1 Oji ni aha ba ka mo osoku kaha ki Ibirayi gye ikweyi kela mani? Oji wo gyogye nu? 2 Owoni ayi Ibirayi wase neshi bwebe koko nu, ogbowada ko yoya, oni oke wa ko Owuso la lo. 3 Okpa ko Owuso kamo oji? <<Ibirayi totuso Owuso azo wino yoza neshi.>>

4 Nabani owoni ase yoko, abola nu weshi lalo, owotiri ko danu la. 5 Mani oni, ase ni ke yoko lo, opa yotuso Owuso ni ya yase ya wase neshi ni, otuse nu wokwunu koza neshi danu oma. 6 Odawuda ka mamani ishini okela ikweyi kaboneshi kase ni Owuso yo wase neshi bwebe koko lalo ni:

7 <<Otunehe wa kase ni ayozalabi nu na ni,

ase ni Owuso yozalabi nu gbo ni.

8 Otunehe wa kase ni Owuso ya yarisawu ko ozalabi nu lo ni!>>

9 Otunehe mani no Odawuda ka wa kawo ni shofu kin la, kwe kase ni shofu lo ni? Aayi! Aba kamo okpa ko Owuso kamo azotuse ki Ibirayi woza neshi danu. 10 Ishinya ni oza mani gbodagye? Olema danu ome Oshofu la kwe, ishini oshofu walo ni? Ogbodagye ome Ibirayi shofu la. 11 Ofu shoshe ki Ibirayi woyi ko neshi ni opye bwebe kotuse bwishini oshofu wa lo ni. Mani oni Ibirayi wada kase kpiri ni gbotuse kweyi ake shuwofu lo ni, shini ana yuwa wase neshi. 12 Anu ki wada kawo shofu kin lalo, awase ni shofu kweyi ki ba koyi kikpo kotuse ni ada ka Ibirayi ye ome oshofu ni.

13 Bwebe ko ono pini Ibirayi kpayi kipwoma nu zokoyi ko rogwu kese mani la lo, pa bwebe koza neshi ni bwebe kotuse ni la. 14 Owoni awino ko ono bi wawo orogwu, otuse bi ya woyeye kweyi okoyi bi ya gbojije lo, 15 ikweyi koni ono byanya ko Owuso wa. Ebeni ono yaba lo epwo yaba lo.

16 Byoni olemani oni, okoyi ko Owuso wa bwebe kotuse, shini ona weshi dipwoma ki Ibirayi kpiri, wa kawine ko ono kin lalo, ke kawine kotuse ki Ibirayi. Owada kaha kpiri. 17 Byoni okpa ko Owuso kani, <<Ami yo wada kase lewa.>> Owada ka ebe ko Owuso ni ototuso ni, Owuso ni zolayi dawase ni gekwu ni kweyi oki yawoza ni baba lo ni ogwu byababa ni.

18 Ishini Owuso shokoyi di Ibirayi moya wada kase lewa ni, Ibirayi totu so. Owuso ki kamo ipwoma wo ya lewa byinyiwo ni,>> Okoyi oni lema byoya gbodagye lo ni 19 Otuse ki Ibirayi shakwini lo, kosawukye kikpiye ni tanu byoni ashayi nu shini gbayayi ko gyo ogbogbo ome onya nu Osera wo odoma ni. 20 Koni olema danu ni, otuse nu shakwini ikweyi kokoyi ni Owuso ya ni lo; opa hagye loshu otuse nu, oki sho Owuso iye. 21 Oyotu nu se do Owuso mo ogboshu ko yoza ni oshokoyi ni. 22 Oza ni ya ni Ibirayi, bwebe kotuse <<pyabokpa kase neshi ebe ko Owuso.>> 23 Ela ni kamo <<Owuso zo wase neshi,>> ayi tota danu fufunu lalo. 24 Oke wa aka kaha mamani la, dase ni Owuso ya danabokpa kase neshi ni, daha ni kyogwu kpanu ni Owuso yo Oyesu Adole kaha nyiso amiri ni. 25 Owuso yo dikwu ikweyi kozalabi kaha, kweyi anganu iso shini ona yaha na wase neshi kpo Owuso.