1 Oji ni aha ba ka? Ahan gohobu ko yozalabi shini eshi ko Owuso na nwa? 2 Aayi! Aha kwobonu gekwu ipu ko zalabi wa, aba yamoji ba gbolayi ipu nu ke? 3 Kwe ala gye mo kpiri ka aha ni ayaho obatisma gipu ko Oyesu Okristi ni ayaho obatisima gipu ki ikwu nu lalo? 4 Mani oni, ayaha nyi kpanu bwebe ko obatisma gipu kikwu shini, byoni Oyesu nyiso amiri bwebe ki igyashi ka Ada ni, aha ba bagye ipu ko wushoshu pepe mamani.

5 Owoni aha kwobo nu woye kponu kpanu mani ipu ki ikwu nu bwebe ko obatisma, aba woye kponu kpanu mamani ipu ko nyiso amiri byoni owe ni. 6 Koni agye mo ayikpiye kaha nekye poshi kpanu shini ahan yikpiye ko ozalabi gwotonu, shini ahan ka wo oshe ko ozalabi kelo. 7 Ikweyi koni ase ni gekwu, obose shabo ko ozalabi.

8 Anani owoni aha gekwu kpo Okristi, aha kyogwu maha ba biyi kpanu mamani. 9 Aha gye mo koni Okristi nyiso amiri ni, oya gekwu kelo, ikwu gboshu ko wadole nu kelo. 10 Ikwu ni oga ni, ogekwu igboye kponu ko yoshu ko ozalabi kyigbo. Owushoshu nu nabani ke wa ko Owuso. 11 Mamani, ziyo wo kwu ipu ko ozalabi, byoni ozalabi we ni, kweyi oke yiyi do Owuso bwebe ko Okristi Oyesu.

12 Mani oni, ka yozalabi na zoshu kikpiye wo shini ogeyagye dimu bibi nu lo.

13 Ala ka zawigo kikpiye kala dozalabi ko wiyo koko ko ozabibi lo, ala ke ziyikala do Owuso, koni ala gekwu anani ala ke gbolayi pepe. Mani oni, ala yoko kpikpiye kala kpiri na wiyo koko ko oza neshi do Owuso. 14 Ka zozalabi na wa adole kala lo, ikweyi koni ono yikweyi kala kelo, oneshi ko Owuso pini yikweyi kala la.

15 Oya lemoji? Ahan yozalabi koni ono yikweyi kaha kelo, koni oneshi yaba ni? Aayi!

16 Ala gye mo owoni ala ziyikala dashe ko gbeshe danu, ala wo oshe kase ni ala ba geyagye danu ni lalo Kala wo oshe ko ozalabi, ni ya byikwu wa ni, kwe ala wa ko geyagye, ni ya byoza neshi ko Owuso wa ni? 17 Otunehe ke wa ko Owuso! Koni ala wawo oshe ko ozalabi ga ni, ala zoza ni afala mani kpotu oye kponu. 18 Anani angmala shozalabi kweyi ala wawo oshe ko oza neshi ni Owuso yayimu.

19 (Nkela mani byoni asuse ba ka ni, ikweyi koni ala loshu ikpiye lo ni. Byoni ala ba zikpiye kala ba gbeshe) doza kebi kpozabibi ni yipu kogye ni, anani ala zikpiye kala ko gbeshe doza neshi ko Owuso, ni ya yala wase sere ni. 20 Ishini ala wawo oshe kozalabi ni, oza neshi gboshu ikweyi kala lo. 21 Oji ni ala pye ishi oni bwebe kawoza ni ala ba yiweyi wa nabani ni? Awoza ni ba byikwu wa ni!

22 Anani ake ngmala shozalabi kweyi wawo oshe ko Owuso, oza ni ala pye ni yala wase sere, kweyi okweyi nu wo Olayi ko gbogbo. 23 Koni abola kozalabi wikwu, eshi ko Owuso ke wo Olayi ko gbogbo ipu ko Okristi Oyesu Adole ka.