1 Itikpi keneta ni Ofestus sa okpagye ko Okesariya ogo Ojerusele, 2 ebe ni awosapa nyakwu kpa anyakwase kawo Oyahuda wa kela danu ikweyi ko bibi ni Obulus yani. Kweyi abo Ofestu 3 mona tuwabo shini Obulus na wo Ojerusele, ikweyi koni gbo koyo ngmo owe ni. 4 Ofestus kamo, <<Obulus yoruduru Okesariya, oya gbeji lo ami abiyun ya gebe ni. 5 Ala shawa anyakwase kala bita na go Okeseriya kpami naga byo goda kepwo owoni oyozalabi.>>

6 Ofestu ga yeno ahata kwi igwo kpawa ome ogo Okesariya. Gbebenya oga yagye oda kepwo kweyi omana byo Obulus wipu. 7 Ishini Obulus webeni ni, awo Oyahuda ni wa bwo Ojerusele wa ni wa hagye bo, kweyi akamo ogbepwo nwashika, ake gbolobene oyoye ko biwa ikweyi ko Obulus lo.

8 Obulus ke nyepwo kiyinu: <<Nyyojije labi ikweyi ko ono ko Oyahuda kwe Ole ko Owuso kwe Ogbolamaga ko Oroma lo.>> okela ko miyinu ni, kwe ikweyi ko ono ko Ase ko Oyahuda, kweyi ko ono ko Owuso, kwe ikweyi ko Okesa, nyyoje labi lo.>>

9 Ofestus ke ya yimu ko sho ase ko Oyahuda otu, ebe ni okado Obulus mo, <<Ogbimu kogo Ojerusele shini ana kwepwo iyi hin ebe ni?>>

10 Obulus kamo, <<Nhagye obutu ko oda ko kepwo ko Ogbolamaga, ebe ni ashu ko kwumepwo ni. Nyya ase ko Oyahuda ojije labi lo, byoni awo abiyo gyeni. 11 Owoni nyyo ono kyigbo kwe nyyoje ni ashu ko yun ngmo ni, nyya tela ko gekwu lo. Owoni okwokwoshi ke yaba ipu kela ni abun mani lo, ashishe ya yun nabo dawa lo, nyya ba mo ogbolamaga ko Oroma na kepwo hin.

12 Itikpi ni Ofestus yakpaha kwa awo danela ni, okado Obulus mo, <<Okwobonu byela wo gebe ko Ogbolamaga wa, ebe ko Ogbolamaga pini oya ga la.>>

13 Itikpi kaweno gbayayi, ose Agripa kpo Obanisi wo Okesariya ko Ofestus ko togbogba. 14 Ishini abebeni ke eno nwashika ni, Ofestus kado ose ela ikweyi ko Obulus, okamo: <<Ongo oye yebe ni ba ni Ofelis yo shetu ni; 15 kweyi nggo Ojerusele, awosapa nyakwu kpa anyakwase kawo Oyahuda kela labi ikweyi ko Obulus kweyi aka dami mo na dawoshu koyo ngmo.

16 Nke kadawa mo aha ase ko Oroma gbo odu aba kwase ni amo yozalabi ni epwo lo owoni akela iyi kpiyi kpawase ni shepwo kela ikweyi nu ni kweyi danebe ko nyepwo kiyinu ikweyi kela wa la lo. 17 Ishini awa gbayi ebeni ni, ngmishi lo, gbebenya ke ngga yagye oda ko kepwo kweyi toleho mana byo wa dami. 18 Ishini awo byo woda kepwo nyiso ko kela ni, akoza labi oyoye ni nma bya aba ka ikweyi nu ni lo. 19 Ozani aba gege ya ka ni wa awashu ni ata ikweyi ko ono wa kpo ongo ni aba yogwu mo Oyesu ni gekwu ni; Obulus kamo onyiso bwikwu. 20 Ngyoza ni nyya ya ko pwela mani neshi ni lo. Ebeni ndo Obulus oka kwe ogbimu ko go Ojerusele shini ana kepwo mani iyi hin? 21 Obulus ba mo ana shanu bita oruduru; gbishini Ogbolamaga ko Oroma nawa kepwo nu. Itikpi kela mani ndawoko mana yoruduru gbishini nyya byo ga do Ogbolamaga ko Oroma.>>

22 Ni olemani oni Agripa kado Ofestus mo, <<Ngbimu ko pwela ni ongo mani ya ka ni akpaha hin.>>

Ofestus kyogwu mo, <<Oya pwela nu okyi.>>

23 Gbebenya Agripa kpo Obanisi wa ba gwakya. Aga bebe ko kepwo ko oteyi kadakare kpa anyakwase ko ogya. Ofestus toleho mana byo Obulus wa. 24 Ofestus kamo, ose Agripa kpase bebeni kpiri; mo ongo mani ni ase ko Oyahuda ni bebeni ki kpawase ni bo Ojerusele byela wa dami ikweyi nu. Angmegba mo oshu ko yiyi ke lo. 25 Ami ke mojije ni oya ko gekwu ni lo. Ni anu abiyinu pini bo Ogbolamaga ko Oroma mona kepwo la ni nyya sabo go Oroma. 26 Ami ke gbojije neshi kota ikweyi nu ga do Ogbolamaga ko Oroma lo. Ni olemani, byo webe ni obutu kala, tata wa awose Agripa owoni akikpo kela kweyi agyoza ni oya ni, nyya gboje kota ikweyi nu. 27 Ikweyi koni oya shoshi ko byase ni ayoto oruduru ga do Ogbolamaga ko Oroma kweyi koza ni oya ome ayo shetu ni lo.