1 Ipu kawogboso Oyesu ogya ka Antakiya agba awobane kpawofoza, Obarnabas kpo Osimo (ni aba yogwu mo Ase Nobi ni), kpo Olusiyos ko Osirin kpo Omanayi ni abyo ipu kole ko ogbolamaga Ohiridus ni, kpo Oshawulu. 2 Ni aba geyagye da Adole kweyi ba kwokwunu ni, Omaku ko Owuso kamo, <<Ala sho Obarnabas kpo Oshawulu ko yoko ni nyyuwogwu koya ni.>> 3 Mani oni akwokwunu kweyi tinarigwu kweyi ni, ayabo wa suwa aka dawa mo ana ga.

4 Omaku ko Owuso to Obarnabas kpo Oshawulu oleho go Osalukiya, bwebe ni asheyi gega kishu ko Osipros. 5 Ishini afo ogya ko Osalamis ni, atono kela ko Owuso ipu kekpa ka Ase ko Oyahuda. Oyohana ni aba yogwu mo Omarkus ni yawu kpa awa kweyi ya tuwabo kpo oko.

6 Ishini agyehe to okpagye ni inyo shoga to ni kpiri awa fo Opafos. Ebeni amongo oye ni wase ko Oyahuda ni ya yoza kigbashi kweyi ya ziyinu winobane, iyenu wo Obar-Oyesu. 7 Owo oyole ko ogbolamaga Osagyiyos Obulus. Ogbolamaga mani wino gyoza neneshi, oziyi, oki wogbolamaga kokpagye ni inyo shogba to ni. Otoleho gebe ko Obarnabas kpo Oshawulu mo ana wa ikweyi koni oya yimu ko pwela ko Owuso. 8 Elima ino yabodiyi, (iyenu okwunu ko ose ko Girik oma), oya yimu ko yo ogbolamaga otu gbo shini onaka kyogwu kpo Oyesu lo. 9 Ebeni Oshawulu ni aba yogwu mo Obulus ni, Omaku ko Owuso yo kpanu kweyi oziyi me Elima, 10 kweyi kadanu mo, <<Owoyi ki Ibiri kweyi oki wo omonyekwotu koza kpiri ni woneshi ni! Otuwo nwonwu kpedo kozabibi wonyonya kpegya gyogya. Ishi kpiri oya yokwokwoshi ka Adole pya wokame! 11 Anani abo ka Adole ya sa ikweyi wo, oya wofiyi, oya moyoyu ke eno lo kishi gbayayi.>>

Ebebeni Elima mebwu kpebe dibu yiyi gwu, oya gyehe ya mabo ya tikpo kase ni ya pyabo ni. 12 Ishini ogbolamaga moza ni gbodagye ni, okyogwu, ikweyi koni igbashi yokwu ikweyi kozafofu ka Adole.

13 Obulus kpawoya kiyawu nu sho Opafos bita kweyi sheyi go Opega, ipu kagye ko Opamfiliya, ebeni Oyohana ni aba yogwu mo Omarkus ni shuwa bita kweyi kwikye go Ojerusele.

14 Awa ke gohobu bwo Opega go Opisidiya agye ka Antakiya. Eno kominyo agekpa ga bagye. 15 Ishini ako Okpa ko Ono ko Omusa kpa awenena kawobane kweyi ni, awoteyi kekpa toleho ebewa mo, <<Ayene, owoni ala gboshu ko tase otugbagba ala ka dawa.>>

16 Ebeni Obulus nyiso iso kweyi yuwabo kweyi kwotu ko kela kamo, <<Ase ki Izrayila kpa awase ni wo Oyahuda lo ni ba geyagye do Owuso ni, ala pwo! 17 Owuso kase ki Izrayila shawada kaha, ozuwa iso ishini awogboga okpagye ki Ijip ni, kpo oshu kabo nu okpuwogwu bose shokpagye ni. 18 Ozotu kpawa kishayi awene ipu ipu kinweshi. 19 Oyawose ahapa ni bagye ko Okana ni kya kweyi oyawase nu rogwu kokpagye wa. 20 Kpiri kawoza mani zishi goza kishayi ogbogbo ene saweho.

Itikpi koza mani, Owuso dawa awokepwo gbishini ofishi kinobane Osamuwe. 21 Ebeni adoka kose, kweyi Owuso dawo Oshawulu oyi ko Okish bwipwoma ko Obenjami kweyi owose wa kishayi awene. 22 Ni Owuso yo Oshawulu ngma ni, osho Odawuda wo ose wa. Ozani Owuso ka ikweyi nu ni oma, <Odawuda oyi ko Ojesi wase ni otu hin ya yimu ni, oya yojoji kpiri ni nyya yimu mona yani.>

23 Bwi ipwoma ko Odawuda Owuso dase ki Izrayila inongmese Oyesu byoni oshokoyi ni. 24 Ome Oyesu na kwotu koko nu, Oyohana tono ko shagbotu dase nwashika ki Izrayila kweyi yuwo obatisma. 25 Ni oko ko Oyohana ya wo okweyi ni, okamo, <Anoho ni ala bama byun we? Ami wase ni ala ba gbeyi nu lalo. Ala pwo! Oya wa itikpi hin, ni ngye ko yokpabawu kikpo nu yiyi lo ni.>

26 Ala ayene hin ki Izrayila, ayi kipwoma ki Ibirayi, kpawase kpiri ni wo Oyahuda lo ni bebe mani ko geyagye do Owuso ni, aha pini Owuso toleho koshu ngmase mani daha la. 27 Ikweyi koni ase ko Ojerusele kpa awose wa gye mo owino ngmese lo, ake gyikweyi kela kawobane ni aba ma Eno ko Minyo wonyonya ni lo. Ake yela kawinobane gya na yo Oyesu kwu yongmo ni. 28 Koni agbo ojije ko kwepwo ko yo ngmo lo ni, ayo Obilatus zoko dawa kweyi ayo ngmo. 29 Ishini ayoza kpiri ni okpa ko Owuso ka ikweyi nu ni, awa yo sa bwoshi kweyi ayo nyi. 30 Owuso ke yo nyiso bwikwu, 31 eno nwashika osayi nu dawase niba yawu kpanu bwo Ogalili go Ojerusele. Awani wo olobene nu nabani ebe kase ki Izrayila. 32 Aha ba koshu neshi dala. Okoyi ni Owuso shawokyikyi kaha ni 33 oyiya daha ayiwa bwebe ko ngo Oyesu bwikwu. Byoni ayitota ipu kokpa ko Ozabura ko omwepa mo:

<<<Awo wo Oyi hin la,

ikyeni nwa Ada wo.>

34 Omani woza ni Owuso ka ikweyi ko ngo Oyesu bwikwu, shini onaka gekwu kelo. Ayita ipu kawela mani mo,

<<<Nyya sala abo neshi ko Owuso byoni nmo nyya so Odawuda ni.>>>

35 Byoni oki ka ipu kokpa ko Ozabura oye ni mo,

<<<Oya shoyole wo kokwokwoshi bita na gekwu kweyi wowa lo.>

36 <<Odawuda yoko ko Owuso oki geyagye danu ishi nu kweyi ogekwu, ayo nyi kpa awokyikyi nu, kweyi owowa. 37 Ase ni Owuso yo nyiso ikwu ni ke wowa lo.

38 Mani oni ayene hin, nyya yimu shini alagye mo bwebe ko Oyesu pini akoshu koyo ozalabi yina dala bwebe ko ono ko Omusa: 39 Alagye mo kpiri kase ni kyogwu kpo Oyesu, ayo ngma sho ozalabi wo ni ono ko Omusa gege yo ngma lo ni. 40 Ni olemani oni ala gbera shini awoza ni awobane kani na gbodagye kpa ala lo.

41 Ala sha, alawo kela bibi ikweyi koza ni Owuso kani,

nyya yoza kigbashi na kwala shini ala gekwu,

nyya yoje ishi mani

nala ba akyogwu kpanu lo,

owoni ashe kadala!>>>

42 Obulus kpo Obarnabas ba shekpa bita, ase wa pawa mo ana wa kyela mani kadawa eno kominyo ni yawa ni.

43 Ishini angmeyi ko gbayi wa ekpa ni, Ase ko Oyahuda kpawase ni wo yahuda lo ni nwashika gboso Obulus kpo Obarnabas ni pya ba gboso Oyahuda. Ayikoko kela dawa, kyi tuwotugbagba mana yawu ipu ko oneshi ko Owuso.

44 Ni eno kominyo wani, kpiri kase ko ogya wa gbayi ba pwela ka Adole. 45 Ishini Ase ko Oyahuda mewa kasuse ni, ayanya kotata kweyi ba kela bibi ikweyi Obulus kweyi kyi sesa.

46 Ebeni Obulus kpo Obarnabas ke kyogwu gboshi lo mo, <<Ashu ko kela ko Owuso dala ikyikyo. Ala ta kala kweyi ala miyi kala mo ala shu ko pyo olayi ko gbogbo-gbogbo lo, aha pya kaha gebe kawase ni wo Oyahuda lo ni. 47 Ono ni Adole daha ni yoma:

<<<Nyyo woyoyu dawase ni wo Oyahuda lo ni,

shini bwebe wo Owuso na ngmase kese kpiri.> 48 Ishini awaseni wo Oyahuda lo ni pwela mani, otuwa sha kweyi asha Adole iye. Awase ni ashuwa ko pyo olayi ko gbogbo-gbogbo ni kyogwu.

49 Ela ka Adole ge ebebenya agbabo ni. 50 Ase ko Oyahuda ke tela ka awolodu kogya ni, kpa awolodu ka anya ni wo Oyahuda lo ba geyagye do Owuso ni. Akwotu kodo Obulus kpo Obarnabas egye kweyi ayuwa nu shokpagye wa. 51 Ayole gwomutu kikpo wa shini na wolobene ikweyi wa kweyi agawa gogya ki Ikoniya. 52 Awogboso Adole niba Antakiya otuwa shehe nwu kpo Omaku ko Owuso.