1 Eno ko Opentikos, kpiri kase ni kyogwu kpo Oyesu ni gbayi ebe oye kponu. 2 Ebebeni apwegba bwakpa byeya kowu loshu ni yata, kweyi yole ni abanu ni kpiri yigwu. 3 Ebeni amoje byigbenu ko ola, kweyi awigbenu kola mani bose wasa dananoho wa. 4 Kpiri wa nwu kpo Omaku ko Owuso, kweyi akwotu ko kela awose gogo-gogo ni Omaku ko Owuso dawa ni.

5 Anani agbawase ko Oyahuda ni bo Ojerusele ni, awa bwo okpagye gogo-gogo ipu kese kpiri, agboshi ko Owuso kiso. 6 Ishini apwegba mani ni, ase lewa wa gbayi ebe oye kponu. Kpiri wa shotunehe ikweyi koni apwawo kyogwu ba kela okwunu ko ose wa. 7 Igbashi kwuwa kotata kweyi adoka mo, <<Awase ni ba kela mani wase ko Ogalili lalo? 8 Ojiya ni kpiri kaha pwuwa ba kela ose kaha? 9 Aha bwo Opatiya kpo Omidiya kpe Elamu, kpo Omesopotamiya, kpo Oyahudiya kpo Okapadokiya kpo Opontus kpa Asiya, 10 ashini ka bwo Ofrijiya kpo Opamfiliya, ashini ka bwi Ijip kpa agye ko Olibiya ni yo kwo Osirin ni, ashini ka bwo Oroma, 11 kawase ni wo Oyahuda kpa awase ni wo Oyahuda lo ni, kpa pyopya gipu ko Oyahuda ni, kweyi ashini ka bwo Okrita kpa Arabiya, kwikyikyeni kpiri kaha pwuwa ba kawoza nyakwu no Owuso ya ni okwunu ko ose kaha!>> 12 Kpiri wa igbashi yuwa kwu kweyi agyoza koya lo kweyi aba diyiwa oka mo, <<Omani woji oni?>>

13 Ashishini wa ke ba yawo kyogwu eye kweyi ba kamo, <<Awa mani gwinyi ya!>>

14 Ebeni Obitrus nyiso hagye kpa ayikoko ko Oyesu igwoye oni, ozoko iso kweyi ka dawa mo, <<Ala ase ko Oyahuda, kpase kpiri ni bipu ko Ojerusele ni, nyya kela mani dala, ala ya akpaha tagye shini na nyalagbo kela mani. 15 Awase mani gwinyi byoni ala ba ka ni lalo; Omani wogye ahane kotukpokyi kin pini yoma! 16 Omani ke wela ni inobane Ojuwel ka ikweyi nu ni mo:

17 <Owuso kamo, oza ni nyya ya eno ko gwejeji ni yoma:

nyya toleho ko Omaku hin ya dase kpiri.

Kweyi ayi kala nongo kpanya ba tono kela hin,

ayi kala nongo bamo osayi,

asawukye kala ba nana.

18 Kwayole hin ango kpa anya,

nyya yo Omaku hin tipu wa,

kweyi aba bane kela hin.

19 Nyya yawoza ki igbashi bwi iso

kpo okpagye,

oyi, ola, kpiwola zobi;

20 eno ya pya dibu,

kweyi oya ya pya gola byo oyi,

ome Eno nyakwu ka Adole kpi igyashi nu nawa.

21 Ebeni, ase ni shogwu ya Adole ko tabo, Adole ya ngmanu.>

22 <<Ala yakpaha tagye shini ala pwela mani, ase ki Izrayila! Oyesu ko Onazaret wase ni Owuso shu kweyi okyogwu kpanu bwebe kawoza ki igbashi ni Owuso ya dala bwebe ko Oyesu byoni ala abiyikala gyeni, ikweyi koni ogbodagye ipu kala ni. 23 Owuso kwobonu gbo mo aba yo Oyesu ya nabo dala; kweyi ala yawine kozalabi yongmo bwebe koyo poshi. 24 Owuso ke yo nyiso bwikwu, ongma nu showe kikwu kpo oshu nu, oyikwu gboshu ko yo shetu lo. 25 Odawuda kela ikweyi nu mo:

<<Nma Adole obutu hin ipu kishi kpiri;

oyabore hin, kweyi nyya yoshi lo.

26 Ni olemani oni otu hin sha,

kweyi okwunu hin ya sho Owuso iye.

Koni ami, ya gekwu ni,

nyya yotuso,

27 ikweyi koni oya nwanyi ami ipu ka aleku lo;

oya shoyole wo neshi bita na wowa ipu kamiri lo.

28 Oshiyami owe ko pyo olayi,

kweyi obutu wo nyya shotunehe.>

29 <<Ayene hin, owotiri na kadala kpoko nyakwu ikweyi ko okyikyi kaha ni agyo ni, Ose Odawuda. Ogekwu kweyi ayo nyi kweyi amiri nu yebe mani kpaha kwikyikyeni. 30 Odawuda ke winobane kweyi ogyoza ni Owuso shokoyi ni: Owuso gwene mo oya yoyi kipwoma nu oye ya wose, byoni Odawuda we ni. 31 Odawuda mawoza ni Owuso yawa ya ohobu ni, mani oni okela ikweyi konyiso ikwu ko Omezaya ishini okamo:

<Ashobita ipu kawase ni gekwu ni lo;

ikpiye nu ya wowa ipu ka amiri lo.>

32 Owuso yo Oyesu mani nyiso gbolayi kweyi kpiri kaha wolobene kokwokwoshi mani. 33 Onyiso kweyi ga yagye abore ko Owuso, Adanu, kweyi onyo Omaku ko Owuso byoni oshokoyi ni. Ozani ala ba ma kweyi ba pwo mani weshi nu ni oyi tipu kaha ni. 34 Odawuda abiyinu pini giso lalo; kweyi oke kamo:

<Adole ka da Adole hin mo:

<<Yagye abore hin ebe ni

35 gbishini nyya yawo omonyekwotu wo ba woka kikpo wo.>

36 <<Ni olemani, kpiri kase ki Izrayila na gye kwokwoshi mo, Oyesu mani nala yo poshi ni wase ni Owuso yo wa Adole kpo Omezaya ni!>>

37 Ishini ase pwoza ni mani, otu duwose kweyi aka do Obitrus kpa ashini ka ayikoko ko Oyesu mo, <<Ayene hin aba ya moji?>>

38 Ebeni Obitrus ka dawa mo, <<Ananoho kala na shagbotu kweyi ana yala obatisma oyoye ipu kiye ko Oyesu Okristi shini ana yozalabi kala gbala; kweyi ala ba pyeshi ko Owuso, ni wo Omaku ni. 39 Ikweyi koni Owuso shokoyi mani dala kpa ayi kala kpa ashini kase ni bebe lenu ni, kpiri kawase ni Adole kaha Owuso yuwogwu diyinu ni.>>

40 Obitrus buwa kweyi kela nwashika dawa mo, <<Ala ngmiyi kala shipu kowe ni yawa tase bibi mani ni!>> 41 Ase nwashika kyogwu kpela nu kweyi ayuwo obatisma, kweyi enoni ase gokpaku eta wa gipu kikpo wa. 42 Azishi wa ba foza bwebe kayikoko ko Oyesu, aba rema dudu, aba roza dudu kiba tinarigwu dudu.

43 Owuso ya ayikoko ko Oyesu yoza ki igbashi nwashika kweyi igbashi yase kpiri kwu. 44 Kweyi kpiri kase ni kyogwu ni gohobu ko rema dudu kweyi ayoza ni agbo ni yiko dudu kpiyi wa. 45 Ayoza kpiri kpiyo ni agbo ni yira kweyi yikwiri yiko da ananoho gyogye kpo oza ni oya doka ni. 46 Awokyogu ba gbayi kweneno ipu kole ko Owuso. Kweyi aba roza dudu kpotunehe ipu kolewa kpotu shosha, 47 aba sho Owuso iye, kweyi aba shotunehe kpiyiwa bwebe kase kpiri. Kweyi kweneno Adole yuwa ba nwashika, awase ni angmawa ni.