1 Oleho mani bwebe ko Obulus, oyole ko Oyesu Okristi ase ni ayogwu wo oyole kweyi yo tagye gogo do oshu neshi ko Owuso ni. 2 Oshu neshi ni osho okoyi nu gbeji-gbeji bwebe ko Owuso bwabo kawo bane nu ipu ko Okpa ko Owuso. 3 Ikweyi ko Oyi nu ni ipu kikpiye Obwi ipwoma ko ose Odawuda; 4 kweyi bwebe ko Omaku sere adanoshu ko wo Oyi ko Owuso bwebe ko yiso ko Oyesu bwamiri. 5 Bwebe nu kpa abishi kiye nu, apyeshi ko Owuso kpoko kayikoko ko Oyesu ko yase ogwu bwipu kawase ni wase ko yahuda lo ni kpiri gipu kogeyagye ni ya wa bwipu kotuse ni. 6 Omani kala ni bo Oroma ni, Kweyi ayala ogwu ko wa ko Oyesu Okristi mamani.

7 Mani oni nta dala ayene hin moshi kpiri ni bo Oroma ni Owuso yimu kala kweyi yala ogwu wase sere ni:

Oneshi kpo omene bwebe ko Owuso Ada kpa Adole Oyesu Okristi.

8 Ikyikyo nyya shotunehe do Owuso bwebe ko Oyesu Okristi ela kala kpiri, ikweyi koni oshu kotuse kala ge ebebenya ipu kese mani. 9 Owuso ni nyya geyagye danu kpotu oye kponu ebe ko tono ko oshu neshi ko Oyi nu ni, pini wolobene hin mo nyya rela kala ishi kpiri 10 ipu kinarigwu tota hin ishi kpiri; kweyi nyya tinarigwu do Owuso mo anani ogwejeji owe na gwa dami shini na webe kala. 11 Nyyimu ko mala shini na dala eshi ko omaku ko yala loshu. 12 Shini ami kpala an tiyika otugbagba bwebe kotuse kiyika.

13 Nyya yimu shini ala gye, ayene hin, mo ngbo ishi nwashika ko webe kala Apa shunbita lo, anani ome npyowe ma. Ko wa kyizire ebe kala, byoni nkye ipu kawase ni wase ko Oyahuda lo ni.

14 Ngboko ebe kawo Ogirik kpa awase ni wo Ogirik lo ni, kawoziyi kawikyo.

15 Ozani ya ni ngbimu ko tono ko oshu neshi gebe kala ni bo Oroma ni mamani oma.

16 Nyya yiweyi ko oshu neshi mani lo, ikweyi koni owoshu ko Owuso la ko ngmase kpiri ni kyogwu kpanu ni; do Oyahuda ikyikyo, ome awase ko yahuda lo. 17 Koni ipu ko oshu neshi ayoza neshi ni bwebe ko Owuso ni gwa tese, oza neshi ni bwebe kotuse bwikyikyo gogwejeji ni. Byoni ayitota mo, <<Aseneshi ya yagye kpotuse la.>>

18 Anya ko Owuso sa bwi iso ikweyi kasuse ni ba gboso Owuso lo ni kpo ozalabi ka asuse ni ba yo kwokwoshi gwu kpo ozalabi wa ni. 19 Koni agyoza ni ashu ko gye ikweyi ko Owuso ni, ikweyi koni Owuso abiyinu yi gwa dawa ni. 20 Bwo kwagye kese mani oshi ko Owuso ni iyi kasuse ya ma lo ni, oshu nu ko gbogbo-gbogbo kpo oyi nu ko Owuso akwobonu ma bwebe ko oza ni oya ni, shini asuse naka gbo nyepwo ko ojije lo. 21 Koni agyo Owuso ni, atela ko danu abokpa ko Owuso, ake shotunehe danu lo, omoma ko otuwa ke woyeye kweyi otu wa ni wikyo ni dibu. 22 Aba kamo awa ziyi, ake wikyo la 23 kweyi atela ko geyagye do Owuso ni ya gekwu lo ni dawoyi ni, ageyagye dawoza ni ayuwa le bya asuse kpawigbano kpawebe kikyashi kwe awebe ni ba pyipu agye ba gekwu ni.

24 Byoni olema oni, Owuso shuwabita ipu kimu ko ozalabi ni yotu wa ko yoya, kweyi ayoza kiweyi koyi ikpiye yishi kpiyiwa. 25 Ayokwokwoshi ko Owuso pya wokame; kweyi ki ba geyagye dawoza ni Owuso ya ni sho Owuso ni yuwa ni abi nu, niye shosha kpiri wakakanu ko gbogbo-gbogbo ni! Nalemani.

26 Ikweyi koni, Owuso shuwa bita ipu ko mehe kozalabi ni ya tuwiweyi ni. Anya wa yoza ni Owuso ya ni pya bwebe ko gbotagye kpanya byawa. 27 Mamani ango yoza ni Owuso ya ni pya bwebe ko mehe kango byawa. Ango ba gbotagye kpango byawa, kweyi apyabola kozalabi wa.

28 Ikweyi koni, ama moshoshi ko gyo Owuso lo, Owuso shuwa bita kpo otulabi, ko yoza ni ashu ko ya lo ni. 29 Anwonwu kpedo ko otulabi wonyonya, ozabibi, imu kiyiwa, kpa anya yoya. Anwonwu kpa anya kiyiwa, ba ngmiyiwa, ba gbapwo, ba gyiyiwa egya, ba fokwunu kpiyiwa. Aba lokwunu agye, 30 Ba yiyiwa ishi, awo tela ko Owuso, awino mesa ka asuse, awo lagbiti kpo zikweyi iso, Awoyowe ko yozalabi, awo gyagye kpase ni muwa ni; 31 Awikyo, awogbotuse lo, awoyonotu, awo gbiyinyinyi lo. 32 Koni agyono neshi ko Owuso ni kamo awo yawoza mani kpiri shi ikwu goga ni, agohobu ko ya mani kin lalo, apa gwagye tawino yoya otu.