1 Nke doka mo: Owuso tela kase nu? Olemani lo! In wo Ase ki Izrayila abiyun, ipwoma ki Ibirayi, bwipwoma ko Obenjami. 2 Owuso tela kase nu lo, ni ogyuwa ni. Ala gyoza ni ela ko Owuso kani lo, ishini shu ga ni, ela koziyi ko Iliya obo Owuso ela ko Ase ki Izrayila: 3 Adole, ayawo bane wo ngmo kweyi yo okpe kebe ko bo Owuso bya: Anu fufunu pi shishini la, kweyi aba yimu ko yun ngmo?>> 4 Oji wo kyogwu ko Owuso danu? <<Nyya ase Okpakwu ahapa diyun ni tawa ko geyagye okinafu wa do Obaal ni.>> 5 Ni, olemani, ishi mani ashini kase ke shu bwe ebe ko neshi nu. 6 Owoni oshoshu nu bwebe ko neshi, owa koko ni aya lalo. Owoni oshoshu ko Owuso biwa koza ni ase ya lalo, mani oni oneshi biya wo neshi kotata lo.

7 Oji mani? Oji ni ase ki Izrayila labo sheyi gagye kweyi apyelo, awase ni ashuwa ni pye. Ashini pwogwu ko Owuso lo, 8 byo ni okpa ka,

<<Owuso dawo omaku ko yalo, agbiyi ake ba ma lo kpa akpaha ake ba pwo lo kwikyikyeni.>> 9 Kweyi Odawuda kamo, Ozarore kpikpo wa nawo efa ni ya yuwa gbo kyi ya yuwa ba mowe ikweyi ko zakpaha wa. 10 Omiyi wa na dibu shini ana ka mebe lo,

kweyi ogbayi wa na wowe gbogbo-gbogbo otuwa.>>

11 Ebeni nke doka: Ashikawu shini ana gbo wako nyiso kelo? Olemani lalo! Ikweyi koni ayozalabi ni, angmawase ni wase ko Oyahuda lo ni shini otu kase ki Izrayila na bya. 12 Owoni ozalabi kase ko Oyahuda bi wo odu kese mani, kweyi oleha komaku wodu dawase ni wo Ase ko Oyahuda lo ni, odu bi ya sheyi gagye dawa owoni kpiri wa bi lemani!

13 Oya kela kpawase ni wo Ase ko Oyahuda lo ni: Byoni owino tono kela ko Owuso dawase ni wo Ase ko Oyahuda lo ni, oyoko neshi kpebe koyoko nu ko tono kela ko Owuso. 14 Otusose nu wako mamo alemoji shini igyashi kase nu na yanya shini na ngmawase ashini wa. 15 Owoni otela wa wo nyonye kese kpiri, onyonye wa biya wolayi dawase ni gekwu ni. 16 Owoni ofofa kikyoga ni aze kikyikyo wa ko Owuso, oshini kikyoga kpiri wa kakanu mamani, owoni ogba wa ko Owuso, ayabo wa kakanu mamani.

17 Owoni ayabo shini kyigbo, kweyi ala, byoni ogwogwa kefu gye nyakwu ni, akpuwa gbayi ipu kawoshishini kweyi ko ogwogwa kogba kefu mani, 18 Ala ka gwabotu mala sha ashishini kayabo ni lo. Owoni ala ya mani, ala gbera; ala pini ba dogba oshu lalo, ogba pini ya daloshu la. 19 Ala ba kamo, <<Ayabo kefu kigbo shini na pyowe ko kpuwa gbayi.>> 20 Omani wo kwokwoshi. Apa kowa ela koni agbo okwokwoshi lo ni, ni olemani ohagye okwokwoshi. Ka ziyo mo ogyoza shashishe lo, ke wino yoshi.

21 Owoni Owuso sha ayabo kokwokwoshi bita lo, ala ba ma byo oya shalabita la?.

22 Ala miyinyinyi kpo olono ko Owuso: olono dawase ni gbo ni, oke ya miyinyinyi kala, owoni ala gohobu ipu kiyinyinyi nu. Owoni ala ke ya ma lo, oya yala gwo shonu mamani. 23 Owoni awoyahuda go ohobu kpo Ogbo kwokwoshi wa lo, oya kpuwa gbayi, Owuso ya gboshu ko ki kpuwa gbayi. 24 Itikpi komani kpiri, owoni oyala ngma shogwogwa kefu ni gye sheyi gagye abiyinu ni, kweyi tanu kpogwogwa kefu ni gye abiyiwa ni kweyi okpuwa gbayi kpefu ni anyi ni, oya kiyinu fu moji, ni ayabo ke efu ni gye abiyinu, okpuwa gbayi kpo efu.

25 Oya yimu shini anaka wase ni gyo oza ni ya gbodagye lo ni koza ni agye lo, ayene shini anaka wino gye shoshu lo: Ase ki Izrayila ke mowe gbishini ewa kawase ni wo ase ko Oyahuda lo ni kwikye wipu. 26 Ni olemani, kpiri kawa Ase ki Izrayila aba ngma awa, byo ni akwobonu tani;

<<Ino ngmase yawa bwo Osiyona;

Oya yawase ni tela ko gboso Owuso ni ngma shi ipwoma ko Oyakubu.

27 Kweyi omani pi wokoyi nu kpawa la

owoni oyozalabi wa yi bize.>>

28 Byoni oshu neshi ko Oyesu kani, awino tela kala; byoni ela koshoshu weni, aba woya ikweyi kawo kyikyi wa. 29 Owuso ya gege ya yotu nu pya ikweyi kase ni oshu ni lo. 30 Byoni awani wase ko Oyahuda lo ni, ishi oye atawa ko gboso ono ko Owuso ni, anana mani ala ke kyogwu kpo oneshi ko Owuso ikweyi koni ase ko yahuda tela ko gboso ono ko Owuso. 31 Ni, olemani awa mamani anana mani tela ko gboso ono ko Owuso shini awa mamani Owuso na yigbuwa ela kiyinyinyi ko Owuso. 32 Koni Owuso wobi kase kpiri ni tela ko gboso ono nu ni ela koni oya yigbuwa kpiri ni.

33 Odu ko Owuso gyokwu moji! Oziyi kpogyogye nu libwu kotata!

Anoho ya gege ya gyoza ni otu nu ze ni? Anoho ya gyowe nu?

34 <<Anoho gyotu ko Owuso?

Kwe anoho wino danela?>>

35 <<Anoho do Owuso oza,

shini Owuso na sore?>>

36 Ikweyi koni kpiri aya bwebe nu, kweyi kpiri mani wa bwebe nu danu. Igyashi wa ko Owuso ko gbogbo-gbogbo! Nalemani.