1 Byoni abani, daha ni amiyinyinyi kaha bwebe kotuse ni, aha gbotumene kpo Owuso bwebe ka Adole Oyesu Okristi, 2 Bwebe nu pini aha pyeshi ni aha banu mani bwebe kotuse kaha la. Kweyi aha ba shotunehe ipu kiyitagye ki igyashi ko Owuso! 3 Olema kin lalo, aha ki ba shotunehe ipu ko owe moma kaha, ikweyi koni aha gye mo owe moma ya yaha ba zotu, 4 Owuso yaha zotu tahabo ko yoza neshi, kweyi oza neshi ya daha iyitagye. 5 Iyitagye mani ke ya gbaha owuru lo, byoni Owuso pyashu ki imu yoya nu shipu kotu kaha byinyo ki ishu ni ya pope bwebe ko Omaku Sere ko Owuso ni odaha ni.

6 Ala ma, ipu kishi neshi, ishini aha gboshu lo ni, Okristi gekwu ikweyi kase ni gyo Owuso lo ni. 7 Ashishe ya kyogwu ko gekwu ikweyi kase neshi ni, owoni ashe ya kyogwu, oya kyogwu ko gekwu ikweyi kase neshi la. 8 Owuso ke shiyaha imu yoya nu nwashika, bwishi ni aha tayayo bipu ko ozalabi ka aha ni, Okristi gekwu abishi kaha! 9 Byoni bwebe koyi nu ayaha na sere ni, ikwu nu ngmaha shanya ko Owuso! 10 Koni bwishi ni aha wawo monyekwotu ko Owuso ni, bwebe kikwu ko oyi nu ke yaha woya nu, byo nabani aha woya ko Owuso wa, oya le moji Owuso ya ngmaha ikweyi koni Okristi gbo olayi! 11 Oke lema ni kin lalo, aha ki ba shotunehe ipu ko Owuso bwebe ka Adole Oyesu Okristi, anu ni yaha woya kpo Owuso ni.

12 Byoni ozalabi wese mani bwebe ko ozalabi kase oye kponu, kweyi ikwu ki wa bwebe ko ozalabi, kweyi bwowe mani ikwu webe kananoho; koni ananoho yozalabi ni. 13 Ome ana byo ono wa, ozalabi ke kwobonu yese mani, Akwashishe epwo kozalabi ishi oni walo, ikweyi koni ono yaba wa lo ni. 14 Koni olemani oni, ikwu ya ngmase bwishi ka Adomu gishi ko Omusa, kawase ni yozalabi ko yono kigbo bya Adomu lo ni, ni wotu kase ni yawa ni. 15 Eshi ke lema byozalabi lalo. Owoni ase lewa gekwu ikweyi ko zalabi kase oye, Adomu, eshi ko Owuso ni gebe kase lewa bwebe kase oye, Oyesu Okristi. 16 Kwikyikyeni, eshi ko Owuso gogo kpo ozalabi kase oye. Ozalabi kase oye yaha, <<Gbepwo.>> Eshi ko Owuso ke yaha wase neshi ebe ko Owuso, koni ozalabi nwashika bikweyi ka aha ni, Eshi ko Owuso mani yaha, <<Gbepwo lo!>> 17 Owoni kwokwoshi ozalabi kase oye byikwu wa bwebe kase oye, oya lemoji dawase ni pyeshi koza neshi ko Owuso ipu kolayi bwebe kase oye ni wo, Oyesu Okristi.

18 Byoni olemani oni, ozalabi kase oye ka Adomu byikwu wa dase kpiri, mamani abola koza neshi kase oye ko Okristi byoyagye neshi kpo Owuso wa kpo olayi dase kpiri. 19 Koni bwebe kase oye ni lagbiti ni ayase nwashika ya wawino yozalabi, mamani, bwebe kase oye ni geyagye ni ayase nwashika ya wase neshi.

20 Akwo Ono shini ananoho na mozalabi nu la; Kweyi ebeni ozalabi ke nwashika ni, oneshi ko Owuso nwashika she. 21 Shini byoni ozalabi yoshu ikweyi ka asuse kweyi byikwu ngmuwa ni, mani eshi ko Owuso pini ya yoshu la, oyaha wase neshi ebe ko Owuso shini an pyolayi ko gbogbo bwebe ko Oyesu Okristi Adole ka.