1 Naha sa neshi ega kishu ni, apwo miye kokpagye ninyo shogba to ni wo Omolta. 2 Awase kebe ni yahoza neshi nwashika. Owuso kwotu ko yiwo kweyi oshu ya ya, ebe ni agwola kweyi yahomaba kpiri kaha. 3 Obulus kpayabo kefu tukpa kweyi kpuwa shola, ebe ni egwa bose koni ebe ya dola kweyi wa lo Obulus abo. 4 Awase kebe ninyo shogba toni ma ni egwa lo Obulus abo ni, aka diyiwa mo, <<Ogbawashu lo, ongo mani wino ngmase la, obose bwikwu ki ishu, kwikyikyeni Owuso nase ba gboso mani ya shobita kpolayi lo.>> 5 Ebeni Obulus myabo, egwa gbo gola, ojije ke yo lo kpiri-kpiri. 6 Ase kpiyi shagye ko mo ya myi kwako gbo gekwu. Ni ake kpiyi shagye gbeji kweyi amojije yo lo ni, apyokwunu kamo, <<Obulus wo owuso la!>>

7 Ishini oza mani gbogagye kpo Obulus ni, ebe ni okpagye shini wako Opubliyos lenu lo, anu ni woteyi kokpagye ninyo shogba to ni, oyahomaba neshi kweyi awogboga nu keno eta. 8 Ada ko Opubliyos gbotagye ikweyi ko gwudu, oshu kwo kweyi oya shipu. Obulus gipu nu koda nu, yabo so kweyi otinarigwu, kweyi danu gege kikpiye nu. 9 Ni oza mani gbodagye ni, ashini kawine kere kpiri ni bokpagye ninyo shogba tuwa ni wa kweyi odawo gege kikpiye wa. 10 Ayaheshi nwashika, kweyi ishini aha gipu ko owu ko sheyi kinyo ni, adahoza kpiri naba doka ipu kiyawu kaha ni.

11 Itikpi koya eta aha sheyi kpowu bwa Alegzandiriya, ni aba yogwu mo <<Apule Ka Owuso ni,>> ni minyo nu ishi ko owu ebe ni inyo shogba to ni. 12 Aha fo ogya ko Osirakus, kweyi aha bagye eneta ebe ni. 13 Bwebe ni, aha gohobu ipu kinyo ka sa ogya ko Orejiyom. Gbebenya, owu kwotu ko ta bwagbabo kekye, ipu ke eno epa aha fo ogya ko Oputiyoli. 14 Amawogboso Oyesu ebe ni kweyi amaha an bagye kpawa kobize oye. Mani oni aha wo Oroma. 15 Awogboso Oyesu ko Oroma pwoshu kaha kweyi ase wa bwawogya lenu-lenu, ase bwi Ipishi ka Apiyo kpa Ase Eta bwo Ole kawogboga wa taha. Ni Obulus muwa ni, ogbede shi ko Owuso kweyi opyotugbagba.

16 Ishini, aha sa Oroma ni, asho Obulus bita yagye abo kiyinu kpadakare oye ya gbeho nu.

17 Itikpi keneta, Obulus yanyakwase kase ko Oyahuda ogwu gbayi. Ishini awa gbayi ni, oka dawa mo, <<Ayene hin ki Izrayila, nyyase kaha ojije lo nke yodu oyoye ni awokyikyi kaha nabo daha ni kyigbo lo, kwikyikyeni ayun toruduru Ojerusele kweyi yun nabo dase ko Oroma. 18 Ishini adumoka ni, ase ko Oroma yimu ko shunbita, ikweyi koni akwun kpobibi oyoye ni gye ko yun ngmo ni lo. 19 Awase ko Oyahuda ke kyogwu lo, gbishini owotiri dami ko kpela sho Ogbolamaga, oke wa koni nyya kwagye kepwo kpawase hin lalo. 20 Ozani ya ni amo nawa mala nakyi kela kpala ni yoma. Ela kokwokwoshi, ashuma ashirika mani ikweyi ko Omezaya ni ase ki Izrayila kpiri kpiyi shagye ikweyi nu ni.

21 Aka danu mo, <<Aha pyokpa oyoye bwo Oyahudiya ikweyi wo lo, ashishe ipu kawase kaha bwanoni wa kpela oyoye ikweyi wo lo, ake koje bibi ikweyi wo lo. 22 Aha ke ba yimu ko pwowushoshu wo, ikweyi koni asuse ebebenya ba kela labi ikweyi kikpo no yipu nu mani.>>

23 Mani oni ado Obulus eno, kweyi eno oni ase nwashika wa gbayi ebe ni Obulus yanu ni. Bwohoki go otu ogwikweyi kela nu dawa ikweyi ko obula ko Owuso, kweyi otakirikwu ko yuwa na zela ko Oyesu bwebe ko shiyawa bwipu ko Ono ko Omusa kpenena kawobane. 24 Ashini wa kyogwu kpela ni oka dawa ni, ashini wa ke kyogwu lo. 25 No Obulus ke koje kponu mani, ashebe ni bita, ba tawashu kpiyiwa. Ozani oka ni yoma: <<Omaku ko Owuso kela kwokwoshi dawokyikyi kala! Bwebe kinobane Ishaya. 26 Ikweyi koni Okamo,

<Ga ka dawase mani mo:

Ala ba zakpaha gbogbo, ala ke ba gyikweyi nu lo;

Ala ba mebe gbogbo, ala ke ba ma lo,

27 Koni otu kawasuse mani labi,

Kweyi ayakpaha wa du

ki yiyi wa gwu.

Olemani lalo iyi wa biya ma,

akpaha wa bi ya pwo,

otu wa bi ya gyikweyi nu,

Owuso kamo, kweyi abi ba kwikye webe hin,

Ami bi ya dawo gege.>>>

28 Mani oni, Obulus ngmeyi kela mo: <<Nyya yimu shala gye mo akwobonu toleho koshu ko ngmongma ko Owuso gebe kawase ni wase ko Oyahuda lo ni wa. Kweyi Ake ba zakpaha danu!>> 29 Itikpi koni Obulus kela mani, Awoyahuda gawa, atawashu kotata kpiyi wa.

30 Ebeni Obulus yagye ole ni oze kikwiri diyinu ni kashayi epa, kweyi ya zawase kpiri ni bawa kowa mo ni. 31 Otono ikweyi ko obula ko Owuso kweyi ya fasoza ikweyi ka Adole Oyesu Okristi, ya kela gboshi yoya lo ashishe ke wobi lo.