1 Itikpi keno eho Ananiya Oteyi kawosapa go Okeseriya kpa anyakwase kpa awokepwo ni aba yuwogwu mo Otetulus. Awebe ko ogbolamaga ga kotu kela wa ikweyi ko Obulus. 2 Ayo Obulus ogwu wa, kweyi Otetulus kyogwu kwotu kela nu aka ikweyi ko Obulus kamo,

<<Oshu wo ni ogbo ni yaha gege ko bagye mene, Kweyi oziyi wo yawoza ni yishi ni pya woza neshi. 3 Ozani aba yimu ebe wo ishi kpiri ni oma, aba shotunehe dawo Ofelis kpo oza ni oya ya ni. 4 Nyya yimu ko ngmishi gebe lenu lo, nke bo shini oya akpaha daha kishi gbayayikweyi koza ni aha ba ka ni. 5 Aha mo ongo mani owino tela ohobu, okwotu ko tonu ipu kawo Oyahuda ebebenya ese mani kpiri kweyi anu pini woteyi kawase ko Onazaret. 6 Mamani oya takirikwu ko yo Ole ko Owuso yishi, ebe ni aha yokwu. 7 Aha ba yimu ko kwepwo byoni ono kaha ka ni Olisiyas ke wayo nye shaha. 8 Owoni odo ongo mani oka abiyo ome oyagye mela ni aba ka ni wokwokwoshi la.

9 Awanyakwase ko Oyahuda ke kyogwu mela ni aka wokwokwoshi.

10 Ebeni ogbolamaga do Obulus abo ko kela kweyi Obulus kamo,

<<Ngye moya kepwo kokpagye mani gbeji wa, nshotunehe no dami oshu ko nyepwo kiyun obutu wo. 11 Doka shini opwo, osheno igwepa walo ni nggo Ojerusele koga geyagye ni. 12 Awase ko Oyahuda mun ya tawashu kpa ashishe ipu kole ko Owuso, kwe amun ya tase onu ebibye, kwi ipu kekpa kwe ebye ipu ko ogya. 13 Aba gege ko kadawo oza ni nyya ni lo. 14 Nkyogwu ko mani kamo: nkyogwu kpo Owuso ka awa Ada ka bwebe ko gbosowe mani ni amo owo okame. Ami ke kyogwu kpo Ono ni ata okpa ko Omusa kpo okpa ni gbela kawinobane. 15 Mani oni, nyyotu hin so Owuso, byoni awase mani abiyiwa gboni, mo onyiso ikwu yaba kase neshi kpase bibi. 16 Mani oni nyya takirikwu ishi kpiri ko yotu ko Owuso kpa asuse na sha.

17 Itikpi kashayi nwashika ni nbose Ojerusele ni, ngebe ni ko ga byi ikwiri ko da awoleha kpo zeshi do Owuso. 18 Ishini nyya yawoza mani pini amun ipu kekpa ishini ngmeyi kodu ko nikpiye kweyi ni. Ewa kwe egba ngmongmo yebeni lo 19 Ase ko Oyahuda ni bwo okpagye ka Asiya ni bebeni; awa abiyiwa nawa ka dawo owoni agbela oye kpa mi. 20 Kwe, awa ni bebeni ni na koza ni nyya ni ishini nyyohobu ka awonongbo 21 Oka wegba ni ngmo ishi ni nyyo obutu konongbo ni lo: <Ozani nka ni wela ko nyiso bwi ikwu ni nkyogwu mo awokwu ba nyiso kpo olayi oza ni ya ni aba kwume obutu wo ikyeni ni oma.>>>

22 Kweyi Ofelis ni gbogyogye nwashika ngmeyi kela mani mo, Ishini oteyi Olisiyas wa nyya ka dawa mo, <<Nyya kepwo kala mani, ogbepwo kwe ogbepwo lo.>> 23 Ebeni odadakare oko mo, ana yiyi kwo, ana rabo danu kweyi shawo yanu bita na byoza ni oya yimu ni wa danu.

24 Itikpi ke eno gbayayi Ofelis wa kponya nu Odurusila ni wase ko Oyahuda ni. Otoleho mo Obulus nawa shini ona pwela nu ni oyaka ikweyi kotuse ipu ko Okristi Oyesu ni. 25 Obulus ke ya kela ikweyi koneshi kpo gbiyo kpeno ko kepwo kese, Ofelis yoshi kweyi ya kamo, <<Anani gawo, owoni ngbishi nyya yogwu.>> 26 Ebeni oyotuse mo Obulus ya danu ikwiri; oza ni yani oya yogwu mona wa kela kpanu ni yoma, ikweyi koma ni oya yogwu kurutu wa kela kpanu.

27 Itikpi kishayi epa ni shigbo ni, Oposiyos Ofestus wa wo ogbolamaga. Ofelis ya yimu ko shase ko Oyahuda otu, oza ni yani osho Obulus bita oruduru ni oma.