1 Agripa kado Obulus mo, <<ndawoshu ko kela okwunu kiyo ebeni.>> Mani oni Obulus zabo iso kweyi nyepwo kiyinu mo:

2 <<Eshi wo na yo gbogbo Ose Agripa! Nshotunehe ni ikyeni nyya nyepwo kiyu hin obutu wo ikweyi koza kpiri ni awase ko Oyahuda mani ba ka ikweyi hin ni, 3 nshotunehe ni awo gyodu kase ko Oyahuda kpiri kpawashu wa ni. Nyya bo mo zakpaha dami kpotumene.

4 Kpiri kase ko Oyahuda gyoyagye hin bwishi ni nwwisongo ni. Agyoza ni nyya ipu koyagye hin kpiri ni, bwokpagye hin ikyikyo ome Ojerusele. 5 Agye gyun kpiri, owoni aba kyogwu ko yolobene, kikyikyo nyyipu kikpo ni loshu shoshe ipu ko owe kaha ni, ikpo ka Awofarisi. 6 Kweyi anani nhagye koni aba kumepwo ikweyi koni nyyotu so okoyi ni Owuso she dawada kaha ni. 7 Omani pini wokoyi ni ose igwepa kase kaha ba yiyitagye ko wa nye, byoni aba geyagye do Owuso ke eno kotu ni. Abaga-edu, ikweyi kiyitagye mani pini ase ko Oyahuda mani ba kwumepwo ma! 8 Ala ni bebeni mani, ojiya ni olono dawa ko kyogwu mo Owuso ya yase ni gekwu ni ya nyiso?

9 <<Ami abiyun mamo nshu ko yojoji ni nyya gege ya ni shina wobi kela ko Oyesu ko Onazaret. 10 Ozani nyya Ojerusele ni oma. Npyoshu bwebe ka awosapa nyakwu kweyi kwase ko Owuso nwashika shoruduru; kweyi ishini aba kela ko yuwa ngmo ni, nwwoye ipu kawase ni tabo ni. 11 Ishi nwashika ndawowe ipu kawekpa kweyi takirikwu ko yuwa na shotuse wa bita. Otu hin bya kpawa gbishini ngga wo ogya nyakwu ko ga dawegye.

12 Ozani byun ya go Odamasko ni oma, awosapa nyakwu damoshu ki tumoleho. 13 Abaga-edu! Nyyikweyi ko owe isheno nmola ni ya yu sheno ni bwokpowuso ya yu webe hin kpawase ni yawu kpami ni. 14 Kpiri kaha gbo okpagye, kweyi npwoko ya yumo gwu okwunu ki Ibru mo, <<Oshawulu, Oshawulu! Ojiya noya damegye? Oya diyo egye byo onya ni ya tela ko okposhi ka Adole nu ni.>

15 Ndoka mo, <<Awo wanoho, Adole? Ebeni Adole kyogwu mo, <<Ami Oyesu, noya damegye ni. 16 Nyiso shini ohagye. Nbose dawa ko sho shini owoyole hin. Oya kela koza ni oma ebe hin ikyeni kpoza ni nyya wa shawo ohobu ni. 17 Nyya ngmawo shabo kase ki Izrayila kpawase ni wase ko Oyahuda lo ni nyya toleho ebe wa ni. 18 Oya gwawiyi kweyi pyawa bwebe dibu webe yoyu ki bwoshu ki Ibiri gebe ko Owuso, shini bwebe ko totu sun wa ana yozalabi wa gbuwa kweyi aba zebe ko yagye wa ipu kase ko Owuso.>

19 Ni olemani oni Ose, Agripa, ntela ko yoko kpoza ni agwamiyi ma bwi iso ni lo. 20 Ntono dase wotiri shini ase na shagbotu kozalabi wa kweyi kwikye gobutu ko Owuso kweyi yoza ni ya sayi mo ashagbotu ni, kikyikyo ipu ko Odamasko, kpo Ojerusele, kpokpagye ki Izrayila kpiri, kpokpagye kawase ni wase ko Oyahudiya lo ni. 21 Ozani ya nase ko Oyahuda mani yun kwu ipu kole ko Owuso oma, kweyi atakirikwu ko yun ngmo. 22 Owuso ke yipu ko tumabo bwishi oni wikyeni, mani oni nhagye ebe ni ya yolobene dananoho, kayeke kanyakwase. Ozani nyya ka ni woye kponu kpoza ni awobane kpo Omusa kamo oya wa gbodagye ni: 23 mo, Omezaya yawa mowe, kweyi ya wa kikyikyo ko nyiso ikwu, ko tono koyoyu mo Owuso ya ngmase, kase ko Oyahuda kase ni wase ko Oyahuda lo ni.>>

24 Ni Obulus ya nyepwo kiyinu ni, Ofestus kyaneha mo, <<Oya nyoza, Obulus! Ozagyogye nwashika yo ya nyoza.

25 Obulus kyogwu mo, <<Abaga-edu! Nnyoza lo, Nyya kela kokwokwoshi ni gbikweyi ni la. 26 Abaga-edu Ose Agripa! Nyya kela dawo gboshi lo, ikweyi koni ngye mawo gyawoza mani kpiri. Ngye kamo awoza mani kpiri bipu kotu wo, ikweyi koni agbodagye ebe teba la lo. 27 Ose Agripa awo kyogwu kpawobane? Ngye mokyogwu kpawa!>>

28 Agripa kado Obulus mo, <<Oma moya gege ya yun ya wino gboso Oyesu ipu kishi gbayayi mani?>>

29 Obulus kamo, <<Ko wishi gbayayi ko wishi nwashika, Nyya bo Owuso mawo kpashini kala ni ba pwun ikyeni ni ala wa woza ni nwwe ni, oza ni nyya yimu shala ka we lo ni wa ko kwala shetu byami mani!>>

30 Ni oka mani ni, ose kpo ogbolamaga kpo Obanisi, kpase ashini kpiri takpa nyiso, 31 Abose wa, ba ka diyiwa mo, <<Ongo mani yojije ko yo ngmo kwako byo go oruduru lo.>>

32 Kweyi Ose Agripa kado Ofestus mo, <<Ongo mani bi kwobonu byela nu gebe ko Okesa la lo, abi ba shobita.>>