1 Suku maku ma malala tsu kuneꞋe a kubana u vuza vu tsugono vi iɗika,

n ɗa mu uta̱ a Sila o tono nu n ɗa n uye u kakamba,

a kubana a kusan ku singai ku Sihiyona.

2 A̱ma̱ci aza o Mowabu o okpo ta̱ uteku tsu nnu

n na o lokoi a cikinda

ɗa a wacuwai ɗe a kapasa ko kuyene ku Anu.

3 <<Nekei kadanshi,

ka̱ta̱ i yaꞋan kasingai,

pala tsu uteku tsu maɗanga ma na me ci neke kulu

a kanna ku usuɗukpi,

ka̱ta̱ vu ka̱sukpa̱ tsu tsu uvuka a̱ kulu ku nu.

A̱ tsu olokushi a ɗa, sokongu tsu a̱ ubuta̱ u na vuza we kene tsu ba.

4 ka̱sukpa̱i aza a Muwabu a na

o lokoi o yongo n a̱ɗa̱,

okpoi aza a na a kisa le,

a̱ ubuta̱ wa aza a na a kuna le.

Keneki ka atakaci ki ta̱ a kuyawa a uteku,

ka̱ta̱ munuka mo kotso,

aza a̱ vishili feu i ta̱ a̱ kuka̱sukpa̱ iɗika ya.

5 N ucigi Vuzavaguɗu wi ta̱ a kuzuwa kakuba ko tsugono,

n kasingai ka̱ta̱

vuza yoku e kefeku ka Dawuda

a̱yi na u ci yaꞋan afada n kasingai,

ka̱ta̱ u yaꞋan moloko u tuka̱ n kasingai.>>

6 Tsu pana ta̱ ɗe a̱ra̱ɗi a aza a Muwabu,

uteku tsu na wi n a̱ra̱ɗi,

n ugbamukaci, n a̱ra̱ɗi kpamu koɓolo n ishikushi i ni.

Ama a̱ra̱ɗi a̱ ni gbani ɗa.

7 Adama a nannai yaꞋan aza a Muwabu a̱ shika̱ adama a̱ ka̱ci ke le.

Shika̱i

ka̱ta̱ i yaꞋan una̱mgbuka̱tsuma̱

adama a uma a Kiri-harese.

8 Ashina o Heshibon a lumba ta̱,

koɓolo n itacishi i Sibuma feu.

Ngono ma aduniyan

n la̱nga̱sa̱ ta̱ itacishi i na i laꞋi n ugaꞋin,

i na i tatsai ali i yawai Jaza

ali a kubana a kakamba.

Aralu e le a walai

ali a yawai a mala

9 Ɗaɗa n shika̱i tsu na Jaza u shika̱i,

adama a itacishi i Sibuma.

n ta̱na̱ta̱ngu wu ta̱ n kujilya.

Avu Heshibon n Eliyali,

KacaꞋa ka̱ ma̱za̱nga̱ adama a umaci u na u geꞋwei koɓolo n ayin a vikyaꞋa a̱ nu

ka yawa ta̱ uteku.

10 Ma̱za̱nga̱ n kupana ku yoꞋo ma buwa lo a ashina a ba.

A ashina a itacishi babu vuza na u kuyaꞋan kacaꞋa ko vishipa.

Babu vuza na u kudoku wa pisha ma̱kya̱n

a̱ ubuta̱ u kupisha u le,

adama a na n zuwa ta̱ uteku u ma̱za̱nga̱ wa.

11 Adama a nannai ka̱ɗu ka̱ va̱ ka̱ na̱mgba̱ ta̱ uteku tsu kacaꞋa ku umolu adama a Muwabu,

punu a̱ ka̱tsuma̱ ka̱ va̱ kpamu adama a̱ Kiru-harese.

12 A ayin a na baci Muwabu wu uta̱ka̱i ka̱ci ka̱ ni e keteshe ka̱ a̱Ꞌisa̱, ka̱ci ka̱ ni kaꞋa u koꞋuso koci. Ayin a na baci u banai a̱ ma̱va̱li ma̱ ni adama a na u yaꞋan kavasa, wi a̱ kuciya̱ wu ushuki ba.

13 Na va ɗaɗa kadanshi ka na Vuzavaguɗu u dansai m megeshe ɗe adama a Muwabu. 14 Ama gogo na Vuzavaguɗu u yaꞋan ta̱ kadanshi u danai, <<A̱ ka̱tsuma̱ ka̱ a̱ya̱ a tatsu uteku tsu na kagbashi ka na a ɗikai ulinga u tsu kece. Kupana ku uyoꞋo ku Muwabu n ka̱bunda̱i ka uma a̱ ni, i ta̱ o kokpo n wono, aza a na a kulaꞋa kpamu i ta̱ o kokpo kenu babu utsura.>>