1 Aha kamo Owuso na gbaha kweyi aga kaha. Ni asheyi ki ishu ni, ago Okos; gbebenya nu aha go Orodes, bwebe ni ago Opatara. 2 Ebeni aha pyowu niya go Ofunisiya ni, aha gipu kweyi nyiso kiyawu. 3 Nawa febe ni aba mo Osipros ni, aha bwekye nu go Osiriya. Aga sa ega ko Otaya, Ebeni owu kinyo kaha yiyo sa ni. 4 Ebeni amawo kyogwu kweyi abagye kpawa kobize oye. Bwebe koshu ko Omaku ko Owuso aka do Obulus mona ka go Ojerusele lo. 5 Ishini eno ke gye ni, aha shuwabita ga kaha. Kpiri wa, kanya wa kpa ayi wa byahoshi bose ipu ko ogya gokwunu kishi, ebe ni kpiri kaha kwagye kweyi tinarigwu. 6 Ebeni akamo Owuso na gbaha kpiyi ka, kweyi aga kpo owu awa ke kwikye go ole.

7 Aha gohobu kpiyawu kaha ka ayene, asheyi bwo Otaya go Otolemayis, ebeni aga togbogba kpawogboso kweyi abagye kpawa ke eno oye. 8 Eno ko omwepa aha shuwabita kweyi go Okesariya. Aga bole ko Ofilibus ino tono, oye ipu kase ahapa ni ashu Ojerusele ni. 9 Ogbayi nonya ene ni gboba lo ni, aba tono kela ko Owuso.

10 Aha yeno nwashika ebe ni ome inobane oye niye nu wo Agabus ni wa bwo Oyahudiya. 11 Owebe kaha, owa zogbogbo kogbeyi ko Obulus, yi gbiyinu ikpo kpabo, kweyi kamo, <<Ozani Omaku ko Owuso kani yoma: ine ko gbogbo mani Awoyahuda ni bo Ojerusele ba yo ya gbo mani, kweyi aba yo nabo dawase ni wase ko Oyahuda lo ni.>>

12 Naha pwela mani ni, kpiri kaha kpawase ni bebeni, abo Obulus mona ka go Ojerusele lo. 13 Ebeni, Obulus ke kyogwu mo, <<Ojiya ni ala ba kyegba mani, ko yotu ni na bya? Nkwobonu wiyunshu wa, ko gbumogwa kin lalo, ayimu ana yun ngmo Ojerusele ikweyi kiye ka Adole Oyesu.>>

14 Aka ma ka ma kpiri okyogwu lo, mani oni aha shobita kweyi kamo, <<Oza na Adole yimu ni na gbodagye.>>

15 Aha zishi gbayayi ebe ni ome aha liyo, kweyi ago Ojerusele. 16 Awogboso ko Okesariya ga kpaha mamani, abyaha gole kase ni aba ga bagye kpanu ni iye nu wo Omunason bwo Osipros, owinogboso nekye-nekye.

17 Ishini aha sa Ojerusele ni, awogboso yahomaba ka ayene neneshi. 18 Gbebenya, aga kpo Obulus ga mo Oyakubu; anyakwase koda ko Owuso kpiri bebeni. 19 Obulus tuwogbogba kweyi shuwepwo kojoji ni Owuso ya bwebe koko nu ipu kawase ni wase ko Oyahuda lo ni. 20 Ni apwela nu ni, kpiri wa sho Owuso iye. Ebeni akamo, <<Oyene Obulus, mase ko Oyahuda okpaku nwashika ni kyogwu ni, kweyi kpiri wa ba zotu wa ba byono ko Omusa loshu-loshu. 21 Ake ka dawa moya fase ko Oyahuda ni bokpagye ni wako Oyahuda lo ni oza mana nwanyi ono ko Omusa, amoya kamo ana ka shayi wa ofu lo ake naka kodu ko Oyahuda lo. 22 Oke wotiri shana pwo mowa. Aba yamoji yoni? 23 Ozani aba yimu sho ya ni yoma. Aha gbango ene ebe ni akwobonu gwene. 24 Ga kpawa shala ga yodu ko nikpiye dudu, kweyi awo sore kikwiri wa; shini ana winyeyi wa. Bwebe koni ananoho ya gye moza ni aka dawa ikweyi wo ni wokwokwoshi lalo, ake bagye mawo abiyo ya ko Ono ko Omusa. 25 Ela kawase ni ke wase ko Oyahuda lo ni kyogwu ni, aha kwobonu tokpa ga dawa mo, ana ka hoza ni ayipeka ni lo, ala hoyi lo, ana ka hebe kobize na babo oro ni lo, ake naka beba lo.>>

26 Mani oni eno ko omwepa Obulus kpango oni ga kweyi ka yodu ko nikpiye kpawa. Ebeni ogipu kole ko Owuso ko ga ke eno ni shishini dawa ko yodu kweyi ni, enoni, aba peshi ikweyi wa oyoye.

27 Ishini eno ahapa wa ke ya gya ni, awase ko Oyahuda ni bwagbabo ko Asiya ni mo Obulus ipu kole ko Owuso. Akpase kpiri okwunu kweyi ayo Obulus kwu. 28 Aba ngmegba kamo, <<Ango ki Izrayila ala tahabo! Ongo oni pi yoma, ni ya ge ebebenya ya fase kpiri oza bibi ikweyi kase ki Izrayila, kpo Ono ko Omusa kpo ole ko Owuso mani. Anani obyawase ni wase ko Oyahuda lo ni wipu kole ko Owuso ko byinyi webe sere mani. 29 Aka mani ikweyi koni amo Otrofimus ni bwo Efesu ni kpo Obulus ipwogya, aba ma byo Obulus byo wipu kole ko Owuso la.

30 Ebeni ogya kya, kweyi ase ba nyinya bwagbabo wonyonya, akwo Obulus, apyo bwipu kole ko Owuso wese, kweyi ebebeni ayopwunu kole ko Owuso gwu. 31 Naba yimu ko yongmo ni, oshu gebe ko oteyi kawadakare ko Oroma, mogya ko Ojerusele kya gidi-gidi. 32 Ebebeni okpawigabo kpa awadakare kweyi nyinya ga tawa. Namo kpa awadakare ni agwo Obulus kelo.

33 Oteyi kawadakare gobutu ko Obulus ga yokwu, kweyi ozoko mana yo gbo kpa ashirika epa. Ebeni odoka mo, <<Ongo mani wanoho, oji noya?>> 34 Ase ba ngmegba ba kela gogo-gogo, ase ashini ba koje, ashini ke ba koje hoha. Ela ba ga gogo-gogo oteyi kadakare gyikwikweyi gyoza ni gbodagye ni lo, mani oni omana byo Obulus gebe ko bagye kawadakare. 35 Ishini afebe kokpe ko toshi ni, awadakare nganu ngonga, ikweyi koni otu ke ewa bya. 36 Ewa kasuse gboso ba ngmegba kamo, <<Yo ngmo!>>

37 Ishini adakare ba byo Obulus gipu kebe koyagye kadakare ni, oka do oteyi kawadakare mo, <<Oya kyogwu na kela dawo?>>

Oteyi kadakare doka mo, <<Ogishi ko kose ko Ogirik? 38 Awo pini wase ki Ijip ni yase ba gwakpaha kweyi kpawo ngmase okpaku ene ni byiyo kefu ni gipu kimweshi ishi oye lalo?>>

39 Obulus kyogwu kamo, <<Nwwase ko Oyahuda la, amun Otarsus kokpagye ko Okilikiya, nwwase ko ogya nyakwu la. Kweyi Nyya bo, yun na kela dawase mani.>>

40 Oteyi kadakare danoshu ko kela, mani oni Obulus hagye ikweyi kokpe ko toshi ya sabo mana sha. Ishini asha ni, Obulus kela dawa okwunu kose Ibru: