1 Ala gye lo, ayene Nyya kela kpase ni gyono ni ala gye mono yikweyi kasuse ishini oya gbo layi ni kin. 2 Byoni owe ni onya gboba, ono yo gbo bobunu kishini obunu yiyi ni la, owoni obunu ke gekwu, ono koyagye konya kpoba yikweyi nu kelo. 3 Owoni ogboba oye hoha ishini obunu tayayo yiyi ni, aba yo mo agbaza. Owoni obunu ke gekwu, ono oni yikweyi nu kelo kweyi owagbaza lo, koni ogboba oye hoha ni.

4 Ayene hin, mamani ala gekwu depwo bwipu kikpiye bwipu ki kpiye ko Okristi, anani ala bipu kanu ni nyiso ikwu ni koni ahawase koyoko ko Owuso ni. 5 Owoni imu kikpiye kpala ogwu, Imu ko yozalabi ya yoko ipu kikpiye ka, kweyi gwejeji koza yoya wikwu la 6 Anani ke, agekwu kpo ono niya gbaha ni, ashaha bita ipu ko ono shini angeyagye dowe ko Omaku ni wowe nekye na yi ta lo ni.

7 Kwaha akamo ono abwiyinu woza labi? Kwokwoshi, olema lalo! Oke wono pi yun gyo zani ozalabi weni. Owoni ono ka mani lo, Ka gbimu koza ni wa kashe ni lo, nbiya gege ko gyedo kimu mani lo. 8 Ozalabi ke zoshu ikweyi ko ono mani oyun gbimu kiyun. Owoni owono lalo, ozalabi wikwu. 9 Nekye-nekye nggyono lo; ishini ono ke wa ni, ozalabi wa gbolayi kweyi ami gekwu, 10 nwwa ma kamo ono ni shu ko byolayi wa ni, byikwu wa ko kwokwoshi. 11 Ozalabi pyebe, gyumegya bwebe ko ono kweyi yun ngmo 12 Bwebe ni ono kokpagye yo sere, ono ko Owuso yo sere, oke gyogye kpo neshi. 13 Ozani shoshi ni byikwu wa ngmun ona? Ole mani lalo! Ozalabi piya la; bwebe ko yoneshi, ozalabi byikwu wa dami, bwebe ko ono ko Owuso ozalabi na wolabi kwokwoshi

14 Agye mani! Ono yipu komaku, amike yipu kikpiye, nwwase ni ayora wo oshe do zalabi. 15 Ngyoza ni nyya ya ni lo; ikweyi koni nyya yoza ni nyya yimu ko ya ni lo, npa ya yoza ni nyya yimu ko ya lo ni. 16 Owoni nyyoza ni nyya yimu ko ya ni lo, omani ya sayi mo nkyogwu kamo ono mani gyogye. 17 Ami piya yawoza mani lalo; oke wozalabi ni yikpiye ni la 18 Ngye mo oza neshi ayo kpami lo Oni ipu ki kpiyen. Koni nyya yimu koneshi ni, nke gege yalo. 19 Nyyo neshi ni nyya yimu ko ya ni lo; kweyi npa, yobibi ni nyya yimu ko ya lo ni. 20 Owoni nyyo zani nyya yimu koya lo ni, omani ya kamo ami piya la lo; oke, wozalabi ni yikpiye hin ni.

21 Oni ngye kamo ono mani ya yoko: ishini nyya yimu ko yoza neshi, ozalabi kin pini otu hin ya ze ko yoya la. 22 Koni nyya shotunehe kpo ono ko Owuso bwipu kotu hin. 23 Nke mono oye gogo ya yoko ikpiye hin, ono ni ya nonu kpono notu hin ze ni; Oyun wase ni ayishetu do ono kozalabi niya yoko ikpiye ni. 24 Ngbotu byobya nwashika! Anoho ya ngmami shikpiye kikwu mani? 25 Nshotunehe do Owuso ni yoza mani bwebe ka Adole Oyesu Okristi!

Omani, ke, woza ni tiyun ipunu ni: kpotu hin ami ageyagye do Owuso, ikpiyen ke ya geyagye dono kozalabi.