1 Oji wo neshi ko wase ko Oyahuda ikweyi kawase ni wo Oyahuda lo? Kwe oji woshi ko ofu shoshe? 2 Oshoshi nwashika ipu ko joji! Kikyikyo awo yahuda, awa pini ayela ko Owuso dawa abo ikyikyo la.

3 Oji yu wa owoni ashini wa gbotuse lo? Otuse ni agbo lo ni ya gege ya wobi ko gbotuse ko Owuso? 4 Aayi! Kase kpiri na wawino kame, Owuso wokwokwoshi la. Byoni ayitota ipu ko kpa ko Owuso ni mo:

<<Shini owase tata ipu kela koka wo

oki bose shepwo ishi ke epwo koka wo.>>

5 Owoni okwokwoshi ni agbo lo ni byo kwokwoshi ko Owuso wese ododa, aba kamoji? Kwe aha kiba kamo Owuso yoza neshi lo koni oya kyanya kpaha ni la? (Nyya kela bwebe komoma ka asuse.) 6 Olema lalo! Owoni obi lemani, Owuso bi ya kepwo kese mani moji? 7 Oye yaba ashe ya tawashu mo, Owoni okame hin yokwokwoshi ko Owuso gohobu kweyi danu igyashi, ojiya ome, ni aba zun winozalabi kwikyikyeni? 8 Koni olemani <<ojiya wahobi ko gohobu kpo ozalabi shini oza neshi nawa>>? Byoni ase shishini ba maha ka ni! Awino kela mani shu ko yishi.

9 Aba ngmeyi kela mani moji? Aha shoshi shase shishini la? Aayi! Ka aha ase ko Oyahuda kase ni wo Oyahuda lo ni kpiri ka aha bwowe ko ozalabi. 10 Byoni okpa ko Owuso kani:

<<Ashishe waseneshi lo,

11 Ashishe ziyi lo kwe ashishe tikpo ko Owuso lo.

12 Ananoho pyitikpi to Owuso;

kpiri ka asuse nyowe;

ashe kponu yoza neshi lo.

13 Okwunu wa gwogwa byamiri ni;

igbenu wa ba fokame kin la.

Akpokunu wa gbefa ke egwa nyakwu;

14 Okwunu wa nwonwu kpesa sosa lono-lono.

15 Ikpo wa gbiyawu papa ko ga ngmase kpo dawowe;

16 Ishi kpowe ba gbosuwa ebe ni aga kpiri.

17 Kweyi agyowe ko omene lo,

18 Agboshi ko Owuso otuwa lo.>>

19 Byoni abani oza ni ono ka kpiri, oya ka dawase ni ba gboso ono ni la, shini okunu kananoho na gwu kweyi ese mani gbepwo obutu ko Owuso. 20 Byoni olemani oni ashe kponu ya wase neshi ebe nu bwebe ko ko ono lo; pa, bwebe ko ono pini agyela ko ozalabi la.

21 Byonabani ke oneshi bwebe ko Owuso, ni gbela ko ono lo ni, ayigwa wa, byoni ono ko Omusa kpawobane kani. 22 Oneshi ni bwebe ko Owuso ni wa bwebe ko totuso Oyesu Okristi dase kpiri ni totuso ni. Ogogo lo kpiri-kpiri: 23 Koni ase kpiri yozalabi kweyi nye ebe kigyashi ko Owuso. 24 Kweyi ayaha wase neshi yeye bwebe keshi ko Owuso ni apye bwebe ko Okristi Oyesu ni ngmaha ni. 25 Owuso daho Oyesu Okristi na weshi popa ko sore kozalabi, bwebe ko totuso oyi nu. Oya mani ko shaha okwokwoshi nu. Ipu kotumene nu ozotu kpozalabi ni ase ba ya ga ni, 26 anani ke, Owuso ya hagye ikweyi kokwokwoshi nu ko yase kpiri ni kyogwu kpo Oyesu na wase neshi.

27 Oji wakya gwogwa wo? Oyaba kelo. Oji ni aba ya shini ahan sho Owuso otu? Aba gboso ono la? Aayi, bwebe kotuse la. 28 Koni aha kyogwu mo ayaha wase neshi bwebe kotuse la, gbela ko gboso ono lo. 29 Owuso wo Owuso kase ko Oyahuda kin la? Owuso kase ni Oyahuda lo ni mamani la lo? Owa kakawa mamani la. 30 Owuso woye kponu la, anu ni yase ni shofu kpase ni shofu lo ni wase neshi bwebe kotuse wani. 31 Aha sho ono bita ikweyi kotuse mani ona? Aayi! Kwikyikyeni aha byo ono.