1 Ayikoko ko Oyesu kpa awokyogwu ni bagye ko Oyahudiya ni kpiri pwo mo awase ni wo Oyahuda lo ni zela ko Owuso. 2 Ishini Obitrus go Ojerusele ni, ikpo kawogboso Oyesu ni kyogwu kpofu shoshe ni ba kwepwo mo, 3 <<Ogole kawase ni wo Oyahuda lo ashuwofu lo ni kweyi oki roza kpawa!>> 4 Obitrus kwotu ko gwikweyi kojoji ni gbodagye ni bwikyikyo mo: 5 <<Ni nyyo ogya ko Ojopa ya tinarigwu ni, Owuso gwamiyi. Nmoje byo opa ya sa wokpagye bwi iso kweyi gbagbabo ene sa ya webe hin. 6 Nyyi iyi kwo kweyi nmawobize kpebe kikyashi, kpa awoza ni ba pyipu agye bya apwa ni, kpa awigbano. 7 Ebeni npwoko ya kada ami mo, <Obitrus nyiso shini oshoko sho ha!> 8 Nke kamo, <Adole, nyya gege lo! Oza fofu oyoye go okwunu hin ebyibye walo.> 9 Oko mani ki kela bwi iso mo, <Ka yoza ni Owuso yo woza sere ni ogwu mo woza fofu lo.> 10 Omani gbodagye igbeta, kweyi ebeni apyo kwikye giso.

11 Ebebeni ango eta ni atuwoleho ebe hin bwo Okesariya ni wa hagye ofunu kole ni nyyanu ni. 12 Omaku ka dami mo na ga kpawa naka ngmishi lo. Awokyogwu ase ihiri bwo Ojopa mani byumoshi go Okeseriya, kweyi aha gipu kole ko Okoneliyos. 13 Oka daha manu mo oyoleho hagye ole nu kweyi ka danu mo, <Toleho go Ojopa ebe kongo ni iyenu wo Osimo Obitrus ni. 14 Oya kela dawo ni aba ngmawo kpole wo ni.>

15 Ishini nkwotu ko kela ni, Omaku ko Owuso sa ikweyi wa byoni osa ikweyi kaha ikyikyo ni. 16 Ebeni nroza ni Adole kani mo: <Oyohana yo obatisma kpinyo, ala ke aba yala obatisma kpo Omaku ko Owuso.> 17 Owoni Owuso dawase ni wo Oyahuda lo ni eshi byoni odaha ishini akyogwu kpa Adole Oyesu Okristi ni; ami wanoho ko wo Owuso obi koza!>>

18 Ishini apwela mani ni, ayo okwunu wa gwu kweyi aba sho Owuso iye, kamo, <<Owuso dawase ni wase ko yahuda lo ni oshu ko shagbotu shini ana gbo olayi!>>

19 Ashini kawokyogwu ni ayuwa kya kpegye ni gbodagye ishini ayo Ostivi ngmo ni nyinya gebe lenu byagye ko Ofunisiya kpo Osipros kpo Antakiya, aba kela ko Owuso dase ko Oyahuda kin. 20 Ashishini kawokyogwu ni ke, bwagye ko Osipros kpo Osirin ni ga Antakiya kweyi aki tono kela dase ko Ogirik, aba koshu neshi ka Adole Oyesu dawa. 21 Oshu ka Adole yo kpawa, kweyi ase nwashika kotata kyogwu kweyi kwikye webe ka Adole.

22 Oshu kela mani gakpaha ko oda ko Owuso nibo Ojerusele ni, kweyi ato Obarnabas oleho ga Antakiya. 23 Ishini Obarnabas fu ni, omabo neshi ni Owuso dase ni, otu nu sha kweyi otuwotugbagba mana bagye ipu kokwokwoshi ka Adole kpotu wa oye kponu. 24 Obarnabas wase neshi, Omaku ko Owuso yo kpanu kweyi ogbotuse, kweyi abyase nwashika kotata webe ka Adole.

25 Ebeni Obarnabas tikpo ko Oshawulu go Otarsus. 26 Ishini omo ni, obyo wa Antakiya. Oshawulu kpo Obarnabas wa gbayi kpase koda ko Owuso kweyi fase nwashika kotata oza, goza kishayi oye. Ipu ka Antakiya pini aya awogboso kikykyo ogwu mo Awogboso Okristi.

27 Ishi oni, ashini kawobane sho Ojerusele bita ga Antakiya. 28 Ebeni ashe ipu wa iyenu wa Agabus, Omaku yo kpanu kweyi onyiso kweyi bane mo aba wa ngmemye kotata agye ko Oroma kpiri. Omani gbodagye oyi ko Okladiya. 29 Awogboso, kyogwu ma ananoho wa na tikpo koza ko tawa ayene nibo Oyahudiya ni abo gyogye kpo oshunu. 30 Aya mani kweyi atoleho kpe eshi wa ga danyakwase bwabo ko Obarnabas kpo Oshawulu.