1 A̱ma̱li a aza a Babila a na e ci ɗeke Belu n Nebo a̱ ciya̱ ta̱ ugoyi ka̱u,

a canuku ta̱ ululu e le a̱ ka̱na̱i kuka̱ra̱ka̱ a ɗa.

Gogo na i ta̱ a gaɗi vu nnama n na n tsu canuku ucanuku

nnama n nampa mo oꞋwo ta̱ adama a ucanuku u ululu u na a ɗikai va.

2 A̱ma̱li a a̱ ciya̱i kugoyi ɗa a kuɗa̱ngi koɓolo n aza a na a ɗikai le,

a fuɗa ta na a̱ ɓa̱nka̱ a̱miki a ba,

ɗa a ɗikai dem vi le a kubana a̱ ubuta̱ wu ugbashi.

3 <<Panakai mu, a̱ɗa̱ aza a Yakubu,

a̱ɗa̱ vu na i buwai dem a̱ ka̱tsuma ka kpaꞋa ki Isaraila.

A̱ɗa̱ vu na n la̱na̱i kafu a matsa ɗa̱, ɗa n ɗengusa̱i ɗa̱

ali n ayin a na a matsai ɗa̱.

4 Ali n ayin a tsukutsa a̱ ɗa̱

Mpa ɗa a̱yi, ali a kubana a ayin a na i kuta̱ ka̱nji ka̱ri, mi ta̱ a kuɗika utsura u ɗa̱.

Mpa ɗa n yaꞋin ɗa̱ mi ta̱ a̱ kula̱na̱ ɗa̱,

mi ta̱ a kinda ɗa̱ ka̱ta̱ mi isa ɗa̱.

5 <<N yayi ya kugisangu mu, ka̱ta̱ i ɗika ci ta̱ derere?

N yayi kpamu ci yotsonoi, ali ɗa i kugisanku tsu?

6 Aza o yoku a̱ ɓa̱yuwa̱i nsolo n le ɗa i ugulani n azanariya,

a tsu gisanku ta̱ azurufa e le a̱ ka̱kunzukpa̱tsu,

ele ɗa a tsu ɗika kayimi ka azanariya ka̱ta̱ u bonoko a ɗa ka̱ma̱li,

ka̱ta̱ a̱ kuɗa̱nku kaꞋa ali sai iɗika a cikpa yi.

7 A ci ɗika ta̱ kaꞋa a avangatsu e le a̱ kuka̱ra̱ka̱,

a zuwa baci kaꞋa ta lo ka ci shamgba

ka tsu wala ba.

Ka̱ tsu zumgba̱ ba, ko a vasa baci wa̱ ni u tsu ushuku ba.

Ka̱ tsu uta̱ka̱ vuza a kadama ba.

8 <<Ka̱ta̱ i cinukpa n kakuna ka nampa ba,

ka̱ta̱ i zuwa kaꞋa a̱ ka̱ɗu. Ciɓai n ukuna u nampa, a̱ɗa̱ aza a unushi.

9 Ciɓasai n ili i cau, i na i lazai n ayin a ɗe.

Adama a na mpa ɗa Ka̱shile, babu kpamu vuza yoku,

mpa ɗa Ka̱shile, babu vuza na wi tsu va̱.

10 N ugiti n tsu dana ta̱ uma ukuna wu ukocishi,

n ili i cacau, koɓolo n i na yi lo a̱ kuta̱wa̱.

N danai, kadanshi ka̱ va̱ ki ta̱ a kushamgba,

mi ta̱ kpamu a kuyaꞋan i na n cikalai kuyaꞋan dem.

11 N ɗekei vuza yoku a kasana tsu manu ma na ma tsu shaɗa ili,

a iɗika i daꞋin kpamu vuma na u kushatangu kusheshe ku va̱.

N dansa ta̱ ili i na n kuyaꞋan,

mi ta̱ ta na a kuyaꞋan i ɗa.

12 Panakai mu, a̱ɗa̱ uma a ugbamukaci,

a̱ɗa̱ na yi daꞋangi n kuyaꞋan ku kasingai.

13 Mpa mi ta̱ ufoɓushi adama a na n zuwa ili i wala derere,

makyan mi punu ka̱u ba,

ama gogo na wishi u va̱ wi a kuyaꞋan megeshe ba.

Mi ta̱ a kuzuwa wishi u va̱ a Urushelima,

tsugbayin tsu va̱ tamkpamu a Isaraila.