1 Ogbodagye mamani ogya ki Ikoniya: Obulus kpo Obarnabas gekpa ga kela ni ya Ase ko Oyahuda nwashika kpawase ni wo Oyahuda lo ni nwashika kyogwu. 2 Ase ko Oyahuda ni ke tela ko kyogwu ni kpawase ni wo Oyahuda lo ni okwunu kweyi ayotu wa bya kpawase ni kyogwu ni. 3 Mani oni, Obulus kpo Obarnabas gbeji ebe ni ba kela ka Adole gboshi yoya lo, Adole shawa moleho keshi nu naba tono wokwokwoshi bwebe koshu ko yoza kigbashi ni odawa ni. 4 Okunu kase ko ogya ko: ikpo oye ba gboso Ase ko Oyahuda, ikpo oye ba gboso ayikoko ko Oyesu. 5 Mani oni awase ni wo Oyahuda lo ni kpa Ase ko Oyahuda kpa anyakwase wa ga gbela kowa dayikoko ko Oyesu mani owe, kweyi ana tuwakyo. 6 Ni ayikoko ko Oyesu mani pwo ni, anyinya gawogya nyakwu ko Olikoniya, Olistra kpo Odabi kpawo okpagye ni kuwa ni, 7 ebe ni agohobu ko ko Oshu Neshi.

8 Ipu ko ogya ko Olistra ongo oye amo shikini bwipu kinanu kweyi ya gege ko yawu lo. 9 Oyakpaha tagye ya pwoza ni Obulus ya ka ni. Obulus motuse nu gye ko danogege, mani oni oyiyi kwo tiriri 10 kweyi ka danu kpoko nyakwu mo, <<Nyiso sho hagye ikpo wo!>> Ebeni ongo oni shibi hagye iso kweyi kwotu ko yawu ebebeni.

11 Ishini ewa kasuse moza ni Obulus yani, asheha okwunu ko ose ko Olikoniya mo, <<Awowuso lema byasuse kweyi sa webe ka!>> 12 Ebeni ato Obarnabas iye mo Oziyus, Obulus atiye mo Ohames ikweyi koni anu wose kela koka ni. 13 Osapa keka ni aba yogwu mo Oziyus ni ole nu yese ko ogya, obyena kposhefu wofunu ko gya, koni anu kpewa ba yimu ko peka dayikoko.

14 Ishini Obarnabas kpo Obulus ke pwoza ni aba yimu ko ya ni, ayoshiye wa sha kweyi nyinya gipu kewa, ba ngmegba mo, 15 <<Ojiyala baya mani? Aha wasuse byala la! Aha webe ni kowa tono ko Oshu Neshi la, shini ala shawoza kese mani bita, shala webe ko Owuso ni yi iso, kpo okpagye, kpi ishu kpa awoza kpiri ni bipu wa ni. 16 Nekye-nekye, oshase bita ba yoza ni shuwotu ni. 17 Kwikyikyeni oke oshiyase olobene manu yaba bwebe kawoza neshi noya ni: anu dalinyo bwi iso kpi izire ipu kishi wa; odala ozarore kweyi yotu kala sha.>> 18 Awayikoko ko Oyesu kela mani dawa, kwikyikyeni oluwono ko wasobi ko peka dawa.

19 Ebeni Ase ko Oyahuda ashini bwa Antakiya ni yo Opisidiya kpi Ikoniya, wa gyuwegya kweyi akyogwu kpela wa. Ato Obulus akyo kweyi pyo gese ko ogya, ama byo ogekwu la. 20 Ishini awogboso Oyesu ke wa gbayikweyi nu ni, onyiso kweyi kwikye gipu ko ogya. Gbebe nya anu kpo Obarnabas go Odabi.

21 Obulus kpo Obarnabas tono ko Oshu Neshi ipu ko ogya ko Odabi kweyi apyawogboso nwashika. Ebeni akwikye go Olistra kpi Ikoniya, kpa Antakiya okpagye ko Opisidiya. 22 Ada ayikoko ko Oyesu oshu kweyi tuwotugbagba mo, ana hagye loshu ipu kotuse. Afuwa mo, <<Owotiri shini ahan mowe nwashika ome shan go Obula ko Owuso.>> 23 Obulus kpo Obarnabas shanyakwase dawo oda ko Owuso kpiri, bwebe kinarigwu kpo okwunu kwokwu ayuwa nabo da Adole Owuso ni ayotu wa kpiri so ni.

24 Ishini agyehe okpagye ko Opisidiya akwikye go Opamfiliya. 25 Ebeni atono ko Oshu Neshi dase ipu ko ogya ko Opega kweyi aga Ataliya,

26 bwebe ni agipu kowu kinyo kweyi kwikye ga Antakiya, ebe ni ayuwa nabo doneshi ko Owuso ikweyi koko ni aya kweyi ni.

27 Ishini afa Antakiya ni, akpa awogboso gbayi kweyi akoza ni Owuso ya kpawa ni dawa, kpowe ni ogwa dawase ni wo Oyahuda lo kweyi yuwa kyogwu ni. 28 Kweyi abagye gbeji kpawase ni kyogwu ni.