1 Nkela ko kwokwoshi nyyi ipu ko Okristi inya kokame lo, otu hin kyogwu mo olemani ipu ko omaku neshi 2 Ngbo otu byobya nwashika otu hin ni gbomeyi lo ni. 3 Nbiya yimu mo ami abiyun abi yumo okwunu shini ebi ko Owuso na kun kpo awayene hin, kipwoma, shini na kaha kpo Okristi. 4 Awase ki Izrayila. Awayi ko Owuso la, oyuwa wayi nu kweyi shiya wa igyashi nu; shokoyi kpa wa kweyi dowo ono nu; ageyagye do Owuso kwokwoshi; azawo okoyi ko Owuso; 5 Awa ayi bwebe kipwoma kawo kyikyi ko Oyahuda; Okristi, ni pya wasuse ni, bwo ema wa. Ahan shiye ko Owuso ni, ya kpogwu koza kpiri ni, ko gbogbo-gbogbo nalemani.

6 Olema byo ela ko Owuso gbo lalo. Nye kase ni bwipwoma ki Izrayila ni pi wase ko Owuso la lo. 7 Kweyi, koni abwi ipwoma wani yuwa wayi ki Ibirayi lo. <<Byoni olemani bwebe ki Ishaku pini ayiwo woza.>> 8 Ni, olemani omoma kasuse kpiri pi wayi ko Owuso lalo, sa ayi kokoyi pi agye wayi ki Ibirayi kipu nu la. 9 Olemani koni okoyi kwobonu ka hagye ni; <<Owoni ishi fu nyya kwikye, kweyi Osera ya moyi nongo>>.

10 Olemani kin lalo, ayi ko Orabeka epa gbo Ada oye ni wa, ada wa Ishaku osoku ka. 11 Ni olemani, ome ayapule na ma kwe yoza neshi kwe olabi shini Owuso shu ko ya ni na gbodagye: 12 wa koko lalo oke wa kase ni yuwogwu ni la, aka danu mo, <<Osu ya geyagye do okina nu.>> 13 Byoni ayita ipu kokpa mo, <<Nyya yimu ko Oyakubu, nke tela ki Isuwa.>>

14 Oji ni aha ba ka? Owuso wino kepwo meme la? Aayi! 15 Koni okado Omusa, <<Oza ni ase Yani nyya yi gbo koni nyyimu ko yi gbo ni, ome nkiya miyinyinyi kase ni nyya yimu ko miyinyinyi nuni>>. 16 Mani oni, ojoji yebe koza ni asuse ba yimu kwoza ni aba ya ni la lo, oke wela kiyinyinyi ko Owuso la. 17 Koni okpa ko Owuso kado Ofirona mo: <<Nyyo wose ikweyi kela mani, shini na sayi koshu hin bwebe wo, shini ana tono kiye hin ese kpiri.>> 18 Ni, olemani oni, Owuso ya miyinyinyi kase ni oyimu ko miyinyinyi nu ni, kweyi ase ni oyimu ko yotu gbo, oya yotu gbo.

19 Oye kala ya kadami mo, <<Ojiya ni Owuso ya baha ela kwikyikyeni ni? Anoho tela koza ni oyayimu koya ni?>> 20 Awo wanoho, Asuse, ya shoko kpo Owuso?>> Oza ni oyiyo ni kadanu mo, anoho yo, ojiya ni oyun mani ni?>> 21 Ino me eyi gboshu ko yoko kpo ome byoni oya yimu, ko ye eyi oye wako ri imya, oye ke wako yoko shishi kpanu.

22 Owoni Owuso, yimu ko kyanya shini ase na gyoshu nu, gbotu mene nwashika, Otu kanya nu, kyanutu ko kyebe? 23 Owoni oyoza mani shini awolodu na gyotu ko yigbase nu, ni oya hagye dawase ko kanu ni. 24 Koni aha ni oyahogwu ni, bwipu kase ko Oyahuda kin lalo, ke bwipu kawase ni wase ko Oyahuda lo ni mamani. 25 Byoni oka okpa ko Oseya

<Awase ni wase hin loni

Nyya yuwogwu mase hin;

ase ni wonya bashi hin lo ni

Nyya yogwu mo onya bashi hin.>

26 <<Ebeni, ogbodagye kweyi Owuso ka dawa mo, <Awase nu lalo,>

ebeni aba yuwogwu ma ayi ko Owuso.>>

27 Mani oni, Ishaya kela ikweyi ko Izrayila mo; <<Lewa ko Izrayila lema byo isisagye ki ishu ni, awase ni shishini kin pi ba gbo olayi la; 28 Koni Adole yawa gbese ogo agye papa.>>

29 Byoni Ishaya kwobonu ka ikabe ni; <<Owoni Adole Owuso bi shayi bita daha lo, abi ba lema byo Osodom kpo Ogomora.>>

30 Ojini aba ka? Mo awase ni wo Oyahuda lo ni, labo ko neshi koni pye, oneshi ni wako tata ni; 31 Awo ase ki Izrayila ni labo kono ko neshi ni, apye lo, 32 Ojiya ni apye lo? Ela koni alabo kpotuse lo, aba ma byo oyebe koza yoya wa la. Mani oni ashikawu ikweyi ki <<ikyikpo ko yase shikawu>> 33 byoni ayita ipu ko kpa ko Owuso ni mo:

<<Ma, ikyikpo ko Osiyona

ni yase ba shikawu ni kpo,

okpo ni yase ba gboni.

Ni olemani, ase ni ke yotuso oya yiweyi lo.>>