1 Ishini agbo mo ahan sheyi ki ishu gi Itali ni, ayo Obulus kpa ashini kase bo oruduru ni abyuwa ga do oteyi kawadakare ogbogbo oye ko Oroma, iye nu wo Ojiliyos. 2 Agipu ko owu nyakwu ka Adramutum, ni yokwunu ega okpagye ka Asiya. Ashe iyenu wo Aristakus bwo Otasalonika okpagye ko Omasedoniya yo kpaha. 3 Gbebenya aha go Osido. Ebeni Ojiliyos yo Obulus oza neshi, oshobita mo na gebe kawoya nu, shini adanu oza ni oyayimu ni. 4 Aha nyiso bwebe ni, ikweyi aha ba ga gbabo ni owu yata bwanu ni, aha pya bweji ko Osipros ebe ni owu shashi ni. 5 Ebeni aha sheyi ki ishu ko Okilikiya kpo Opamfiliya go Omira okpagye ko Olisiya. 6 Ishini afebe ni oteyi ka adakare pyo owu ka Alegzandiriya ni ya gi Itali ni kweyi okpaha shipu nu. 7 Aha powu myomyo ke eno nwashika arikya ome aha fogya ko Osinidus la. Owu yaha gohobu ke lo, ebe ni aha pya bweji ko Okrete ebe ni owu shashi ni, asheyi kega ko Osamone. 8 Aha powu bwashikwu kega kinyo ebe ni atakirikwu aha wa bwebe ni aba yogwu mega ko gbowu. Bwebe ni go ogya ko Olasiya lenu lo.

9 Aha ngmishi nwashika ebe ni, gbishini aba gege ko powu gohobu kelo, ikweyi koni owe eno ko rimya ko yigbase shigbo. Ebeni Obulus kela dawa mo; 10 ango nmabyo iyawu ka ya shoshi lo bwebe mani gohobu. Ebi yawa towu kaha kpiyo kaha kweyi ashini ka nwashika kiba ba gekwu mamani. 11 Oshi ke yo oteyi kadakare kwu kweyi kyogwu kpela kine kowu kpino powu, otela ko pwoza ni Obulus kani. 12 Koni ebe ni owu ba hagye ni shoshi ko yagye ishi ni owu yata ni lo. Ase nwashika wa kyogwu mana ga shini ana fega ki ishu ko Ofoniksi owoni aba gege, shini ana bebeni ishi ni owu wa tani. Ofoniksi wega ni yo Okrete ni pyiyi tekye kpi ikpokyi.

13 Owu ke kye ni yata myo ni kwotu ko tota, awase mani mana gohobu kpi iyawu wa, Kweyi aga yogye ni kwagye ni shu, kweyi powu sheyi gokwunu kega ko Okrete. 14 Oke gbeji lo, owu bibi yiso kpawa aba yogu mo, <<Ikpokyi ka ahanokyi,>> ota gebe ni inyo shogba to ni. 15 Ishini oyowu kwu ni, ogege ko powu kele, kweyi aha shobita danu. 16 Afebe ni owu ba hagye ni ebeni aga bwu ge ekye agye ni inyo shogba to gbayayi ni Okawuda. Ebeni amowe ake takirikwu ko yowu leke ni agbo itikpi kowu mani na ka kya lo. 17 Ishini abyo owu leke wipu kowu nyakwu ni, agbogwa gyehe to owu kinyo bweye nu. Ayoshi ela koni oya gbo ipu kisisagye ni yega ko Olibiya ni, aya ayikyi kowu kinyo sa shini owu na to owu kinyo ga. 18 Ebeni, owu loshu-loshu ni gohobu ko tota, gbebenya akpiyo shonu bwipu ko owu, 19 Eno komweta akpiyo ashini ni wa ko owu ni shipu kinyo. 20 Mani oni, eno nwashika aha meno kwe inyiwo bose lo, owu ke yipu ko tota loshu-loshu. Agbotu maba bose kelo. 21 Itikpi koni agebe lenu gboza rore lo ni, Obulus yiso hagye otutehe wa kweyi kamo, <<Ala bi pwela hin abi powu bwo Okrete lo; ebi ni tala mani byi ya taha lo. 22 Anani nke ya bala, azotu! Ashishe kala ya gekwu lo; owu kin pini kyala. 23 Ikweyi koni otu kene oyoleho ko Owuso ni nyya gboso ni nyya geyagye danu ni hagye agbabo hin 24 kweyi Kamo, <Obulus! Ka yoshi lo, oya hagye obutu ko ogbolamaga. Kweyi Owuso ipu ko neshi nu ikweyi wo oya ngmawase ni bipu ko owu kpawo ni.> 25 Ni olemani, Ayene hin, ala zotu! Ikweyi koni nkyogwu kpo Owuso ni, oya le byo ni nka dami ni. 26 Oke ya wotiri daha shini owu na taha ga bwokpagye okwunu kinyo.>>

27 Otu ke eno komigwene yoma nowu ya taha ipu ki ishu ko Omeditaraniya ni. Otutehe kotu awopowu ma byo fokwunu kega wa. 28 Mani oni ayoza lenu gbogwa kweyi yi ta gipu kinyo, ebe ni agye mo libwu kinyo mani wikpo ogbogbo oye sawepa; azishi gbayayi aki ya mamani, kweyi owikpo awahane. 29 Ayoshi ela koni aba ga gokpo ni, asa awogye lenu ene abo geye itikpi kowu kweyi aba tinarigwu shini ebe na nya. 30 Ebeni awopowu ba yimu ko bose wa shipu ko owu; asowu leke ipu kinyo byaba yimu ko ki sawogye lenu oye geye kinyo ohobu kowu oni. 31 Obulus ke kado oteyi kadakare kpa awadakare mo, <<Owoni opowu gyelo yagye ipu kowu lo, ala ka yotuse mala ba bose lo.>> 32 Mani oni, awadakare yogwa kowu leke ni she kweyi yo owu pe ganu.

33 Ome ebenya, Obulus buwa kpiri mana roza: <<Ala bebe mani eno igwene pi yoma, kpiri kishi mani ala rojije lo ni. 34 Mani oni nyya bala, mala roza; shini ala gbolayi. Kwinyeyi kashe kala oye ya gebi lo.>> 35 Ishini okela mani kweyi ni, Obulus zikyoga, kweyi keshi ko Owuso obutu wa kpiri, ofa, kweyi kwotu ko ha. 36 Ebeni ikpiye wa loshu, kweyi kpiri wa roza. 37 Kpiri kaha ni bowu ni wo 276 ogbogbo epa sawahapa ayihiri. 38 Ishini kpiri kananoho hoza yipu ni, akpi izire kpiri ni yipu kowu ni shonu gipu ki ishu shini enu na shashi.

39 Ishini ebenya ni, opowu gyo okwunu kega lo, ake magye oye kweyi anonu powu gebe ni owoni aba gege ya hagye. 40 Mani oni ayogye lenu kowu she gipu kinyo, mamani aki yogwa ni bye ese kowu ni yiyi. Kweyi ayaki kohobu kowu yigwa shini owu na towu gohobu, ebe ni apyogo kowu tega ki ishu. 41 Owu ke wa gweji kokpagye kweyi gohobu; ogo kowu lagye kweyi ogege ko yawu lo, Kweyi ogwa kinyo yitikpi kowu kya.

42 Awadakare gbo ko yawo bo oruduru ngmo kpiri, shini anaka tagwa sheyi kega kweyi nyinya wa. 43 Oteyi kawadakare ke yimu koyo Obulus ngma, kweyi omana ka yamani lo. Ebeni Okadawa mo aseni gishi ko tagwa ona shibi ikyikyo kweyi na tagwa gega; 44 ashini na yabo byo okyokya kowu, oza ni gbodagye ome anano kaha sheyi gega ni oma.