1 Awashe bwogya ko Oyahudiya ga Antakiya kweyi akwotu ko fawo gboso oza mo, <<Owoni ashala ofu byoni ono ko Omusa ka ni lalo Owuso ya ngmala lo.>> 2 Elamani yo Obulus kpo Obarnabas tawashu kotata kpawa. Ebeni asho Obulus kpo Obarnabas kpa ashini ipu kawase ni kyogwu mana go Ojerusele ebe kayikoko ko Oyesu kpanyakwase ikweyi kela mani. 3 Awogeyagye do Owuso gwagye tuwotu, kweyi abwagye ko Ofunisiya kpo Osamariya, aka dawa ma awaseni wo Oyahuda lo ni kyogwu kpo Owuso. Oshu mani yotu kawase ni kyogwu nwashika sha kotata. 4 Ishini ake fo Ojerusele ni, awogeyagye do Owuso kayikoko ko Oyesu kpanyakwase, akojoji ni Owuso yoko kpawa yani ashotunehe. 5 Ebeni ke awase ni kyogwu ni bikpo ka Awofarisi ni nyiso kweyi kamo, <<Owotiri shini awase ni wase ko Oyahuda lo ni ana shuwofu shini ana ki yuwa nagye mo owotiri shini ana geyagye dono ko Omusa.>>

6 Awayikoko kpa anyakwase gbayikweyi kela mani. 7 Na kela nwashika ni, Obitrus takpa nyiso kweyi kadawa mo, <<Ayene hin, alagye nekye-nekye mo Owuso shun ipu kala, shini bwebe hin awase ni wase ko Oyahuda lo ni na pwo Oshu Neshi ko Owuso ana yotuso. 8 Owuso ni gyotu kananoho ni, sayi dase manu shawase ni wo Oyahuda lo kweyi dawo Omaku ko Owuso byoni odaha ni. 9 Oyaha kpawa gogo lo; oyozalabi wa yigbuwa ikweyi koni akyogwu ni. 10 Ni olemani oni ojiyala ba yimu ko mo Owuso ma, kweyi ala ba gbiyo lenu sawogboso naha kwe awokyikyi kaha bagege kobi lo ni? 11 Aayi! Owoni aha gbotuse angmaha bwebe koneshi ka Adole Oyesu byoni angmawa ni.>>

12 Kpiri kikpo sha, kweyi ba pwela ni Obarnabas kpo Obulus baka ikweyi kawoza ki igbashi ni Owuso yoko kpawa ipu kase ni wo Oyahuda lo ni. 13 Ishini akela kweyi ni, Oyakubu takpa nyiso kamo, <<Ayene hin, ala pwun! 14 Ikyikyo Osimo kadaha owe ni Owuso gebe kase ni wo Oyahuda lo ni, kweyi shase ipu wa ko wase nu. 15 Ela kawobane kyogwu kpo mani byo ni okpa ko Owuso ka mo:

16 Adole kamo, <Itikpi komani nyya kwikye,

kweyi nyya wa kya adaba ko Odawuda ama.

Nyya kyoza ni ayi kye ni ma,

kweyi nyya wa kyanu ya neshi.

17 Mani oni kpiri kase ba tikpo hin,

kweyi kpiri kase ni wo Oyahuda lo ni nyyuwogwu bawa akan.

18 Mani oni Adole ni yase gyoza mani gbeji gawa ni pini kala.>

19 Oyakubu ki kamo, <<Omoma kotu hin, ela mani naka byawase ni wo Oyahuda lo ni pya webe ko Owuso ni otu lo. 20 Oya shoshi ahan tenena dawa mo anaka roza keka lo, kpeba boba, anaka hoyi kwebe ni ashoko lo ni lo. 21 Nekye-nekye ase ba ko ono ko Omusa ipu kekpa eno kominyo kpiri aba fuwela nu ogya kpiri.>>

22 Ebeni ayikoko ko Oyesu kpa anyakwase kpa awase ni ba gbo so Oyesu kpiri kyogwu kweyi ashase epa ipu wa kweyi tuwoleho ga Antakiya kpo Obulus kpo Obarnabas. Ashase epa ipu wa ni awogboso Oyesu ba muwa gyiyi ni, Oyahuda ni aki ba yogwu mo Obarsabas ni kpo Osila. 23 Atuwoleho kpo okpa mo, Bwebe kayene kala ayikoko ko Oyesu kpanyakwase, gebe kawase ni wo Oyahuda lo ni zo Owuso agye ka Antakiya kpo Osiriya kpo Okilikiya, aba tala ogbogba. 24 Aha pwo mo ashini kase ipu kaha bose yaha gyelo baga ngala otu iso kpedo koza ni aba ka ni. 25 Kweyi kpiri ka aha kyogwu kweyi asha ayoleho tuwoleho ebe kala. Kpa ayene ka aha moshi Obarnabas kpo Obulus. 26 Ango mani zolayi wa ipu koko ka Adole Oyesu Okristi. 27 Mani oni, aha kyogwu kweyi to Oyahuda kpo Osila oleho shini ana kadala oza ni aha tani. 28 Aha kpo Omaku ko Owuso kyogwu shini ahan ka gbiyo lenu ni shawoni sala lo itikpi ko ono mani. 29 Alaka roza ni ayi deka nilo, alaka hoyi kpebe ni ashoko lo ni kpeba boba. Owoni ala bwose shawoza mani, ala yoza neshi.

30 Ayoleho ni atuwoleho ni nyiso ga Antakiya, ebe ni aga kpawogboso Owuso tukpa kweyi akyoleho dawa. 31 Ni amokpa ni, oshu oni tuwotugbagba kweyi otuwa sha. 32 Oyahuda kpo Osila wa awinobane, azishi kela nwashika kweyi odawoshu kpotugbagba. 33 Ishini abagye kpawa kishi gbayayi ni, aka dawa mo ana gebe kawase ni tuwoleho ni kpotu mene ipu ko Okristi. 34 Osila ke mamo shoshi ko yebe ni kpawa ome. 35 Obulus kpo Obarnabas bagye Antakiya kishi gbayayi, ebe ni awa kpashini kase fase oza kweyi tono kela ka Adole.

36 Ipu kishi oye, Obulus kado Obarnabas mo, <<Ahan gawogya ka ayene ka aha ebe ni aha tono kela ka Adole dawa ni, shini ahan gyuwama. 37 Obarnabas yimu shini Oyohana ni aba yogwu mo Omarkus naga kpawa, 38 Obulus kema byo oshoshi koga kpanu lo, ikweyi koni oshuwa bita Opamfiliya ni, otela koyoko kpawa gigbeji koko wa. 39 Kweyi awashu loshu nyiso otutehe wa kweyi akabo. Ebeni Obarnabas zo Omarkus kweyi asheyi ki ishu go Osipros. 40 Obulus ke sho Osila kweyi aga wa, ayene yuwa nabo deshi ka Adole. 41 Ago okpagye ko Osiriya kpo Okilikiya kweyi ba tawogboso Oyesu otugbagba.