1 Obulus go Odabi kpo Olistra, inogboso Oyesu oye yebeni, iyenu wo Otimoti, inanu ni wase ko Oyahuda ni winogboso Okristi mamani, adanu ke wo Ogirik. 2 Ayene kpiri nibo Olistra kpi Ikoniya ni ba kela neshi ikweyi ko Otimoti. 3 Ikweyi koni Obulus ya yimu ko yo Otimoti na ga kpanu ni, oshopu. Oya mani ela ka Ase ko Oyahuda ni bagbabo oni gye mada ko Otimoti wo Ogirik la. 4 Ni aba bwogya bwogya ni, aka dase ono ni ayikoko ko Oyesu kpanyakwase nibo Ojerusele kwu dase kogboso ni, kweyi aka dawa mana ko ono oni. 5 Mani oni awoda ko Owuso pyoshu ipu kotuse kweyi ase nwashika ba kyogwu kurutu.

6 Aga agbabo ko okpagye ko Ofrijiya kpo Ogalatiya, ikweyi koni Omaku ko Owuso wuwobi ko tono kela agbabo ka Asiya ni. 7 Ishini awe eji kokpagye ko Omisiya ni, atakirikwu ko ga agbabo Obitiniya, Omaku ko Oyesu ke shuwa bita lo. 8 Mani oni abwa agbabo ko Omisiya kweyi go Otrowas. 9 Otu oni iyi ko Obulus iyi omongo ko Omasedoniya oye hagye kweyi ya bo mo, <<Wokpagye ko Omakidoniya wa tahabo.>> 10 Ni Obulus moza mani, aha wiyikaha shu ko go Omasedoniya, ikweyi koni aha kyogwu mo Owuso yahogu ko ga tono kela nu ogya ni.

11 Aha gbowu bwo Otrowas ga sheyi ki ishu go Osamotrasi, gbebenya ago Oniyapolis. 12 Bwe ebeni abwokpagye go Ofilipi, ogya nyakwu kikyikyo kagbabo ko Omasedoniya, ogya ni ase ko Oroma nwashika anu ni. Kweyi abagye ebeni ke eno nwashika.

13 Eno Kominyo, abose ofunu-oba gokwunu ki ishu, ebeni aha totuse mo aba pyebe ni ase ko Oyahuda ba gbayi ko tinarigwu ni. Ebeni abagye okpagye kweyi akwotu ko kela danya ni gbayi ebeni. 14 Onya oye iyenu wo Olidiya bwogya ko Otiyatera, oya tora ka akyi ni lebyo nowa ni, owonya ni ya geyagye do Owuso ni. Adole gwanotu ko zakpaha doza ni Obulus ya ka ni. 15 Ni ayobatisma, anu kpase kole nu ni, opaha kamo, <<Ala wa bagye ole hin, owoni ala kyogwu mo nwwino gbosa Adole kokwokwoshi.>> Ohokoko nu gbishini aha ga.

16 Eno oye ishini aba gebe ko tinarigwu ni, agbayi kpi isonya oye ni wo oshe ni, ogbomaku bibi ni yo ya koza ni yawa gbodagye ohobu ni. Oya byikwiri nwashika wa dawadole nu bwebe koza ni oya ka dase ni. 17 Oyinonya mani gbosaha kpo Obulus kweyi ya ngmegba mo, <<Ango mani wayole ko Owuso Ine koshu kpiri la! Aba ka dala owe ni ya ngmala ni.>> 18 Oya mani ke eno nwashika, gbishini otu ko Obulus bya, opyiyi kweyi kado omaku oni mo, <<Ipu kiye ko Oyesu Okristi nyya kado mo bose sho!>> Ebebeni omaku oni bose sho.

19 Ishini awadole ki isonya ni wo oshe mani ma mowe ko pyikwiri wa yaba kelo ni, ashabo byo Obulus kpo Osila kweyi pyuwa gopu ebe kawoteyi. 20 Abyuwa gobutu ka awigabo ko Oroma kweyi kamo, <<Ango mani wase ko Oyahuda la, aba tela ogya kaha. 21 Aba foza ni wodu kaha lo ni; aha wase ko Oroma la, aba kyogwu kpodu mani ko yoko kpanu lo.>>

22 Ewa kase kpiri nyiso kpafo kweyi kpabo pwayikweyi ko Obulus kpo Osila.

Ebeni awo kepwo oni yo Obulus kpo Osila oshiye sha kweyi yase yuwaboshi. 23 Itikpi kize ni agwuwa kotata ni, akpuwa shoruduru, kweyi aka dine ko gbeho ko oruduru mona yuwa gwu neneshi. 24 Ni azoko mani danu ni, okpuwa shoda kipu kweyi yuwikpo gbo boshi ni senu kpitiri ni.

25 Abo kotutehe kotu, Obulus kpo Osila ba tinarigwu kweyi ba wigye sho Owuso, kweyi ashini kase ni bo oruduru ni ba pwuwa. 26 Ebebeni okpagye ja kotata kweyi otu ko oruduru ja. Ipu kishi oye kponu awofunu ko oruduru kpiri gwa, kweyi ashirika nayi tananoho wa ni yi. 27 Inogbeho ko oruduru shiyi ola, ni omofunu kole ko oruduru kpiri gwogwa ni, oya mamo kwe awase ni bo oruduru ni nyinya wa la, ongmewakpa ko yiyinu ngmo. 28 Obulus ke ngmegba mo, <<Ka yiyo ofo lo! Kpiri kaha bagye ma!>>

29 Ebeni inogbeho ko oruduru mana byikwomu wa, Kweyi onyinya gipu ga gbo obutu ko Obulus kpo Osila ya wode kikpiye. 30 Ebeni obyuwa gese kweyi duwoka mo, <<Awadole, oji ni nyya ya shini ana ngmami?>>

31 Aka danu mo, <<Kyogwu kpa Adole Oyesu, aba ngmawo kawo kase kole wo.>> 32 Ebeni atono kela ka Adole danu kpa ashini kase kole nu kpiri. 33 Ototu oni obyuwa ga yuwipi na kweyi ebebeni ayobatisma, anu kpase kole nu kpiri. 34 Ebeni obyo Obulus kpo Osila gole nu ga dawoza re. Anu kpase kole nu shotunehe ikweyi koni anani akyogwu kpo Owuso ni.

35 Ishini ebenya ni, awino kepwo ko Oroma tawogbogbo-gbipu oleho mo, <<Ala shango ni bita na ga wa.>> 36 Mani oni Inogbeho ko oruduru kado Obulus mo, <<Awino kepwo toleho wa mo na shawo kpo Osila bita. Nabani ala ga kala. Ala ga kpomene.>>

37 Obulus ke ka dawogbogbo-gbipu mo, <<Akwaha kpepwo labi oyoye lo, kwikyikyeni ayaha aboshi iyi kananoho, aha ke wase ko Oroma la! Akpaha shoruduru. Anani aba yimu ko yaha ngma kyokyokyo? Aayi! Awigabo ko Oroma na wa abiyiwa wa ngmaha gese.>>

38 Awogbogbo-gbipu ga ka dawo kepwo; kweyi ishini apwo mo Obulus kpo Osila wase ko Oroma ni, oshi yuwa kwu. 39 Mani oni ga shagye dawa; ebeni abyuwoshi bose shoruduru, kweyi abuwa mana shogya bita. 40 Ishini Obulus kpo Osila bose shoruduru ni, agole ko Olidiya. Aga tawo ogboso ebeni, atuwotugbagba, kweyi aga wa.