1 Obitrus kpo Oyohana byela baka kpase, kweyi ashini ko osapa kpo oteyi kawogbeho kole ko Owuso kpa ashini ka Awosadusi wa tawa. 2 Ayanya kotata ikweyi koni ayikoko ko Oyesu epa mani bafase oza mo Oyesu nyiso bwikwu ni. Oni ya shiyase mo awase ni gekwu niba nyiso ba gbo olayi. 3 Mani oni ayo Obitrus kpo Oyohana kwu, ni eno shani, ayuwa kpo shoruduru ko gbokyi. 4 Ase nwashika ni ke pwo onototu ni kyogwu; kweyi anani ewa kawase ni kyogwu ni gokpaku eho.

5 Ni ebenya ni awoteyi ko Oyahuda kpa anyakwase kpa awofono gbayi Ojerusele. 6 Agbayi kpa Anas ni wo Oteyi kawosapa ni kpo Okayafa kpo Oyohana kpa Alekzanda kpa ashini kase bwipwoma kawosapa nyakwu bebeni. 7 Abyo Obitrus kpo Oyohana wese wahagye obutuwa kweyi akwotu ko duwoka kela mo, <<Kposhu wonya kwiye wonya ni ala ba yoza mani?>>

8 Ebeni Obitrus, nwonwu kpo Omaku ko Owuso, ka dawa mo, <<Ala awoteyi kpa anyakwase! 9 Owoni ala ba daha oka kela ikyeni ikweyi koza neshi ni ayinon pyepu-agye kpoza ni yo pyo ogege ni, 10 kpiri kala kpase ki Izrayila alagye mo: Kposhu kiye ko Oyesu Omezaya ko Onazaret ni ala yo poshi, ni Owuso ke yo nyiso bwikwu nu pini ongo ni hagye obutu kala mani pyo ogege kpiri-kpiri la. 11 Oyesu pini wase ni okpa ko Owuso kamo,

<Owikyikpo ni ala awomoda tela ni,

anu pini wa wikyikpo ni shoshi she ni la.>

12 Bwebe nu fufunu pini aba ngmase la, koni ashishe yaba ipu kese mani ni aba ngmase bwebe kiye nu ni kelo lo.>>

13 Awonongbo mo Obitrus kpo Oyohana kela dawa gboshi lo ni igbashi yuwa kwu, koni agye mawase mani yinokpa lo, agye mo awawogboso Oyesu la. 14 Ishini amongo ni adanu ogege ni ke hagye ebeni kpawa ni, agege ko kojije kelo. 15 Ebeni aka dawa mana bose shekpa ka awonongbo kweyi ba kela kpiyiwa. 16 Adiyiwa oka mo, <<Aha baya moji kpo Obitrus kpo Oyohana? Koni ananoho Ojerusele gye mo ango mani yoza kigbashi nwashika, aba gege ba tawashu lo. 17 Shini oshu mani ke naka gakpaha kase ebebenya lo, owotiri shini ahan pyango mani akpaha ko kela ikweyi kiye mani.>>

18 Ebeni ayuwogu kwikye wipu kweyi apyuwa akpaha mo, ana ka kela kwe fase oza kpiye ko Oyesu kelo. 19 Obitrus kpo Oyohana ke kyogwu mo, <<Ala ka abiyikala onya shoshi ebe ko Owuso, an pwela kala kwe an pwa ko Owuso? 20 Ikweyi koni aha ba gege ko yokwunu gwu ikweyi ko oza ni aha ma kwe aha pwo ni lo.

21 Ni onongbo pyuwa akpaha kotata kweyi ni ayuwa mo ana gawa. Koni agyowe ni aba bwu ko gbuwogo agye ni lo, ikweyi koni ase ba sho Owuso iye ko oza ni gbodagye ni. 22 Ongo ni ayoza kigbashi ikweyi nu kweyi danu ogege mani shi ishayi awene la.

23 Ni asho Obitrus kpo Oyohana bita ni, agebe kasewa ga koza ni awosapa nyakwu kpa anyakwase ka ni. 24 Ishini awokyogwu pwo mani, kpiri wa zoko wa iso kpi inarigwu do Owuso mo, <<Adole, awo ni yiso kpo okpagye kpishu kpo ojoji ni yipu nu ni. 25 Kpo oshu ko Omaku ko Owuso oyo oyole wo ada kaha Odawuda kamo,

<<<Ojiya awase ni wase koyahuda lo ni ba byotu;

ojiya ase ba gbela bibi ipu kotu wa?

26 Awose kese mani wiyiwashu,

kweyi awoteyi kpikweyi gbayi

ikweyi ka Adole kpo Omezaya nu.

27 Ohiridus kpo Opontiyo Obilatus kpawase ni wase ko Oyahuda lo ni kpase ki Izrayila gbayi ogya nyakwu kweyi agbela ikweyi ko Oyesu Oyole wo, ni oyo wo Omezaya ni. 28 Agbayi shini ana yawoza kpiri ni okwobonu gbo ipu koshu wo mo ana gbodagye ni. 29 Nabani Adole, pwoshi ni aba taha ni kweyi odaha oshu ko tono kela wo kpoko nyakwu. 30 Nabowota shini odase ogege kweyi yawoza kigbashi kpiye ko Oyole wo Oyesu.>>

31 Ishini atinarigwu kweyi ni, ebeni agbayi ni ja. Kweyi kpiri wa Omaku ko Owuso gikpiye wa kweyi akwotu ko kela ko Owuso gboshi lo.

32 Kpiri kawase ni kyogwu ni otuwa woye kponu. Ashishe ipu wa ya kamo oza ni ogbo ni wakaka nu lo, ake yojoji yi ko dudu. 33 Awayikoko ko Oyesu gohobu ko yo olobene ko nyiso ka Adole Oyesu bwikwu. Kweyi oneshi ko Owuso yo kpawa nwashika. 34 Ojije nyashishe wa lo. Awase ni gbeho kwole ni yi kpora kweyi byikwiri wa, 35 kweyi ayi ikwiri dayikoko ko Oyesu, kweyi ayiko dananoho gyogye kpoza ni oya doka ni.

36 Ebeni Isu Olawi ni amo ogya ko Osipros ni ayikoko ko Oyesu ba yogwu mo Obarnabas (asenu woyi kotugbagba), 37 yeho nu yira kweyi byikwiri wobutu ka ayikoko ko Oyesu.