1 Ishini apwo ka agye ni, Obulus yawogboso gwu kweyi tuwotugbagba kamo Owuso na gbaha. Ebeni oshuwa bita kweyi go Omasedoniya. 2 Obwa agbabo oni kpiri kweyi ya tase otugbagba. Ebeni owo Akaya, 3 oyagye ebe ni koya eta. Oya wiyinushu kogo Osiriya ishini ogye mawa Oyahuda ba gbela bibi ikweyi nu; ebe ni okwikye bwako Omasedoniya. 4 Ebeni Osopata oyi ko Opiros bwo Oberiya, Aristakus kpo Osekondus bwo Otasalonika; Ogayos bwo Odabi; Otikyikwus kpo Otrofimus bwagbabo ka Asiya, kpo Otimoti byoshi. 5 Abo ohobu ga gbeyi kaha Otrowas. 6 Aha sheyi ki ishu bwo Ofilipi ishini arimya ki ikyoga ni gbo oyisi lo ni kweyi ni, kweyi itikpi keno eho aha ga tawa Otrowas, kweyi abebeni kobize oye.

7 Eno ko ominyo onose agbayi ko rema kozarore. Obulus kela dawa, Obulus kela dase kweyi yipu ko kela gbishini otubi, koni ebe nya oya ganu ni. 8 Akwola emu nwashika ipu koda ki iso ebe ni aha gbayi ni. 9 Isongo oye iyenu we Eyutiko yagye ofunu-owu, ni Obulus yipu kela ya ka, ola yo Eyutiko bize gebe lenu gbishini ofa gbo bwo oda ki iso komweta wo okpagye. Ishini anganu iso ni ogekwu. 10 Obulus ke sa wokpagye kweyi wa gboso kweyi kwo botu. Okamo, <<Ala ka byotu lo, otayayo yiyi!>> 11 Ebeni Obulus kwikye goda ki iso, ga roza ka Adole kpawo gboso. Ni okela dawa gbeji ni, gbishini ebenya, Obulus nyiso kiyawu. 12 Abyi isongo oni gole kpo olayi kweyi ashotunehe ipu ko tuwa nwashika.

13 Ebeni aha kwohobu kweyi gipu kowu kinyo sheyi ki ishu ga Aso, ebe ni aha baga zo Obulus. Ogbo mani ikweyi koni oya yawu kikpo. 14 Kweyi, ishini otaha Aso ni, aha zo gipu kowu kweyi byo go Omitilene. 15 Ebeni, asheyi ki ishu go Okiyos eno ko omwepa. Itikpi ke eno oye afo Osamos. Kweyi eno komwepa afo Omiletus. 16 Ikweyi koni Obulus gbo ko bwe Efesu, shini naka ngmishi oyagye ka Asiya lo. Koni oya yawu papa ko go Ojerusele, enoni weno ki Imya ko Opetiko, owoni oya gege.

17 Bwo Omiletus Obulus otoleho go Efesu, kweyi ka danyakwase ko gboso Oyesu mana ga tanu. 18 Kweyi ishini awebe ni, okadawa mo, <<Ala gyojoji ni nyya ishini nyyo kpala, bwikyikyo ke eno ni nwo okpagye ka Asiya ni. 19 Nyya yoko hin kweyi zikweyi iso lo kpize iyi byo oyole ka Adole, ishini ase ko Oyahuda ba tikpo ko yun ngmo ni. 20 Ala gye mo nteba koza niya talabo ni dala lo, ishini nyya tono ya foza ese kpo ole kala ni. 21 Npyase ko Oyahuda kpa awase ni wo Oyahuda lo ni akpaha ko shagbotu kweyi kwikye webe ko Owuso kweyi kyogwu kpa Adole Oyesu. 22 Anani ikweyi ko ni geyagye do Omaku ko Owuso nyya go Ojerusele, koni ngyoza ni yaga tami ebe ni lo. 23 Ozani nggye ni wo, Omaku ko Owuso pyumakpaha mo ogya kpiri ni nga ela kpo oruduru ba gbeyi hin. 24 Ami ke ya byotu kpoza ni yawa tami ni lo, oneshi nu wa koni na ngmeyi koko ni Adole Oyesu dami ni. Oko ni wako kadase oshu neshi ikweyi keshi ko Owuso.

25 <<Ami gyehe ipu kala kpiri, ya tono ko Obula ko Owuso. Kweyi ngye mo ashishe ipu kala ya miyi hin kelo. 26 Mani oni, Ami ka dala ikyeni: owoni ashe kala nyowe, ngbabo ipunu lo. 27 Ikweyi koni, Ami ya kwikye itikpi ko koshu kpela ko Owuso kpiri dala lo. 28 Alagbera kpiyikala, kpa awobize kpiri ni Omaku ko Owuso dala ko yiyi kwo ni. Ala wawine ko gbeho koda Owuso, ni oya wakakanu bwebe ko oyi ko Oyi nu ni. 29 Ami gye mo itikpi koni nga hin, awiwo-pashi ba wipu kala, kweyi aba yala ofo. 30 Ishi yawa ba ni ashini bwipu kikpo kala ba shokame ko kpawo kyogwu shini anagbosu wa. 31 Ni olemani, ala gbera! Ala ra mo ipu kishayi eta nshibita ko pyala akpaha lo kotu ke eno kpize iyi hin. 32 Kweyi nabani, inya bo Owuso ikweyi kala, kpela keshi nu, ni talabo ni, ni ki ya dala aboneshi ni Owuso gbo dase nu ni. 33 Nyya mehe kiyo ka ashishe lo, azurupa, ozinariya, kwe iyo kikpiye. 34 Ala, abiyikala gye mo, abo hin yoko kweyi npyoza kpiri ni ami kpa awase ni bagye kpami ni ba yimu. 35 Ipu koza kpiri ni nyya ya, nyya shala mo ahan takirikwu shini ntawase ni gbojije lo ni abo, shini ahan rela ni Adole Oyesu ka ni, <Otunehe yo kpase ni zeshi shase ni nye ni.

36 Ishini Obulus kela mani kweyi ni, okwagye kpawa dudu kweyi tinarigwu. 37 Akwo Obulus botu, kweyi ba kyegba kamo Owuso na gbaha. 38 Abyotu kela kpiri ni okani mo aba miyiwa kelo. Kweyi abyoshi gowu kinyo.