ko Okristi lalo. Koni Ishaya inobane kamo, <<Adole, anoho kyogwu kpela ka?>> 17 Mamani otuse bwebe kela pwopwo la, kweyi ela pwopwo bwebe kela ko Okristi la, 18 Odoka mo Apwolola? Olemani apwo:

<<Oleho wa gebebenya kpiri ese mani,

Oleho wa go okweyi kese mani.>>

19 Nki doka mo, <<Ase ki Izrayila gye lola? Omusa wa kikyikyo ni, kamo,

<<Nyya yoko kpawase ni wojije lo ni koni ala ba yafu wani;

Nyya yala ba yanya;

kweyi ko okpagye ni gyojije lo.>> 20 Kweyi Ishaya inobane kela kamo,

<<Ase ni labo hin lo ni pyun;

Nyyiyun shiyase ni doka hin lo ni.>>

21 Ikweyi koni Ase ki Izrayila kamo,

<<Ishi kpiri nyyabo hin nata

dawase niba pwaha lo ni kpawase ni lagbiti.>>