1 Eno oye, Obitrus kpo Oyohana yawu ba gole ko Owuso ogye eta kisheno, ishi ko tinarigwu. 2 Ongo oye ni ya pyepu agye bwishi ni amo ni yagye okwunu kofunu nyakwu kole ko Owuso ni aba yo mo Opunu Shoshi ni. Kurutu aba byo wofunu kowa bikwiri ebe kawo gipu kole ko Owuso. 3 Ishini omo Obitrus kpo Oyohana ba wa gipu kole ko Owuso ni, obuwoza. 4 Ayiyi kwo tiriri, kweyi Obitrus kamo, <<Maha!>> 5 Ebeni ongo oni yiyi kwuwa ya totuse manu ya pyoje bwebe wa.

6 Obitrus ke kadanu mo, <<Ngbikwiri ko dawo lo, oza ni nke gbo ni nyya dawo. Ipu kiye ko Oyesu Okristi ko Onazaret, nyiso sho yawu!>> 7 Ebeni onganu kpa abore kweyi tabo nyiso. Ebebeni ikpo kpa aworiho nu loshu; 8 oshibi giso kweyi hagye ikpo nu, kweyi kwotu ko yawu ebeni. Ebeni ogbosuwa gipu kole ko Owuso ya yawu, ya shibi, ya sho Owuso iye. 9 Ni ase kpiri mo ya yawu kweyi yasho Owuso iye ni, 10 ishini agye manu pini wino boza ni ya yagye okwunu ko Ofunu Shoshi ni la, igbashi yuwa kwu kpiri ikweyi koza ni gbodagye kpanu ni.

11 Ishini ongo ni gboso Obitrus kpo Oyohana gebe ni aba yogwu mofunu-ekpa ko Osolomo ni, igbashi yase kpiri kwu kweyi anyinya gebe wa. 12 Ishini Obitrus mewa mani, okadawa mo, <<Ase ki Izrayila, ojiya ni omani woza kigbashi dala? Ojiya ni ala ba maha? Ala ma byo kposhu kaha kwe ebe koza neshi kaha pini ayo ongo mani yawu la? 13 Owuso ki Ibirayi kpi Ishaku kpo Oyakubu, Owuso kawo okyikyi kaha ni do Oyolenu Oyesu igyashi ni. Ala ke yo nabo dawine koshu kokpagye mo ana yo ngmo, kweyi ala tela nu obutu ko Obilatus, koni Obilatus yimu ko shobita ni. 14 Owase neshi ni gbepwo lo kweyi ala ke tela nu, kweyi ala mo Obilatus na shine ko ngmase bita dala. 15 Ala yase ni wotu kolayi yi ngmo, Owuso ke yo nyiso bwikwu. Aha wo olobene koza mani. 16 Oshu kiye ko Oyesu pini dongo mani ogege la. Ozani ala ma kpo oza ni ala gye ni gbodagye ni woko kotuse ipu kiye nu la. Byoni kpiri kala mani.

17 <<Nabani ayene hin, ngye mo oza ni ala kpa awoteyi kala yo Oyesu ni wikweyi koni ala gye lo ni. 18 Owuso kwobonu ka nekye-nekye bwokwunu kawobane mo Omezaya ya wa mowe; kweyi oyela nu gbodagye bwowe mani. 19 Mani oni ala shagbotu, shini ala kwikye webe ko Owuso, shini ona yo ozalabi ni ala ya ni yigbala. Owoni ala shagbotu, 20 ishi koshu ko Omaku yawa ni Adole kweyi oya to Oyesu ni wo Omezaya ni okwobonu shu dala ni. 21 Owotiri Oyesu na yiso gbishini Owuso ya wa kyojoji ya wo opepe byoni oshokoyi nekye-nekye bwebe kawobane nu ni. 22 Koni Omusa kamo, <Adole Owuso kala ya tinobane oye oleho, byoni otumoleho ni, oya bwipu kala. Ala geyagye do oza kpiri ni oka dala mala ya. 23 Kpiri kase ni tela ko pwela nu aba yo ngma shipu kase ko Owuso kweyi yo ngmo.>

24 Kpiri kawobane bwikweyi ko Osamuwe kpa awase ni wa itikpi nu ni, kpiri wa kela ikweyi kishi mani. 25 Ala wayi kawobane bwebe kokoyi ni Owuso she kpa awada kala ni. Okadi Ibirayi mo, <Bwebe kayi wo Owuso ya sase kese mani kpiri aboneshi.> 26 Mani oni Owuso sho oyole nu kweyi toleho ikyikyo ebe kala, ko sala aboneshi bwebe ko yananoho kala na sho ozalabi kala bita.>>