1 Mani oni, awase ni bipu ko dudu kpo Okristi Oyesu aba kwuwepwo lo, 2 koni bwebe ko Oyesu Okristi ono ko Omaku kolayi yun ngma shono kozalabi kpikwu. 3 Ozani ono gboshu ko ya lo ikweyi koni ikpiye kozalabi yoshu bize ni, Owuso yi ya. Oto Oyi nu oleho wa kpikpiye bya kasuse ni ya yozalabi ni, kowa yozalabi bize. 4 Owuso ya mani shini oza neshi ni ono ya doka ni na gya ipu ka aha, ni bagye ipu ko Omaku ni, wipu kikpiye kozalabi lalo. 5 Awase ni bagye ipu kikpiye kozalabi ni yotu wa soza ni ikpiye oni ya doka ni; awase ni ke bagye ipu ko Omaku ni yotu wa soza ni Omaku ya doka ni.

6 Otu kino ozalabi wikwu, otu ni ke ya do Omaku oye ni wolayi kpomene. 7 Otu kozalabi womonyekwotu ko Owuso. Oya geyagye dono ko Owuso lo, oke ya gege ya geyagye danu lo. 8 Awino geyagye dikpiye kozalabi wa ba gege ko sho Owuso otu lo.

9 Ala ke bagye ipu kikpiye kozalabi lalo, ipu ko Omaku la, owoni Omaku ko Owuso yipu kala. Kweyi ase ni gbo Omaku ko Okristi lo, owa ko Okristi lalo. 10 Owoni Okristi ke yipu kala, ikpiye kala gekwu ikweyi kozalabi, omaku kala ke yiyi ikweyi koza neshi. 11 Owoni Omaku ko Owuso ni ngmo Oyesu bwikwu ni yipu kala, anu ni ngmo Okristi bwikwu ni ki ya dikpiye kala ni ya gekwu ni olayi bwebe ko Omaku nu, ni yipu kala ni.

12 Mani oni, ayene, aha gboko ko yoya do Owuso ipu ko olayi ka, oko mani ke wa ko yoza ni ikpiye kozalabi ya yimu ni lalo. 13 Owoni ala ba yoza ni ikpiye kozalabi ya yimu ni, ala ba gekwu; owoni ala ke yoko bibi kikpiye ngmo bwebe ko Omaku, ala ba gbolayi. 14 Ikweyi koni awase ni Omaku ko Owuso ya kpuwogwu ni wayi ko Owuso la. 15 Koni Omaku ni Owuso dala ni wako ki yala wawo oshe koshi yoya lalo, Omaku oni ke yala wayi ko Owuso. Kweyi bwebe koshu ko Omaku aba shogwu yo mo, <<Ada, Ada Ka.>> 16 Omaku abiyinu yolobene kpomaku ka mo awayi ko Owuso. 17 Anani owoni awayi, awawo rogwu oma-awawo rogwu ko Owuso dudu kpo Okristi, owoni amowe kpo Okristi, aki ba byigyashi kpanu mamani.

18 Nma kamo owe moma ka kanani figyashi ni aba wa yi gwa daha ni lo. 19 Oza kpiri ni Owuso ya ni ba gbeyi kayi ko Owuso ni oya wa sayi wa ni. 20 Oko kabo ko Owuso ya megye, wimu kotu nu lalo, oke wimu kotu kase ni danegye ni, kwikyikyeni ayiyitagye 21 mo enoye aba yo Oko kabo ko Owuso abiyinu ngma shipu keshe koza ni ya kwoka ni kweyi byo wipu kigyashi kongmongma kayi ko Owuso.

22 Aha gye mo Oko kabo ko Owuso kpiri ya dose, byose koyi moma kwikyikyeni. 23 Anu fufunu lalo, kaha abiyika, ni gbogwogwa kikyikyo ko Omaku ni, ba dose ipu ka byoni aba gbeyi nu ko wa zaha wayi nu, kweyi ngmikpiye ka. 24 Koni ipu kiyitagye mani pini angmaha la. Iyitagye ni ake ba ma ni wiyitagye lalo. Anoho ya yiyitagye doza ni okwobonu gbo ni? 25 Owoni ake yiyitagye doza ni agbo walo ni, aba gbeyi nu kpotumene.

26 Mamani, Omaku ya tahabo ipu kikpiye shosha ka. Aha gyoza ni ashu ko tinarigwu ikweyi nu ni lo, Omaku abiyinu ke ya tinarigwu daha kponu ni okwunu ya gege ya ka lo ni. 27 Kweyi Owuso ni ya gyipu kotu ka ma ni, gyotu ko Omaku; ikweyi koni Omaku ya tinarigwu dase sere byoni Owuso ya yimu ni la.

28 Kweyi agye mipu kojoji Owuso ya yoko ko neshi kawase ni ba yimu nu ni, awase ni ayuwogwu bwebe kimu kotu nu ni. 29 Awase ni Owuso kwobonu gyuwa ni, oyuwa shagye gogo kowa le byo Oyi nu, shini ona woyikyikyo ipu kayene lewa. 30 Kweyi Awase ni oyuwa shagye gogo ni, oki yuwogwu, awase ni oyuwogwu ni, odawepwo neshi, awase ni odawepwo neshi ni, oki dawigyashi nu.

31 Oji ni aba ka ikweyi kela mani kpiri? Owoni Owuso yo kpaha, anoho ya kwagye konu kpaha? 32 Owuso ni wobi ko Oyi nu lo, pa yo peshi daha kpiri ni, oya gege ya yojoji kpiri manu daha kpotu oye kponu lo? 33 Anoho ya kwase ni Owuso shu ni epwo? Owuso abiyinu pini shepwo neshi dawa la. 34 Anoho ke ya kwepwo? Oyesu Okristi ni gekwu ni, ki she mani, onyiso bwikwu wolayi-oyagye abore ko Owuso kweyi ki yabore ko Owuso, yaba ikweyi ka. 35 Anoho ya yaha ko kpimu ko Okristi? Otubyobya la kwe owe moma kwe egyemoma kwe emye kwe ewewa kwe ebi kwe ewakpa? 36 Byoni okpa ko Owuso kani,

<<Koni awase wo ni abowe kikwu ishi kpiri;

Azaha byo otukpo ni aba ga yi shoko ni.>> 37 Aayi, ipu kawoza mani kpiri ashawino refu bwebe kase ni yimu ka ni! 38 Koni nkyogwu kpotu oye kponu mojije ya gege ya yaha ko kpimu ko Owuso lo: kikwu kolayi, kayoleho kowu bibi, koza kanani koza kohobu, koshu wonyonya, 39 kikpo, kibwu, ipu koko kabo ko Owuso kpiri, ojije ya gege ya yaha ko kpi imu ko Owuso ni yipu ko Okristi Oyesu Adole ka ni lo.